#1: Онцгой объектод архиддаг онцгүй ёс зүйтэй НУБИЭ ХХК-ийн дарга нар

Саяхан даа. Энэ сарын эхээр “Тавантолгой төмөр зам” ХХК-ийн Гүйцэтгэх захирал Б.Дүгэржавыг ажлын байран дээрээ архидан согтуурч, танхайрсан үндэслэлээр үүрэгт ажлаас нь чөлөөлсөн билээ. Камерийн бичлэгт үндэслээд шийдчихэж байсан. Гэтэл төрийн байгууллагуудад чинь ажлын байрны архидалт хавтгайрчихсан юм биш үү. Тухайлбал, Монгол, Японы хамтарсан “Нью Улаанбаатар Интернэйшнл Эйрпорт” ХХК-ийн нэр бүхий удирдлагууд албан өрөөндөө архидаж буй баримтыг бид хүргэж байна.

Зүүн гар талаас Аюулгүй ажиллагаа, аюулгүй байдлын газар А.Азбилэг, Дотоод хяналтын зөвлөхөөр ажиллаж байсан Б.Оргил, Бизнес төлөвлөлтийн газрын дарга М.Төгсбаяр, Дотоод хяналтын дарга Ц.Цэвээндаш, Дотоод хяналтын ахлах Гангабаатарын Бямбадэлгэрэх, Гүйцэтгэх захирлын нарийн бичиг, орчуулагч Баярсайханы Анар нар юм. Тэд ажлын байран дээрээ буюу НУБИЭ ХХК-ийн Дотоод хяналтынхаа өрөөнд сууж байгаа нь энэ.

Зурган дээрх хүмүүс хэн хэн болохыг илүү дэлгэрэнгүйгээр хүргэе.

"Чингис хаан" нисэх буудлыг ашиглалтад орохоос өмнө Ашиглалтын өмнөх захиргаанд 2019 он хүртэл ажилласан. Улмаар нисэх буудал ашиглалтад орох үед ИНЕГ-т ороод 2020 онд тэтгэврийн насандаа хүрсэн. Тэтгэврээ аваад, ач зээгээ хараад, гэртээ сууж байх ёстой хүн. Хөшигийн хөндийн нисэх буудлын менежментийг хэрэгжүүлдэг НУБИЭ ХХК-ийн Дотоод хяналт гэх том албыг хариуцах болсон хэдий ч ямар ч хяналтгүй болгох нь ээ.

Тус байгууллагад ургийн модоо ургуулсан нэгэн. Тэрбээр нөхөр, хүргэн, охин, найзтайгаа хамт ажиллаж байгааг бид хүргэж байв. Гэр бүлээрээ НУБИЭ-д ажиллаад зогсохгүй, албан тушаалаа ашиглан өөртөө давуу байдал гаргаж сурсан нэгэн. Австралид ажиллаж байгаа хүргэнийхээ визийг сунгуулахаар НУБИЭ ХХК-иас Элчин сайдын яаманд хуурамч тодорхойлолт гаргасан гэх мэдээлэл бий. Визээ сунгуулмагцаа хүргэн нь ажлаасаа гарсан аж. Мөн охин Т.Гэрэлсүрэн нь сургалтын чөлөөтэй гэх боловч жилийн өмнө Монголд ирээд өөр газар хөдөлмөрийн гэрээ байгуулан ажиллаж буй гэх. Гэхдээ Дотоод хяналтын дарга ээж нь НУБИЭ ХХК дахь ажлын байрыг нь халгалсаар буй гэнэ.

Хамгийн сонирхолтой энэ бүхнийг нь Япон талын захирлууд нь мэддэг хэрнээ ёс зүй, компанийн соёлыг дарга нараасаа бус ажилчдаасаа шаарддаг нь өнөөх мундаг Япон менежмент нь бололтой.

Аюулгүй ажиллагаа, аюулгүй байдлын газрын дарга. 2023 онд хоёр настай хүүхдийг эрсдэлд оруулах шахсан эзэн гэгддэг. Түүний удирддаг газрын хараа хяналтгүйн улмаас орон нутгийн бүртгэлийн хэсгээр нэвтэрсэн, тээш зөөвөрлөх урсдаг зам руу орж, хоёр давхараас нэг давхарт унасан ч, азаар бэртэж гэмтээгүй өнгөрсөн байдаг. Хариуцлага огтоос яригдаагүй өнгөрсөн нь бас л сонин.

Шуурхай удирдлага, хяналтын төвийн даргаар ажиллаж байгаад Бизнес төлөвлөлтийн газрын дарга болон дэвшсэн. Эл албан тушаалаа 2024 оны нэгдүгээр сарын 01-нээс хашиж эхэлсэн. Ингэж дэвшхээсээ өмнө Ерөнхийлөгч У.Хүрэлсүхийн сууж явсан тусгай үүргийн онгоц айлчлалаас ирж газардахад хүзүүвч хоолой залгалгүй удаж, хариуцлага алдсан үйлдэл гаргасан байдаг. Улмаар хариуцлага хүлээх учиртай дарга нь албан тушаал ахиж, жирийн ажилтан халагдаад өнгөрсөн билээ.

