СПОРТ

Ш.Алтанбагана мэргэжлийн пауэрлифтингийн ДАШТ-ээс мөнгөн медаль хүртлээ

Хүчний гурван төрөлт буюу пауэрлифтингийн спортын мэргэжлийн WPC холбооны насанд хүрэгчдийн ДАШТ Финланд улсад энэ сарын 6-10-нд болов. 28 орны 1000 гаруй тамирчин хүч сорьсон тэмцээнд Монголоос эх орноо төлөөлөн оролцсон Дотоод хэргийн их сургуулийн багш, олон улсын хэмжээний мастер, цагдаагийн ахлах дэслэгч Ш.Алтанбагана мөнгөн медаль хүртэв.

Эрэгтэйчүүдийн -100 кг-д хүч сорьсон тэрбээр RAW штангтай хэвтээ шахалтын төрөлд 212.5 кг өргөн дэлхийн дэд аварга болох болзол хангажээ.

Түүний жинд Португалын тамирчин түрүүлж, Италийн хүчтэн хүрэл медаль хүртэв.

ОУХМ Ш.Алтанбагана 2014 онд AWPC, 2016, 2017 онд WRPF холбооны ДАШТ-д, 2014 онд WPC, 2016 онд AWPC, энэ жил AWPC холбооны Дэлхийн цомын аварга шалгаруулах тэмцээнд түрүүлж, Төрийн дууллаа эгшиглүүлсэн.

Мөн 2010, 2014 онд IPF, 2016 онд AWPC холбооны Ази тивийн аварга шалгаруулах тэмцээнд, өнгөрсөн жил IPL холбооны Европ тивийн аварга шалгаруулах тэмцээнээс алтан медаль хүртсэн амжилттай. Үүний сацуу 2015, 2017 онд WPFG холбооны Цагдаагийн ДАШТ-д түрүүлж, дэлхийн хошой аварга болоод байгаа юм.

Б.БУЯНДАЛАЙ

Холбоотой мэдээ

Нэг сэтгэгдэл

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button
Close