Хууль: Прокурорын байгууллага Т.Бадамжунайд 13 жилийн хорих ял төлөвлөжээ

Сайд асан Т.Бадамжунайг прокуророос ялласан Эрүүгийн хуулийн дөрвөн зүйл ангийн шийтгэлүүдийг задалж харвал:

Эрүүгийн хуулийн 22.5 дугаар зүйлийн 1 /Хахууль өгөх/,

нийтийн албанд томилогдох эрхийг хоёр жилээс таван жил хүртэл хугацаагаар хасаж хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.

22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/,

нийтийн албанд томилогдох эрхийг хоёр жилээс таван жил хүртэл хугацаагаар хасаж таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

18.6 дугаар зүйлийн /Мөнгө угаах/, 2.2 байнга тогтвортой үйлдэх заалтаар зүйлчилжээ.

нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

2002 оны Эрүүгийн хуулийн 263 дугаар зүйлийн 263.2 /Төрийн албан тушаалтан албаны эрх мэдэл буюу албан тушаалын байдлаа урвуулах/,

263.2.Энэ хэргийг давтан үйлдсэн, уг хэргийн улмаас их хэмжээний хохирол, хүнд хор уршиг учирсан бол тодорхой албан тушаал эрхлэх, үйл ажиллагаа явуулах эрхийг таван жил хүртэл хугацаагаар хасч хөдөлмөрийн хөлсний доод хэмжээг тавин нэгээс нэг зуу дахин нэмэгдүүлсэнтэй тэнцэх хэмжээний төгрөгөөр торгох, эсхүл таван жил хүртэл хугацаагаар хорих ял шийтгэнэ.

Тайлбар: Дээрх дөрвөн зүйл заалтуудаар Т.Бадамжунай хамгийн багадаа 3.6 жил, хамгийн ихэдээ 18 жилийн ял сонсохоор. Үүнээс

• Эрүүгийн хуулийн 22.1.1 /Эрх мэдэл, албан тушаалын байдлаа урвуулан ашиглах/,
• 2002 оны Эрүүгийн хуулийн 263.2 /Төрийн албан тушаалтан албаны эрх мэдэл буюу албан тушаалын байдлаа урвуулах/

гэсэн ижил зүйл заалтыг зэрэг хэрэглэснээс нэг таван жилийг нь хасвал 13 жилийн хорих ял үлдэнэ гэсэн үг.

НЭМЭЛТ: /2023.09.18/ 17.00 цаг

-Т.Бадамжунайг дөрвөн зүйл ангиар яллаж, хэргийг шүүхэд шилжүүллээ-

ХХААХҮ-ийн сайд асан Т.Бадамжунайг прокурорын байгууллагаас дөрвөн зүйл ангиар яллаж, хэргийг өнөөдөр /2023.09.18/ шүүхэд шилжүүлжээ. Тодруулбал,

албан үүрэг, бүрэн эрх, албан тушаалын нэр хүнд, эрх нөлөөг урвуулан ашиглаж, хууль бусаар газар эзэмшсэн, бусдад хахууль өгөхийг завдсан, нэр бүхий аж ахуйн нэгж байгууллагад давуу байдал бий болгосон, мөнгө угаасан гэх хэрэгт

Эрүүгийн хуулийн 22.5 дугаар зүйлийн 1 /Хахууль өгөх/,

22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/,

18.6 дугаар зүйлийн 2.2 /Мөнгө угаах/,

2002 оны Эрүүгийн хуулийн 263 дугаар зүйлийн 263.2 /Төрийн албан тушаалтан албаны эрх мэдэл буюу албан тушаалын байдлаа урвуулах/-т

зааснаар яллах дүгнэлт үйлдэн Сүхбаатар дүүргийн эрүүгийн хэргийн анхан шатны шүүхэд шилжүүлсэн байна.

ЭХЛЭЛ: /2023.09.17/ 08.00 цаг

-Т.Бадамжунайд холбогдох хэргийг даваа гарагт шүүхэд шилжүүлнэ-

ХХААХҮ-ийн сайд асан Т.Бадамжунайг "Шувуу" ажиллагааны хүрээнд өнгөрөгч дөрөвдүгээр сард Филиппин улсын Сэбү хотоос авч ирсэн.

Улмаар цагдан хорьж шалгаж байгаад өнгөрсөн долдугаар сард хилийн хориг тавьж, батлан даалтад гаргаж сулласан билээ.

Мөн долдугаар сард түүний хэргийг АТГ-аас шалгаж дуусаад прокурорын байгууллагад шилжүүлээд байсан. Тэгвэл маргааш /2023.09.18/ буюу ирэх даваа гарагт шүүхэд шилжүүлэхээр болжээ.

Нийслэлийн прокурорын газраас

• Эрүүгийн хуулийн тусгай ангийн 22.1 дүгээр зүйлийн 1 дэх хэсэг, /Эрх мэдэл, албан тушаалын байдлаа урвуулан ашиглах/,
• 22.5 дугаар зүйлийн 1 дэх хэсэг, /Хахууль өгөх/, 18.6 дугаар зүйлийн 1 дэх хэсэгт /Мөнгө угаах/, заасан гэмт хэрэгт холбогдуулан шалгаж буй.

Энэ мэдээнд өгөх таны үнэлгээ

Хуваалцаарай Жиргээрэй