Дээрх гурван даргаас гадна Гүйцэтгэх захирлын нарийн бичиг, орчуулагч Баярсайханы Анар, Дотоод хяналтын ахлах Гангабаатарын Бямбадэлгэрэх, Дотоод хяналтын зөвлөхөөр ажиллаж байсан Батжаргалын Оргил нар сууж байна.

НУБИЭ ХХК анх үүсгэн байгуулагдахаас эхлээд Гүйцэтгэх захирлуудад орчуулагчаар ажилладаг. Гүйцэтгэх захирлуудад хамгийн ойр байж ирсэн. Энэ утгаараа одоо бүр Байгууллагын стратеги төлөвлөлтийн хэлтсийн даргын албан тушаалыг давхар хашиж, давуу эрх эдлэх болж. Үе үеийн захирлуудын нарийн бичиг, орчуулагч хүн Дотоод хяналтын өрөөнд хэлтсийн дарга нартай архидаж буй дүр зургийг чухам юу гэж тайлбарлаж болох вэ.

Батжаргалын Оргил. Дотоод хяналтын зөвлөхөөр ажиллаж байсан

Тэрбээр 2022 онд Ц.Цэвээндашын удирдаж буй Дотоод хяналтын хэлтэст “Дотоод хяналтын хэлтсийн зөвлөх” хийж байв. Хоёр жил гаруй хугацаатайгаар гэрээлэн ажиллахдаа 5,5 сая төгрөгийн цалин авч байсан нэгэн. Түүний завхруулсан, бантан хутгасан хэргүүдийнх нь тухай мэдээлэл дуулдав.

Голомт банканд теллерээр ажиллаж байсан намтартай. Б.Оргил нь дотоод хяналтын зөвлөх болмогцоо түүнийг НУБИЭ ХХК-нд авч ирсэн гэгддэг аж. Өөрөөр хэлбэл, ямар ч дадлага туршлагагүй хүнийг НУБИЭ ХХК-ийн дотоод хяналтад "чихэж" болдгийг харуулжээ. Сонирхолтой нь жил ч ажиллаагүй хэрнээ "шилдэг ажилтан" болж шагнагдаж. Энэ нь Ц.Цэвээндаш даргын таашаалд ихэд нийцсэн гэдгийг итгэнэ.

Эцэст нь, нисэхийн салбарт хамаатан садан, гэр бүл, найз нөхөдийн холбоо хамаарал буюу цус ойртолт ихэссэн гэдэг нь үнэн. Бид мөн өмнө нь Ч.Мөнхтуяа ИНЕГ-ыг түр удирдсан хугацаанд архидалт, танхайрал, үргүй зардал гаарсан тухай хөндөн хүргэж байв. Тэгвэл Ч.Мөнхтуяа, М.Төгсбаяр, Ц.Цэвээндаш нар найзууд гэдгийг доорх зургаас тодорхой харж болно.

Сэтгүүлчийн тэмдэглэл: Монгол Улсан агаарын хилийн цорын ганц боомт, онцгой обьектод сархад задлаад сууж байх нь ер нь хэр зохимжтой үйлдэл вэ. Иргэний нисэхийн аюулгүй байдал, аюулгүй ажиллагааг сахин хамгаалах үүрэг хүлээн ажиллаж байгаа хүмүүсийн дүр төрх ийм байж болох уу. Нисэхийн аюулгүй байдал алдагдаад байгаа юм биш үү. Хариуцлагын тогтолцоо байна уу.

Өмнө нь Ерөнхийлөгчийг онгоцноос буулгалгүй “гацааж”, хоёр настай хүүхдийг эрсдэлд оруулсан, есөн тэрбумын зөрчил гаргасан, бүртгэлгүй хөрөнгө завшсан, Д.Амарбаясгалан найзыгаа, Д.Батбаатар охин, дүү, хүргэнээ “чихэж”, Ц.Цэвээндаш гэр бүлээрээ “үүрлэсэн” тухай хүргэж байв. Гэтэл бахь байдгаараа асуудлууд нь үргэлжилсээр, улам бүр гаарсаар байгаа юм биш үү.

Япон менежментээр эдгээр дарга нарт хариуцлага тооцох уу эсвэл дахиад албан тушаал ахиулах уу гэдгийг харах л үлдлээ.

#1: Ерөнхийлөгчийг онгоцноос буулгалгүй “гацааж”, хоёр настай хүүхдийг эрсдэлд оруулсан М.Төгсбаяр албан тушаал ахижээ нийтлэлийн ЭНД дарж уншина уу.

#2: Хөшигийн хөндийн нисэх буудлынхан 9 тэрбумын зөрчил гаргаж, 339 саяар торгуулах хүртэл Ч.Мөнхтуяа тэргүүтэй ТУЗ-ийнхөн сохор, дүлий явжээ нийтлэлийг ЭНД дарж уншина уу.

#3: Л.Бямбасүрэнгээс 1 их наядын хөрөнгө авахдаа 1.5 тэрбумынхыг бүртгэлгүй “завшсан” нь тогтоогдсон Д.Очирсүрэн ажлаасаа гарчээ нийтлэлийг ЭНД дарж уншина уу.

#4: Хөшигийн хөндийд Д.Амарбаясгалан найзыгаа, Д.Батбаатар охин, дүү, хүргэнээ “чихэж”, Ц.Цэвээндаш гэр бүлээрээ “үүрлэжээ” нийтлэлийн ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй