Б.Ганхуяг мэдүүлэгтээ Т.Аюурсайхан, Д.Амарбаясгалан нарыг нүүрсний хулгайн хэрэгт нэрлэхээс татгалзжээ

"Эрдэнэс Тавантолгой" компанийн Гүйцэтгэх захирал асан Б.Ганхуяг нүүрсний хулгайн гэх хэргийн хүрээнд дөрөв дэх сардаа цагдан хоригдож буй.

Тэрбээр Эрүүгийн хуулийн Хялбаршуулсан журам албан тушаалтнуудад үйлчилж байх үеэр хэргээ хүлээх оролдлогууд хийж, олон тооны улс төрчдийг нүүрсний хулгайн хэрэгт нэрлэсэн. Түүний мэдүүлгэд үндэслэж, АТГ-аас нүүрсний хулгайн хэрэгт хамруулан, таван УИХ-ын гишүүн багтааж, нийт 17 хүнийг нийтэд зарласан байдаг.

Гэвч уг нэрсэд Б.Ганхуягтай сүүлийн жилүүдэд хамгийн ойр байсан, томилгоог нь анх гуйж хийлгэсэн түүхтэй Т.Аюурсайхан гишүүн багтаагүй нь анхаарал татдаг. Улмаар АТГ-аас нэрлэгдсэн 17 хүн дотор багтсан Х.Мандахбаяр болон Б.Ганхуягтай ойрын харилцаатай явж ирсэн түүхтэй ЗГХЭГ-ын дарга Д.Амарбаясгалангийн нэр багталгүй үлдсэн.

Өнгөрсөн жилүүдэд Б.Ганхуягаас ЭТТ-д хамаарах асуудлаар улс төрчид юм гуйхдаа Т.Аюурсайхан болон Д.Амарбаясгалан нараар дамжуулдаг байсан талаар ил цагаанаар яригддаг. Хэдий тийм ч өнөөг хүртэл Б.Ганхуяг мэдүүлэгтээ Т.Аюурсайхан, Д.Амарбаясгалан нарыг огт дурдахгүй байгаа аж.

Хуулийнхан нүүрсний гэх хэрэгт Т.Аюурсайханыг хамруулан шалгахдаа өндөр өртөг бүхий адууны жүчээ, марк, уран зураг сэлтэд анхаарлаа хандуулсан гэгдэж буй. Түүний хамаарал бүхий этгээдийн гэрээс их хэмжээний алтан гулдмай олдсон гэгдсэн ч албаны эх сурвалжууд үүнийг эрс үгүйсгэсэн юм.

Харин МАН-ын генсек, ЗГХЭГ-ын дарга Д.Амарбаясгалангийн нүүрсний хулгайн хэрэгт огт хамран шалгагдаагүй. Харин ч эсрэгээрээ шүгэл үлээгчийн дүрээр нийтэд уг хэргийн талаарх мэдээллийг өгөх болсоор нэлээд удав.

Түүний зөвлөх Ц.Чулуунзагдын төрсөн ахын "Админарал" компани ЭТТ-гоос 47 мянган.тонн нүүрс авч, 5 сая тонн нүүрс баяжуулах чадамжтай үйлдвэр барьж байгаа талаарх баримтаас /линк/ өөр сувгууд төдийлөн харагдахгүй байгаа билээ.

Б.Ганхуягийн хувьд өнгөрсөн жилүүдэд ЭТТ-н Гүйцэтгэх захирлаар ажиллахдаа шууд үүрэг чиглэл авч ирсэн гэх Т.Аюурсайхан, Д.Амарбаясгалан нарыг нэрийг нэрлэхээс татгалзаж байгаа нь ихээхэн анхаарал татах асуудал юм. Харин Т.Аюурсайхан гишүүний тухайд өөрөөс нь ЭТТ-д хамаарах асуудлаар хандаж байсан улс төрчдийг нэрлэнэ гэдгээ илэрхийлж, намынхнаа айдаст автуулсан гэгдэж буй.

Г.ИТГЭЛ

Энэ мэдээнд өгөх таны үнэлгээ

Хуваалцаарай Жиргээрэй