Э.Бат-Амгалан: Эмч, багш, төрийн албан хаагчдад зориулсан орон сууцны төсөл хэрэгжүүлнэ

Засгийн газрын өнөөдрийн /2025.10.29/ хуралдаанаас гаргасан зарим шийдвэрийн талаар Хот байгуулалт, барилга, орон сууцжуулалтын сайд Э.Бат-Амгалан дараах мэдээлэл өглөө.

"Төрийн оролцоотойгоор баригдаж байгаа барилга орон сууцны төвлөрсөн газрууд Улаанбаатарт түлхүү бий. 2025-2028 онд ашиглалтад орох есөн байршилд нийтдээ 21694 айл өрхийг оруулахуйц төсөл хэрэгжиж буй. Үүнээс гадна манай яам дээр хэрэгжиж байгаа 5000 гаруй айлын Залуус 1,2 төслийн ажил 2026 онд эхлэх гэж байна. Дээрх төслийн борлуулалтыг Засгийн газрын хуралдаан дээр өнөөдөр ажлын хэсэг байгууллаа. Ингэхдээ, Хот байгуулалт, барилга, орон сууцжуулалтын сайд миний бие ахалж, Эрүүл мэндийн сайд Ж.Чинбүрэн, Боловсролын сайд П.Наранбаяр болон бусад сайд нартай хамтарна. Эл ажлын хэсэг 11, 12 дугаар сард Засгийн газарт ажлаа танилцуулах үүрэг чиглэл авлаа. Ингэхдээ ирэх 2-3 жилд хэрэгжих барилгын төслүүдийг эрүүл мэнд, боловсролын салбар, төрийн албан хаагч нарт зориулсан орон сууцны хөтөлбөр болгож ажиллах үүрэг чиглэл өгсөн.

Нэгдүгээрт. Ипотекийн зээлийн асуудлыг, эх үүсвэрийг хаанаас олох зэрэг асуудалд тулгуурлаж ажиллана.

Хоёрдугаарт. Эрүүл мэнд, боловсрол, төрийн албан хаагч нарын орон сууцны асуудалд анхаарна. Миний судалснаар Нийслэлийн хэмжээнд 22 мянга орчим багш, ажилчид байна. Тэдний тэн хагасад нь орон сууц нэн шаардлагатай байна" хэмээсэн юм.

Г.МИШЭЭЛ

Энэ мэдээнд өгөх таны үнэлгээ

Хуваалцаарай Жиргээрэй