Ө.Шижир: Хүүхдийн сургууль, цэцэрлэгийг найман жилээр хүлээлгэдэг улсын төсөв
Хичээлийн шинэ жил эхлэхтэй зэрэгцээд сургуулийн анги танхимын хүртээмжийн асуудал хөндөгддөг. Нэг ангид 50, 60 сурагч сурч байгаа нь хүүхдийн сурах эрх ноцтой зөрчигдөж байгаа. Тэгвэл энэ асуудлаар УИХ-ын гишүүн шижир байр сууриа илэрхийллээ.
Тэрбээр “2026 оны Улсын төсвийг хараад, дүгнэлт хийгээд сууж байхад Зөвхөн Боловсролын салбарт Ерөнхий боловсролын сургууль, цэцэрлэгийн үндсэн болон өргөтгөл барилгын 2-5 жил баригдаж буй төсөл 91 ширхэг, таваас дээш жил баригдаж байгаа төсөл дөрвөн ширхэг тус тус байна. Эдгээр төслүүд нь нийт дүнгээр Анхны төсөвт өртөг 639.9 тэрбум байсан бол сүүлийн төсөвт өртөг нь 732.3 тэрбум болж 92.5 тэрбум төгрөгөөр өссөн харагдаж байна.
Улсын хэмжээнд нийт 33180 хүүхдийн багтаамжтай 95 ширхэг сургууль, цэцэрлэгийн барилга хоёроос дээш жилдээ ашиглалтад орж чадахгүй хүлээгдэж байна. Ирэх жил орно гэж тооцвол гурваас дээш жил.
Задалбал Улаанбаатар хотод нийт ЕБС-ийн 6940 хүүхдийн багтаамжтай арван сургууль 3,3 жилийн барилгажилтын хугацаатай ашиглалтад ороогүй хүлээгдэж байна, ирэх жил орно гэж тооцвол 4,3 жил, орон нутагт 20 мянга 540 хүүхдийн багтаамжтай сургууль, цэцэрлэг дунджаар 2,4 жилийн барилгажилтын хугацаатай ч ашиглалтад ороогүй ирэх жилийг хүлээгдэж байна. Мөн ирэх жил орно гэж тооцвол 3.4 жил. Цэцэрлэгийн хувьд Улаанбаатарт нийт 540 хүүхдийн ортой хоёр цэцэрлэг гурав дахь жилдээ барилгажилт, орон нутагт 5160 хүүхдийн ортой 37 төсөл 3.2 жилийн барилгажилтын хугацаатай ашиглалтад ороогүй тус тус хүлээгдэж байна. Ашиглалтад орох хугацааг мөн л ирэх жил гэж тоовол 4.2 дахь жилдээ ашиглалтад орох нь.
Энэ хугацаанд төсвийн алдагдал, бүүр цаашлаад ашиглалтад ордоггүй сургууль, цэцэрлэгээ хүлээж хэчнээн хүүхэд сурах орчноор хохирч байна вэ. Үүний хариуцлагыг хэн хүлээх вэ. Хүүхэд сурч боловсрох, эрүүл аюулгүй орчинд амьдрах эрхтэй гэсэн хуулийн заалт хаачив.
320-хон хүүхдийн багтаамжтай СБД-ийн 71-р сургуулийн өргөтгөл барилга 2018 онд анх 1.5 тэрбум төгрөгийн төсөвт өртөгтэй эхэлж байсан бол нийт найман жилийн хугацаанд батлагдсан төсөвт 5.1 тэрбум болсон байх жишээ байна. Ердөө 1-2 жилд барьж дуусгах боломжтой сургуулийн барилгыг бүтэн 8 жилээр чирэгдүүлж, төсөвт өртгийг гурав дахин өсгөж байна.
Энэ мэт төсвөөс салбар салбарын үргэлжилсэн,сунжирсан, төсөв урсгасан, үнэг турж үхтэл хүлээлгэсэн төслүүд дээр дүгнэлтүүд хийж сууна. Ядаж л эхлээд сургууль цэцэрлэгийг барилгыг 1-2 жилд барьж дуусгадаг улс больё. 2000 айлын хотхоныг ганц, хоёрхон жил барьчихдаг сайд танхимд чинь сууж байхад үлгэр жишээ авал даа. Бүгдийг биш чухлыг амсуулж тавьсаар байтал аль ч үгүй болоод байна энэ улсын төсөв жил бүр“ гэлээ.
Д.ЦЭГЦ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.