Ангарскийн үйлдвэр дахин засварт орвол цаанаас таталт хийж, шатахууны үнэ өснө гэх Г.Занданшатарын мессеж

Энэ оны 5-р сард АИ-92 бензиний үнэ 200 төгрөгөөр нэмэгдэж 2390 төгрөгөөс 2590 төгрөг болсон. Шатахууны үнийг бууруулах тал дээр Засгийн газраас төдийгүй Аж үйлдвэр, эрдэс баялгийн баялгийн яамнаас үр дүнтэй шийдвэр гаргаж чадаагүй. Үнэ ч буцаж буураагүй юм.

Сүүлийн жилүүдэд Монголын шатахуунаа авдаг Ангарскийн үйлдвэр “засвартай” гэх шалтгаан тоочих нь ойртох болов. Уг нь Засгийн газар хоорондын гэрээтэйгээр Монголд нийлүүлдэг шатахууны үнийг нэмэгдүүлэхгүй гэж албаныхан хэлдэг ч сүүлд 8-р сарын эхээр ОХУ-ын Засгийн газраас гаргасан шатахууны экспортын хоригтой холбоотойгоор дотоодод нь бензин, шатахууны үнэ түүхэн дээд түвшиндээ хүрч өссөн. Тухайлбал, АИ-92 бензиний үнэ өнгөрсөн жилийн мөн үеэс 25 хувиар, АИ-95 бензиний үнэ өнгөрсөн оны мөн үеэс 24 хувиар өссөн байна.

Энэ өсөлтийг дагаж Оросын зарим хот, бүс нутагт шатахуун авахын тулд дугаарлаж зогсохдоо тулсан талаар дотоодын хэвлэлүүдэд бичжээ.

2023 онд “Роснефть”-ийн Ангарск дахь газрын тос боловсруулах үйлдвэрүүдэд 30 хоногийн хугацаатай төлөвлөгөөт засварын ажлыг гүйцэтгэнэ гэх шалтгаанаар Монгол руу экспортлох шатахууны хэмжээг бууруулж байсан. Тухайн үед одоогийн Ерөнхий сайд Г.Занданшатар УИХ-ын дарга байхдаа “Роснефть”-ийн Гүйцэтгэх захирал Игорь Сечинтэй уулзахад "тогтвортой нийлүүлнэ" гэдэг цайны хариултаа л хэлж байв.

Харин 2022 онд Ангарскийн нефтийн үйлдвэрт гал гарч, үүний өмнө буюу 2021 онд мөн л тус үйлдвэр “засвартай” гэх шалтгаанаар нийлүүлэлт удааширснаас үүдэн шатахуун тасарч, Монголын талаас өөрсдөө удаа дараа хөөцөлдөж байж шатахуунаа авах юм болж байсан.

Гэтэл энэ жил дахиад л засвар нэрийдлээр “Роснефть” манайд шатахууны хомсдол үүсгэж, баруун аймгуудад иргэд бензин шатахуун авахын тулд урт цуваа үүсгэхдээ хүрсэн юм.

Энэ сарын 18-ны өдөр өвөлжилтийн бэлтгэл ажилтай танилцах өртгөсөн хуралдааны үеэр Ерөнхий сайд Г.Занданшатар “Ангарскийн үйлдвэр засварт орох тул шатахууны үнэ өсөх, хангамж тогтворгүй болох эрсдэлтэй. Цаанаас татахад тээврийн зардал нэмэгдэнэ” хэмээн хэлсэн бөгөөд энэ нь цаашид шатахууны үнэ нэмэгдэж магадгүй гэсэн үг юм.

Урьд нь ч мөн үнийг өөрчлөхгүй гэдэг агуулга албаныхан тайлбарласаар ирсэн ч араас нь үнийг нэмэгдүүлдэг жишиг бий.

Ерөнхий сайд Г.Занданшатар ОХУ-ын Ерөнхий сайд Михаил Мишустинтай утсаар ярихад "ОХУ бензин, шатахууны экспортдоо тодорхой хязгаарлалт хийж буй ч, энэ хязгаарлалт Монгол Улсад хамаарахгүй, нийлүүлэлт тогтвортой үргэлжилнэ" гэж мэдэгдсэн. Гэтэл Оросын төрийн мэдээллийн ТАСС агентлагийн мэдээнд бензин, шатахууны агуулга дурдагдаагүй байв.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй