Л.Оюун-Эрдэнэ, Х.Нямбаатар нарын тендер "машиндах" үзэмжээр ажиллах төлөвлөгөө

Шинэ Засгийн газар хуучин төсвөө задалж болно. Өөрсдийнхөө хийх ажилд ажилд нийцүүлэн дахин боох нь зөв. Гэхдээ үүнийг дагуулаад өөрсдөдөө хэмжээгүй эрхийг өгчхөж болохгүй. Тэднийг дураар зоргоор загнуулахгүй гэж нийтийн төлөөлөх эрхийг хэрэгжүүлэх парламент бий юм.

Төсөв дагуулж өргөн мэдүүлсэн хуулийн төслүүддээ Засгийн газар,

• Хүчингүй болсон концессын гэрээнд үндэслэж, зарим ажлуудыг явуулах,
• Тендер зарлахгүйгээр сайдын баталсан журамд нийцүүлэн, зарим төслийг ЗГ-ын "үзэмж"-ээр хэрэгжүүлж болно.
• Хоёр удаа тендер зарлаад, "олигтой" материал ирээгүй шууд, ажлын тав хоногт тендер зарлаж, "машиндах", эсвэл тендергүй шууд өгөх,
• 10 тэрбумаас дээш өртөгтэй ТӨҮГ, ТӨХК-иудын тендерийг ТХААГ зохицуулна зэрэг зохицуулалт хийхээр тусгаж оруулж иржээ.

Шинэ парламентаар хэлэлцэгдэж баайгаа эл төслүүд дээр хуучин ХЗДХ-ийн сайд асан Б.Энхбаяр "Тендергүй, ЗГ дангаараа шийдэх агуулгатай, хүчингүй болсон хуулийн төсөл ашиглах зэрэг боломж олгох байж боломгүй хуулийн төсөл ДӨРӨВ дэх удаагаа орж ирэхээр зүтгэж байна" гэж онцолсныг энд бас оншлууштай.

Төсөв дагаж өргөн баригдсан хуулийн төслүүд дээр хотын дарга Х.Нямбаатарын оролцоо асар өндөр байгааг,

• "Тавантолгой түлш" компанийг Нийслэлийн өмчид шилжүүлэх,
• Зарим тендерийн эрхийг хот тосгоны хуульд нийцүүлэн, хот дангаар шийдэх,
• Чадавхад суурилсан хэлэлцээний нөхцлөөр томоохон ажлуудыг "чаддаг" газарт шууд өгөх,
• Яаралтай ажлуудад тендерийн нөхцлийг хөнгөвчлөх, шууд олгох зэрэг заалтууд сууснаас харж болно.

Үндсэндээ Ерөнхий сайд Л.Оюун-Эрдэнэ, хотын дарга Х.Нямбаатар нарын "Ажлаа гялс явуулахын тулд тендергүй ч ажил өгдөг байя, шууд хусацгаая" гэдэг түргэвчлэх тохироо л эндээс уншигдаж байна.

Мэдээж аж ахуйн ажил явуулахад хуулийн түмэн тээгтэй тулж, өөрийнхөө батласан урт журмууддаа өөрөө түүртэж яваа хүн бол өнөөгийн хотын дарга Х.Нямбаатар. Тэгээд ч хотын статусыг өргөжүүлж байж, аж ахуйн ажлууд нь илүү сайн явна, одоо ханандаа тулчхаад байна гэдгийг тэр үзэж туулж яваа.

Гэвч муу кэйсүүдээ энд санацгаамаар байна.

