Дүү нь АН-тай тохирч, ах нь МАН-аас мандат горилно

Хураангуй:

• Ах, дүү хоёр 2020 оны УИХ-ын сонгуулиас хойших жилүүдэд хууль, хяналтын байгууллагаас салахгүй шалгагдаж, "аав"-ынаар ч орж, гарав.
• Гэвч нэг нь хэргээсээ мултарч, АН-тай тохиролцох байдлаар нэр дэвших бол нөгөө нь хэргээ хэрэгсэхгүй болгон цагаадаж, МАН-аас мандат горилж байна.

Дэлгэрэнгүй:

Ж.Батзандангийн хувьд арав хоногийн өмнө "Би эрх чөлөөтэй боллоо, одоо үгээ хэлж тэмцэнэ" хэмээн Төрийн ордонд мэдээлэл хийсээр гэнэт гарч ирлээ. Тэрбээр, "2008 онд жагсаал хийсэн гэж гурван сар шоронд хийсэн бол сая “Хэрээ мэдэхгүй дарвалзсан” гэж хоёр сар 15 хоног хорилоо. Гартаа гавтай, хөлөндөө гинжтэй, амаа үдүүлсэн 4 жил өнөөдөр дууслаа. Нийгэмд учруулсан хохиролгүй гэж үзээд хэргийг хэрэгсэхгүй болгосон" хэмээсэн.

Түүний хувьд туслах Г.Аюулгүйн хамтаар Хөгжлийн Банктай холбоотой зээл тойрсон асуудлаар шалгагдаж, 2022 оны аравдугаар сарын 10-нд цагдан хоригдож байсан билээ. Тэгвэл улстөрийн сонирхолтой нүүдэл хийхээр зэхжээ. Тодруулбал, АН таван мандат бүхий сонгуулийн наймдугаарт тойрогт /Баянзүрх дүүрэг/ Ж.Батзанданг нэр дэвшүүлэх тохироо хийгдсэн гэх шинэ нөхцөл байдал үүссэн тухай яригдаж байна.

Харин түүний ах Ж.Бат-Эрдэнэ долоон мандат бүхий Дорнод, Сүхбаатар, Хэнтий аймгийн зургаадугаар тойрогт нэр дэвшихээр бэлтгээд удаж байна.

АТГ Хөгжлийн банкны хэрэгт дөрвөн хуулийн этгээд, 80 хүнийг яллагдагчаар татсаны нэг нь Ж.Батзандангийн ах Зам тээврийн хөгжлийн дэд сайдаар ажиллаж байсан Ж.Бат-Эрдэнэ байлаа. Хоёр шатны шүүхээр шүүлгэсэн ч, хэрэг нь хэрэгсэхгүй болж цагаадсан. Тиймээс нэр дэвших бэлтгэлээ үргэлжүүлэн базааж, МАН-аас мандат авахаар горилогчдын эгнээнд жагсаж байна. Хэрэгт холбогдон шалгагдах үестээ Сүхбаатар аймгийн МАН-ын хорооны даргаасаа түдгэлзэж, Ерөнхийлөгчийн дүү У.Отгонбаярт шилжүүлж байв. Энэ нь сонгуулийн тойрог суллаж буй агуулгаар яригдаж байсан билээ.

Энэ мэдээнд өгөх таны үнэлгээ

Хуваалцаарай Жиргээрэй