Онон голд автомашинтайгаа живсэн хоёр иргэний нэгнийх нь цогцсыг олж, нөгөөг эрэн хайж байна
Зургаан хоногийн өмнө буюу энэ сарын 17-ны өдрийн 17.00 цагийн орчимд 66 настай Б /жолооч/ болон 58 настай И нар автомашинтайгаа живсэн гэх дуудлага Онцгой байдлын газарт ирсэн байна.
Тэд Хэнтий аймгаас 218 км-ын зайд Батширээт сумын Онон гол дээгүүр "Юнимог-400" загварын бага оврын ачааны автомашинтай явж байхдаа ийн осолдсон аж.
Тус сумын Засаг даргын Тамгын газрын ажилтнууд энэ сарын 18-ны өдрийн 06:40 цагт гарч, 07:50 цагт очиж, 08:00 цагт эрэн хайх ажиллагааг зохион байгуулж, 08:40 цагт осолдсон газраас урд зүгт 8 км-т Онон багийн “Улаан бургас” гэдэг газраас жолооч Б-ийн цогцсыг голын эрэгт хайрагдаж тогтсон байсныг олж, тус сум дахь Цагдаагийн тассагт шилжүүлэн өгсөн байна. Харин зорчигч И-г эрэн хайх ажиллагааг зохион байгуулж байгаа тул хүч нэмэгдүүлэн ажиллах тухай хүсэлтийг 09.18-ны өдрийн 09:50 цагт Онцгой байдлын ерөнхий газарт ирүүлжээ.
Хэнтий аймгийн Онцгой байдлын газрын Эрэн хайх, аврах салбарын алба хаагчид, Үндэсний аврах бригадын алба хаагчид Онон багийн “Өгөөмөр” гэдэг газар Онон голын 8 метрийн гүнээс "Юнимог-400" загварын бага оврын ачааны автомашиныг татан гаргах ажиллагааг 09.22-ны өдрийн 08:40 цагаас зохион байгуулж, 15:10 цагт гаргаж, тус сум дахь Цагдаагийн хэсэгт хүлээлгэн өгчээ. Иргэн И-г эрэн хайх ажиллагааг өчигдрийн 18:00 цаг хүртэл зохион байгуулсан боловч үр дүнд хүрээгүй тул түр зогсоож өнөөдөр өглөө 07.30 цагаас үргэлжлүүлж байна.
З.УЧРАЛ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.