Нэг.Ерөнхийлөгч асан Х.Баттулга төсөр замын явуулах гэж яарахдаа төрийн нууцад асуудлыг нь авч байгаад, баахан тендергүй ажлуудыг Голомтын Д.Баясгаланд өгч, арилжааны банк өөрийн активтайгаа дүйцэх мөнгөөр нүүрсний бартер хийснийг,

Хоёр. Ковидын үеэр "Эрдэнэт үйлдвэр"-т онцгой дэглэм тогтоож байгаад, бүх тендерийг нууцалж, МАН асар их мөнгө угаалт хийж, Ерөнхийлөгчийн сонгуулийн зардлаа хэрхэн "далд" босгож авсныг, сайд, УИХ-ын гишүүн бүрт Х.Бадамсүрэн хармаанаасаа өгч буй буй мэтээр ажил хуваарилсныг,

Гурав. Засгийн газрын эрх мэдлээр УИХ-аар оруулалгүй, "Эрдэнэт үйлдвэр"-ээ улсдаа оруулж ирээд, Ч.Сайханбилэгт гадна дүрвэж амьдарч буйг, сахал Д.Эрдэнэбилэгийн баг хэрхсэнийг санацгаая.

Эдгээр кэйсүүд нэгэндээ хяналт тавьж байх төрийн инститүцүүдийн горим алдагдсан, нэг нь давамгай эрх эдэлснээс, нууж хааснаас, нийтээс тасарч давхиснаас л гажуудал нь үүссэн харагддаг. Ах нарынхаа тэр замыг баахан шүүмжилснээ одоо Л.Оюун-Эрдэнэ нар тэр замаар алхахаар УИХ-ыг хүчилж байна. Тэгээд нийн анхаарал үлэмж суларсан цагаар эл хуулийн төслүүд орж ирэв.

Одоогийн тендерийн хуулийг манай дотоодын ААН-үүд ч шүүмжилдэг. Асар төвөгтэй, ажил явуулахад хүндрэлтэй байгаа нь үнэн. Гэхдээ засч байна гээд шуудхан ЗГ, хотын даргын үзэмжээр шууд тендер өгчихдөг хэлбэр лүү оруулчхаж болохгүй.

Нөгөө талд ЗГ, УИХ-ын олонхдоо хяналт тавих учиртай АН, ХҮН-ын дарга нар одоо өөрсдөө тендер хуваарилагч нар болохын тулд танхимын үзэл санаагаа хамгаалаад сууж байна. ЗГ-ын шинэ бүтцээр Төрийн бүх тендерийг зохицуулдаг ТХААГ нь ХҮН намын дарга Т.Доржхандын мэдэлд очсон. Т.Доржханд сайдтан шинэ хуулиар 10 тэрбумаас дооших бүх тендерт эзэн суухаар зохицуулагдаж байна.

Жаахан дүү нар нэгдээд ийм юм найруулахаар ТӨХК-иуд дээр ихээхэн анхааралтай ханддаг манай Ерөнхийлөгч ч зүгээр суухгүй юм.

Энэ бүх зураглалуудыг харахаар МАН, ХҮН, АН эвсэж нэгдэж байгаа нэрээр ирэх жилүүдийн том тендер, бүтээн байгуулалтын ажлууд гадны компаниуд, дотоодын томоохон монополи эздэд төрийн хэдхэн хүний үзэмжээр очих нь ээ. Сайд нар сайд болсон, сонгуульдсан зардлаа эндээс босгоно. Тэдний сонгуулийн менежерүүд агентлагийн дарга болж эндээс мөнгөжнө.

ААН-үүд төрөөс баахан эмээх болсон үхмэл үе улам лавшрах нь. Дарга танилтай бол дээшээ явдаг бизнесийн далд, угширмал байдал систем болон өргөжих ч эрсдэлтэй. Нийтийн хяналт ч бүдгэрэх юм байна. Яг ийм зүйлийг Л.Оюун-Эрдэнэ, Х.Нямбаатар нараас нийт хүссэн үү, тэдний итгэл төрүүлсэн байдал эргээд хаашаа чиглэх вэ гэдэг асуулт ч үүсэх юм.

Энэ мэдээнд өгөх таны үнэлгээ

Хуваалцаарай Жиргээрэй