"Шинэ хоршоо" хөдөлгөөний хүрээнд 517 тэрбумыг малчдад зээл хэлбэрээр олгожээ

“Шинэ хоршоо” хөдөлгөөний хүрээнд  малчдад одоогийн байдлаар 517 тэрбум төгрөгийн хөнгөлөлттэй зээл олгоод байна. Улсын хэмжээнд өнөөдрийн байдлаар 6300 гаруй хоршоо байгуулагдаж, 66 мянга гаруй малчин өрх гишүүнээр хоршоонд элсэж зээл авчээ.  Хөдөлмөрөөрөө хоршсон малчдын зээлийн жилийн хүү 6 хувь бөгөөд хоршоонд элссэн малчин 10-50 хүртэлх сая төгрөгийн зээлийг 3-5 жилийн хугацаатай авах боломжийг малчдад олгоод буй. Хоршооны үйл ажиллагааг төрлөөр нь авч үзвэл, бэлчээрээ нөхөн сэргээх, ноос ноолуурын анхан шатны боловсруулалт хийх жижиг үйлдвэр байгуулах, хүнсний мах бэлтгэл, нутгийн шинэ брэнд гаргах, малчдын хадлан тэжээлийг хамтран бэлтгэх, аялал жуулчлалын гэр бааз ажиллуулах, жуулчдад зориулсан тусгай хөтөлбөртэй аялал, гэр цэцэрлэг зонхилж байна.

Малчдын зээлийг арилжааны банкууд олгож байгаа бөгөөд Төрийн банк ихэнх зээлийг олгоод байна. Төрийн банкны зүгээс малчид авсан зээлээ зориулалтын дагуу зарцуулж, тайлан тооцоогоо цаг хугацаанд нь ирүүлж байхыг зөвлөжээ.

Малчдын хувьд өмнө нь малаа барьцаалан зээл авахад сарын хүү нь дунджаар 20 гаруй хувьтай байсан бол “Шинэ хоршоо” хөдөлгөөнд нэгдэн зээл авснаар хүүгийн дарамт багатай, бичил бизнесээ өргөжүүлэх замаар өрхийн орлогоо нэмэгдүүлэх боломжийг олгож байна. "Шинэ хоршоо" хөдөлгөөнөөр дамжуулан малчдад 2024-2028 онд нийт 5 их наяд төгрөгийн зээлийн санхүүжилт олгохоор төлөвлөжээ. Харин үүнээс 2025 онд “Шинэ хоршоо” хөдөлгөөний зээлд хэдэн төгрөгийн санхүүжилт олгох нь УИХ-аар Монгол Улсын 2025 оны төсвийн төслийг баталсны дараа тодорхой болох аж.

Т.ГЭРЭЛТ-ИРЭЭДҮЙ

Энэ мэдээнд өгөх таны үнэлгээ

Хуваалцаарай Жиргээрэй