Хуучин сайд нараас С.Бямбацогт Ерөнхий сайд, УИХ-ын даргын аль нэг болохоор ажиллаж эхэлжээ

Баасан гарагийн УИХ-ын чуулганы хуралдаанаар Ерөнхий сайд Г.Занданшатарыг огцруулсан. Уг асуудлыг 71 гишүүн дэмжиж, 40 гишүүн дэмжээгүй. Ийнхүү УИХ-ын гишүүдийн олонхын саналаар Г.Занданшатарын Засгийн газар танхимаараа огцорсон юм.

Мөн зэрэгцээд УИХ-ын даргаас Д.Амарбаясгалан ч өөрийн хүсэлтээр чөлөөлөгдсөн билээ.

Харин одоо дараагийн УИХ-ын дарга, Ерөнхий сайд хэн бэ гэдэг марафон алгуур ч гэлээ өрнөж эхлээд байна. Л.Оюун-Эрдэнийн Засгийн газарт багтаж байсан атлаа танхимынхаа эсрэг санал өгч, Г.Занданшатарын кабинетад шилжин ажилласан сайд нарын хувьд олон нийт мораль сануулж байгаа.

Өөрөөр хэлбэл, С.Бямбацогт, Н.Учрал, Б.Жавхлан, Б.Чойжилсүрэн, Б.Батцэцэг, Б.Дэлгэрсайхан нарын сайд нар энэ удаа, гурав дахиа улирч дараагийн танхимд үлдэх нь ёс суртахууны хувьд буруу жишиг.

Гэвч ЗГХЭГ-ын даргаар ажиллаж байсан С.Бямбацогт шууд лоббидоод эхэлжээ. Түүний хувьд Г.Занданшатарын талд асар хүчтэй ажилласан. Бүр УИХ-ын дэд дарга Х.Булгантуяаг сүрдүүлсэн ч гэгдсэн. Мөн "Наад шийдвэрт чинь Ерөнхийлөгч хориг тавина даа" гэдэг үгийг ч унагасан юм.

С.Бямбацогт одоо Ерөнхий сайд, УИХ-ын даргын аль нэг болохоор ажиллаж байгаа аж. Ерөнхий сайдыг МАН-ын Удирдах зөвлөл, Бага хурлаас нэр дэвшүүлнэ. Тэгэхээр нам дотроо ажиллах ёстой. УИХ-ын даргыг МАН-ын бүлгээс нэр дэвшүүлнэ. Энд бол С.Бямбацогт хоёр хуваагдчихаад байгаа бүлгээ хайрцаглах чиглэлд хичээх юм.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй