Ерөнхий сайдад итгэлцэл үзүүлэх эсэхийн босгон дээр ирлээ

Түрүү долоо хоногт Бага хурлын шийдвэрийг дагаж, өөрийн хүсэлтээр огцорно гэгдэж байсан Ерөнхий сайд Л.Оюун-Эрдэнэ шинийг бодсон байж мэдэх нь. Тэр өнөөдрийн Засгийн газрын хуралдаанд “Итгэл үзүүлэх тухай” тогтоолын төсөл танилцуулж, улмаар УИХ-аар хэлэлцүүлэх хувилбар хүчтэй яригдаж эхэллээ.

Тогтоолын төслийн агуулга нь, барагцаалбал хамтарсан Засгийн газарт тодорхой хугацаанд итгэл үзүүлж, үргэлжлүүлэн ажиллуулах тухай байх магадлалтай.

Өөрөөр хэлбэл, УИХ-ын гишүүдийн олонх дэмжвэл огцрохгүй байх, хамтарсан Засгийн газраа авч үлдэх боломж Л.Оюун-Эрдэнэд байна.

Энэ хүртэл хоёр долоо хоногийн турш Л.Оюун-Эрдэнэ гэдэг хүн ард түмнийхээ өмнө ч гарч ирсэнгүй, албан ёсоор тайлбар мэдэгдэл ч хийсэнгүй. Хоёр дахь удаа Бага хурал хуралдана гэсэн сураг чимээнээр, орон нутгийн гишүүд нь гэртээ харьж чадахгүй хашигдацгаав. Яаж шийдэх, хэрхэхийг мэдэхгүй УИХ-ын гишүүд нь ордон дотор бүлтэлзэж, АН-ынхан Засгийн газарт үлдэнэ, үлдэхгүй гэж бүлэг дотроо хэрэлдсээр байна. УИХ-ын чуулганы хуралдааны ирц, хариуцлагын асуудал ч хүчтэй тавигдлаа.

ХҮН намынхан гэж, “Дахиад 2-3 сайд биднийх болно” хэмээн ярьж яваа анхиагүй улс байна ч гэх. Нэг ёсондоо ажлаа хийхээ байцгаав.

Нөгөө талаас нийгмийн талцал бухимдал ч болохоо байв. Хөлсний бичээч, жиргээчид нүдний өмнө илтэд хөлслөгдөв. Ингээд дараагийн Ерөнхий сайд гэж зүсэн зүйлийн таамаг дэвшүүлж, эсвэл хуйвалдааны онол бичиж олон нийтийн санаа бодлыг эргүүлсээр байна. Хүмүүс сошиал орчинд муудалцаж байна.

Мөн залуусын “Огцрох амархан” жагсаал нийт 14 өдөр үргэлжилчихлээ. Тэнд залуу, дунд үеийн аль боловсролтой, сэхээтэн нь очиж байнга биш юм гэхэд байр сууриа илэрхийлэн дэмжиж байгаа харагдана. Ерөөсөө ард түмэн нь нэгдэж жагсаад, хариулт нэхэхэд түүнийг үл тоож буй дүр зургийг Ерөнхий сайд Л.Оюун-Эрдэнэ үүсгэв. Тэр ингэтлээ вакумжсан, мэдрэмжгүй улстөрч болж орхисон юм уу.  МАН-ын Бага хурлаас хойш гэрээсээ ч цухуйхгүй байгаа гэгдсэн Л.Оюун-Эрдэнэ харин нэгэн шийдвэрт хүрсэн бололтой.

Энэ бол Ерөнхийлөгч У.Хүрэлсүхтэй үзээд үзье гэдэг бодол.

УИХ-ын гишүүн Х.Тэмүүжингийн манай сайтад өгсөн ярилцлагад энэ талаар ойлгомжтой тайлбарласан. Ерөөсөө Үндсэн хуульд дахин нэмэлт оруулахгүй, Ерөнхийлөгчид нэг хүн дахин нэр дэвшихгүй гэснээс эхэлж л энэ бүх асуудал өрнөлөө гэдэг агуулгыг УИХ-ын гишүүн Х.Тэмүүжин тодотгосон. Цаашлаад эдгээрийн цаана нам доторх хагарал, зодоон л бий гэж тайлбарласан ч оргүй биш. Энэ явж явж хамгийн бодит хувилбар.

The Guardian хэвлэл ч энэ агуулгыг онцолжээ. “У.Хүрэлсүх дахин нэр дэвшихгүй юм гэхэд өөрийн талд ажиллах хүнийг Ерөнхий сайд болгохын тулд парламентын хүчийг сулруулах гэж байна” хэмээн дүгнэжээ. Аргагүй, хамтарсан Засгийн газар байгаа цагт парламент ч нэгдмэл байх юм, улс төрийн хувьд. Харин задарчихвал аль нэг талаас нь асуудал оруулж, хэлэлцүүлж, маргалдуулж болно л гэсэн үг.

У.Хүрэлсүх, Л.Оюун-Эрдэнэ нарын хооронд чухам энэ засаглалын асуудлаар зөрчил үүсээд жил гаруй болж байгаа. Талбай дээр жагсаж буй залуус үүнийг төдийлөн мэдэхгүй, гэхдээ үнэн. Тийм учраас л Л.Оюун-Эрдэнийг дангаар засагла эсвэл ажлаа өг гэсэн. Харин Л.Оюун-Эрдэнэ Бага хурлын олонхоор шийдье гэсэн. Бага хурал Л.Оюун-Эрдэнийн талд байсан ч эцсийн мөчид санал хайрцаглагдсан.

Харин ингээд л бас буучих, буугаад өгчих зан чанар Л.Оюун-Эрдэнэд 10 жилийн өмнө ч байсангүй. Тэр хэрэв мэдрэмжтэй улстөрч байсан бол У.Хүрэлсүхтэй нийлж, түүний дараагийн засаглалын замыг засалцангаа өөрийнхийгөө ч бэлдэх байсан. Гэхдээ түүнд тавчиктай ээжээр шалтаглан буудаг шиг зан чанар бас алга. Хэн нэгэн цүнх, бөгжний асуудлыг сөхсөн, “Залуус аа, уурлаад өгөөрэй” гэж санаачлаад сэвсэн. Харин тэр сэвээ нийгмийн шударга ёсыг шаардсан. Гэвч улс төр зөвхөн үүнийг шалтаг болгон далимдуулж, өөрийг нь хийгээд хамтарсан ЗГ-ыг нь арчих гэж үзсэн. Үүний эсрэг мөн адил улстөржөөд үзэхээр шийдсэн нь энэ үү?

УИХ-д оруулна гэгдэх итгэлцлийн тогтоол нь өнөөдөр ЗГ-аар хэлэлцэгдвэл, пүрэв баасан гарагийн чуулганы хуралдаанд Л.Оюун-Эрдэнэ орж ирэх магадлал өндөр байна. Харин гишүүдийн олонх хэрхэх вэ гэдэг л анхаарал татна.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй