Францын Ерөнхий сайд Франсуа Байру ирэх сард засгийн газарт итгэл хүлээлгэх санал хураалт явуулахаар шийдсэн нь эдийн засагт ноцтой эрсдэл авчирч байна. Итгэл үзүүлэх санал хураалтын улмаас Францын эдийн засаг уналтад орж боно гэх айдас тус улсын томоохон бизнес удирдагчдад үүсжээ.
Сөрөг хүчний намууд есдүгээр сарын 8-нд болох санал хураалтаар цөөнхийн засгийн газрыг унагах болно гэж мэдэгдсэн. Энэ нь Европын бүсийн хоёр дахь хамгийн том эдийн засгийг дахин хямрал руу түлхлээ. Тэрбээр сөрөг хүчний удирдагчидтай энэ асуудлаар хэлэлцээгүй байгаа юм. Лхагва гарагт /2025.05.27/ Байру телевизийн нэвтрүүлэгт оролцохдоо сөрөг хүчнийхэн наймдугаар сард бүгд амарч байсан тул хэлэлцэж чадаагүй гэж хэлсэн. Түүний энэ үг сөрөг хүчний удирдагчдын дургүйцлийг хүргэсэн юм. Ийм учир санал хураах хүртэл явуулах хэлэлцээ эерэг үр дүнд хүргэх магадлал бага байна.
Хэрвээ түүний засгийн газар нуран унавал Франц сүүлийн хоёр жилийн хугацаанд ерөнхий сайдаа дөрөв дэх удаагаа солих шаардлага гарах юм.
Байругийн мэдэгдлийн дараа явуулсан санал асуулгуудаар францчуудын ихэнх нь одоо шинэ парламентын сонгууль өгөх хүсэлтэй байгаа аж. Энэ санал асуулга Францад улс төрийн итгэл алдагдаж, удаан хугацааны тодорхойгүй байдлын эрсдэлийг нэмэгдүүлж буйг харууллаа.
Тус улсын хамгийн том сүлжээ дэлгүүр болох “Carrefour”-ийн гүйцэтгэх захирал Александр Бомпар “Манай ажилчдын сэтгэл зүй төрийн тогтвортой үйл ажиллагаатай салшгүй холбоотой” гэж хэлсэн байна.
Тэрбээр “Тодорхойгүй нөхцөл байдал ихсэх тусам хэрэглэгчид худалдан авалтаа хойшлуулж, эдийн засагт хүчтэй цохилт өгөх эрсдэл нэмэгддэг” гэж бизнесийн бага хурлын үеэр ярьжээ. Францын эдийн засаг хоёрдугаар улиралд 0.3 хувиар өссөн нь иргэдийн хэрэглээ сэргэсэнтэй холбоотой. Бомпар “Өсөлтийг зөвхөн хэрэглээ л тогтоон барьж байна. Тэгэхээр энэ тогтворгүй байдал эдийн засгийн уналтын эрсдэл бий болгож байгаа юм” гэж нэмж хэлсэн юм.
“Medef” ажил олгогчдын холбооны тэргүүн Патрик Мартин “Францын улс төрчид зөрчилдөөнийхөө цаана гарч чадахгүй байгаад цочирдож байна. Эдийн засгийг тоглоом шиг үзэж буй хүмүүс биднийг асар их эрсдэлтэй нүүр тулгалаа” гэж хэлсэн байна.
Сөрөг хүчний зарим нам 2026 оны төсвийн хэмнэлтийн төлөвлөгөөг нь эсэргүүцэж буйгаа илэрхийлж, итгэл үл үзүүлэх санал хураалт өргөн барихаар бэлтгэж байсан тул Байру урьдчилж санал хураалтыг өөрөө зарласан юм.
Гэвч энэ үйлдлийн улмаас сөрөг хүчин түүнийг унагахаа мэдэгдэв. Сөрөг хүчин Францын төсвийн алдагдал, гадаад өр хэт өндөр байгааг хүлээн зөвшөөрч байгаа ч асуудлыг шийдэх арга дээр Байрутай санал нийлээгүй юм.
Жилийн дотор хоёр дахь удаа ээлжит бус сонгууль явуулах уу?
Францын Ерөнхийлөгч Эммануэль Макрон огцрох, эсвэл парламентын сонгууль дахин явуулахыг удаа дараа няцаасан. Тэр даваа гарагаас /2025.08.25/ хойш энэ талаар олон нийтэд байр сууриа илэрхийлээгүй ч Байруг шинэ Ерөнхий сайдаар солих магадлал илүү нэмэгдэж байгаа бололтой.
Гэсэн ч францчуудын ихэнх нь парламентыг тарааж дахин сонгууль явуулахыг хүсэж байна. “Ifop”, “Elabe”, “Toluna Harris Interactive” зэрэг байгууллагууд тус тусдаа явуулсан санал асуулгуудаар иргэдийн 56-69 хувь нь парламентын сонгууль дахиж явуулахыг хүсэж байгаа гэх хариу гарчээ.
“Toluna Harris Interactive”-ийн судалгаагаар иргэдийн 41 хувь нь цагаачлалын эсрэг үзэлтэй, барууны популист Үндэсний нэгдэл (RN) намыг дараагийн засгийн газрыг удирдаасай гэж хүссэн байна. Энэ нь бусад намуудтай харьцуулахад хамгийн өндөр үзүүлэлт юм. Харин тус санал асуулгад оролцсон иргэдийн 59 хувь нь RN намаас Ерөнхий сайд тодрохыг эсэргүүцсэн байна. Оролцогчдын 38 хувь нь улс төрд удаан ажиллаагүй хүн Ерөнхий сайд болоосой гэж хариулсан юм.
Харин “Elabe”-ийн санал асуулгаас харвал иргэдийн 67 хувь нь Байру итгэл хүлээлгэх хураалтад унавал Макрон огцрох ёстой гэж хариулжээ. “Ifop”-ын санал асуулга ч мөн үүнтэй адилхан дүн гаргасан байна.
Засгийн газрын хэвлэлийн төлөөлөгч Софи Примасын хэлснээр Макрон лхагва гарагийн /2025.08.27/ Засгийн газрын хуралдааны үеэр парламент тараах асуудлыг хөндөөгүй, харин ч Байругийн стратегийг дэмжжээ.
Байру улсынхаа гадаад өрийг ДНБ-ий 113.9 хувьтай тэнцэх хэмжээнд хүргэж, өнгөрсөн жил төсвийн алдагдал Европын холбооны стандарт болох гурван хувиас хоёр дахин давсныг багасгахыг зорьж байгаа. Тэрбээр бүх нийтийн амралтын хоёр өдрийг цуцалж, төрийн зардлын ихэнхийг царцаах зэргээр 44 тэрбум евро хэмнэх төлөвлөгөө танилцуулсан юм.
Гэвч итгэл хүлээлгэх санал хураалт гэнэт
зарласан нь зах зээлийг огцом савлуулж, Франц
ба Италийн 10 жилийн бондын өгөөжийн зөрүүг багасгасан байна.
“Morgan
Stanley”-гийн шинжээчид “Аль ч хувилбар
(шинэ ерөнхий сайд томилох эсвэл ээлжит бус сонгууль явуулах) урт
хугацааны тодорхойгүй байдлыг дагуулна гэдгийг онцлох хэрэгтэй” гэж үзжээ
2017 онд барууны ба зүүний үзэлтэнгүүдийн хуваагдлыг давж, эдийн засгийг шинэчлэх, татварын таатай орчин бүрдүүлэх амлалтаар Макрон улс төрд гарч ирсэн. Гэвч томоохон эсэргүүцлийн жагсаал, цар тахал, инфляцын огцом өсөлт зэрэг хэд хэдэн хямрал дараалсны улмаас Францын төсвийн алдагдлын асуудлыг тэр шийдэж чадсангүй.
Ирэх есдүгээр сарын 10-нд буюу итгэл үзүүлэх санал хураалтаас хоёр хоногийн дараа, зүүний намууд болон зарим үйлдвэрчний эвлэлийн дэмжлэгтэйгээр хүмүүс эсэргүүцлийн жагсаал хийх товтой байгаа юм.
Эх сурвалж: Reuters
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.