Камерун улс энэ сарын 12-нд ерөнхийлөгчийн сонгууль явуулсан. Санал хураалтын дүн энэ долоо хоногийн сүүлээр гарах төлөвтэй байгаа. Тэгвэл сонгуультай холбоотой хурцадмал байдал үүссэн, жагсаал явагдсаны улмаас 20 хүн баривчлагдсан байна.
Тус улсын ерөнхийлөгчийн сонгуульд дэлхийн хамгийн өндөр настай ерөнхийлөгч Паул Бияа өрсөлдсөн. Шинжээчдийн үзэж буйгаар Камеруны сөрөг хүчин тарж, бутарсан тул 92 настай Бияа дахин ялалт байгуулах магадлал өндөр. Сонгуульд сөрөг хүчний 11 нэр дэвшигч өрсөлджээ.
Сөрөг хүчний нэр дэвшигч Исса Чирома Бакари өнгөрсөн долоо хоногт сонгуульд ялсан хэмээн мэдэгдэл хийж, Бияаг ялагдсанаа хүлээн зөвшөөрөхийг уриалсан байна. Бияагийн нам үүнийг нь няцааж, сөрөг хүчин сонгуулийн үйл явцыг тасалдуулахыг оролдож байна гэжээ. Тчирома өнгөрсөн долоо хоногт мэдэгдэл хийхдээ, санал хураалтад хөндлөнгөөс оролцсоныг илтгэх шинж тэмдгүүд байна гэсэн юм.
Сонгуулийг хянасан Камеруны үндэсний эпископын бага хурал даваа гарагт /2025.10.21/ мэдэгдэл хийхдээ хэд хэдэн зөрчил бүртгэгдсэн хэмээжээ. Нас барсан хүмүүсийг сонгууль өгнө гэж бүртгэсэн байснаас гадна зарим санал хураах газрын байршлыг өөрчилсөн гэх мэт зөрчил гарсан аж.
Эх сурвалж: Associated Press
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.