Шүүх: "Бэрэн групп" Хөгжлийн банканд 135 тэрбумыг олгоно

Улсын дээд шүүхийн хяналтын шатны иргэний хэргийн шүүх хуралдаанаар “Монгол Улсын Хөгжлийн банк” ХХК-ийн нэхэмжлэлтэй “Бэрэн групп” ХХК, “Бэрэн Металл” ХХК, “Бэрэн майнинг” ХХК нарт холбогдох хэргийг нэхэмжлэгчийн итгэмжлэгдсэн төлөөлөгчийн гаргасан гомдлын дагуу аравдугаар сарын 17-ны өдөр хянан хэлэлцлээ.

Улмаар "Бэрэн групп"-ээс 135 тэрбум төгрөгийг гаргуулж, Хөгжлийн банканд олгохоор шийдвэрлэсэн байна.

Нийслэлийн Иргэний хэргийн давж заалдах шатны шүүх хэргийг энэ оны зургаадугаар сарын 9-ний өдөр хянан хэлэлцээд анхан шатны шүүхийн шийдвэрт өөрчлөлт оруулж, зээлийн гэрээний үүрэгт “Бэрэн групп” ХХК-аас 135.8 тэрбум төгрөгийг гаргуулжээ.

“Монгол Улсын Хөгжлийн банк” ХХК-д олгож, нэхэмжлэлийн шаардлагаас 10.7 их наяд /10,666,496,135/ төгрөгийг хэрэгсэхгүй болгож, шүүхийн шийдвэрийг сайн дураар эс биелүүлвэл барьцаа хөрөнгөөр үүргийн гүйцэтгэлийг хангуулахаар шийдвэрлэсэн хэсэгт зарим өөрчлөлтийг оруулахаар шийдвэрлэжээ.

Хөгжлийн банкнаас “Бэрэн групп”, “Бэрэн Металл”, “Бэрэн майнинг” нарт холбогдуулан зээлийн гэрээний дагуу 146.5 тэрбум төгрөг гаргуулахаар нэхэмжилсэн байдаг.

Хан-Уул дүүргийн Иргэний хэргийн анхан шатны шүүх хэргийг энэ оны хоёрдугаар сарын 3-ны өдөр хянан хэлэлцсэн билээ. Ингэхдээ 2014 оны хоёрдугаар сарын 12-ны өдрийн зээлийн гэрээний үүрэгт “Бэрэн групп” ХХК-аас 112.5 тэрбум,  2018 оны тавдугаар сарын 24-ний өдрийн зээлийн гэрээний үүрэгт “Бэрэн групп” ХХК, “Бэрэн Металл” ХХК , “Бэрэн майнинг” ХХК нараас 20.4 тэрбум төгрөг гаргуулж, “Монгол Улсын хөгжлийн банк” ХХК-д олгож, нэхэмжлэлийн шаардлагаас үлдэх 13.5 тэрбум төгрөгийг хэрэгсэхгүй болгож шийдвэрлэсэн байна.

Мөн эдгээр компаниуд нь шүүхийн шийдвэрийг сайн дураар эс биелүүлвэл барьцаа хөрөнгөөр үүргийн гүйцэтгэлийг хангуулахаар шийджээ. Улсын дээд шүүхийн хяналтын шатны иргэний хэргийн шүүх хуралдаанаар хэргийг хянан хэлэлцээд давж заалдах шатны шүүхийн магадлалыг хэвээр үлдээв.

А.ДАВАА

Энэ мэдээнд өгөх таны үнэлгээ

Хуваалцаарай Жиргээрэй