Чехийн ерөнхийлөгчийг Далай ламтай уулзсан хэмээн Хятадын зүгээс харилцаагаа цуцлав

Хятадын Гадаад хэргийн яамны хэвлэлийн төлөөлөгч мягмар гарагт мэдэгдэл хийхдээ, Чехийн Ерөнхийлөгч Петр Павел өнгөрсөн сард Далай ламтай уулзсан асуудалд Хятад улс бүх талын харилцаагаа цуцлаж байгаа гэв.

"БНХАУ-ын зүгээс илэрхийлсэн эсэргүүцэл, хүчтэй байр суурийг үл тоон, Чехийн Ерөнхийлөгч Петр Павел Энэтхэгт очиж Далай ламтай уулзлаа” хэмээн тус яамны төлөөлөгч Лин Жян мэдэгдсэн байна.

Мөн “Энэ үйлдэл нь Чехийн Засгийн газрын зүгээс БНХАУ-ын Засгийн газарт өгсөн улс төрийн амлалтыг ноцтой зөрчиж, Хятадын бүрэн эрх, нутаг дэвсгэрийн бүрэн бүтэн байдалд хохирол учрууллаа” гэв. XIV Далай лам 1959 онд Төвдөд гарсан Хятадын дарангуйллын эсрэг бослого бүтэлгүйтсэний дараа Энэтхэгт цөлөгдөн амьдарч буй.

Чехийн ерөнхийлөгч Павел нь буддизмын тэргүүлэгчтэй энэ оны 7-р сарын 27-нд уулзсан бөгөөд айлчлалын үеэр түүний ажлын албанаас хүн дагалдаагүй аж.

Павелын ажлын албаны мэдээлснээр уг айлчлал нь Далай ламын 90 насны ойн урилгын дагуу очсон гэжээ. “Ерөнхийлөгч Японд хийсэн ажлын айлчлалаас буцах замдаа төлөөлөгчдийн бүрэлдэхүүнээс тусдаа, Далай ламд биечлэн баяр хүргэсэн” хэмээн Чех Улсын Ерөнхийлөгчийн тамгын газраас мэдэгджээ.

Чехийн ерөнхийлөгч асан Вацлав Хавел Далай ламтай нөхөрлөж байсан бөгөөд сүүлийн жилүүдэд Чех, Хятадын харилцаа хөрж буй. Энэ оны 5-р сард Чехийн тал Бээжинг Прага дахь Гадаад хэргийн яаманд кибер халдлага зохион байгуулсан гэж буруутгасан билээ. Үүнээс гадна Чехийн улс төрчид Хятад өөрийн газар нутаг хэмээн үздэг Тайваньд зочилж, Тайванийн ерөнхийлөгч асан Цай Инвэнь өнгөрсөн 10-р сард бүрэн эрхийнхээ хугацааг дуусахаас өмнө Прага хотод айлчилсан юм.

Т.БАТСҮРЭН

Эх сурвалж: KyivPost

Энэ мэдээнд өгөх таны үнэлгээ

Хуваалцаарай Жиргээрэй