Г.Занданшатарыг одоо түүний хүслээс өөр зогсоох зүйл үгүй болжээ

Г.Занданшатар. Энэ хүн 2024 оны долдугаар сард УИХ-ын даргын индрээс тойрогт нэр дэвшээд, унаж шившгээ хутгасан нэгэн болж байв. Түүнээс хойших 15 сарын дотор Ерөнхийлөгчийн тамгын газрын дарга, Ерөнхий сайд болж, эдүгээ МАН-ын дарга болох замаа өдөр хоногоор засч байна. Түүний цаадах амбиц нь 2027 оны Ерөнхийлөгчийн сонгуульд МАН-аас өрсөлдөх. Ингээд бодохоор Г.Занданшатар ер нь одоо зогсохооргүй болжээ. Бүрэн ч шийдэж.

Уур хүрсэн үед хүнээс их хэмжээний хүчтэй энерги оргилдог доо. Үүнийг эмэгтэйчүүд ашигт үйлийн коэффициент болгон хувиргаж, их хэмжээний угаалга цэвэрлэгээ хийх, жир үед барьж авч чадахгүй байсан ажлаа шууд нэг оролтоор дуусгах зэргээр ашигладаг. Хэвийн бус энэ их эрчим орхигдсон, ялагдсан байдалтай зэрэгцэхээрээ бүр ч түймрийн гал болон дүрэлздэг. Ялагдсан байр сууринаас урагшаа ийм хурдан ахиж, учир нь ерөөсөө олдохоо байж, "шийдсэн" дүр болж байгаа улс төрч өнөөдөр Г.Занданшатар байна. Одоо тэр яг ямар түймэр тавих гээд байна, яах гээд байна гэдгээ ч уншуулахаа байж, урагшаа давших болжээ.

Засгийн газар нь ер бүтэлгүйхэн эхэлж, зунжингаа унтаарч, намартаа багш эмч нарын эсрэгүүцэлтэй тулгарсан. Намрын чуулган эхлүүт огцруулах бичиг нь өргөн баригдаж, МАН-ын Бага хурал дээр PPT уншингуут заал нь тохуурхаж байсан Г.Занданашатар яаж ийгээд нөхцөл байдлыг эргүүлж чадлаа. Бага хурлаар намын даргын суудлаа алдсан даруйдаа Б.Энхбаярыг ХЗДХ-ийн сайдаар томилно гэж дуугарсан нь Г.Занданшатар сайн Сангийн сайдтай байхаас бус Эрүүгийн хариуцлага хүлээлгэдэг Хуульзүйн сайдтай болж байж, олны итгэлийг төрүүлнэ гэдгээ ойлгосон дүрийг нь гэрчилнэ.

Тэр ерөөсөө туйлгүй их "чичирч", Засгийн газраа УИХ-аар огцруулах алх цохиулсныхаа дараа ҮХЦ дээр заргалдаж, дахин ялж байж Б.Энхбаярынхаа томилгоог хийв. Б.Энхбаярын томилгоо бол Г.Занданшатарын авлигын эсрэг төрийн томчуудтай хийх тэмцлийнх нь гол сүх, алх цохиур байх нь ингэж тодорхой боллоо. Б.Энхбаяр ч яах гэж томилогдсоноо сайтар ойлгов, сайд болонгуутаа шууд Засгийн газрын ээлжит бус хурлаар Л.Оюун-Эрдэнийн хүнийг ЦЕГ-ын даргаас мулталж шидээд, Д.Амарбаясгаланг яллах тогтоол бэлэн болсныг зарлачхаж байгаа юм.

Түүний ийм шийдсэн байдал харин олон нийтийн өмнө авлига, хээл хахууль, нүүрс тойрсон бизнесээр хөлжсөн дүрүүдийг гаргаж ирж хэсэг шарах нь ээ. Улс төрийн зорилгодоо нүүрсний хулгайн сэдвийг ашиглаж байлаа ч хэдэн гэмт хэрэгтнээ шүүгээд гаргаад ирбэл өвөр түрийндээ орцгоосон энэ их ялзрал багахан ч болов ханзрах, сайн талтай.

Гэвчиг нүүрсний хулгайн акци шинэ юм биш. Тэр спикер байхдаа сонсгол хийж чадсан ч МАН-ын дотоод тохироогоор гол дүрүүдээ илээд гаргасан. Харин энэ удаа яах уу, Г.Занданданшатарт "Нүүрсний хулгай"-г цэглэсэн гэх легаси очих уу гэдгийг тэр өөрөө л шийдэх замнал руу орчихлоо.

МАН-ыг эвлэрнэ гэж бодож байна уу. Нэг талд Д.Амарбаясгалангаар нүүр хийсэн туйлгүй муйхар Л.Оюун-Эрдэнэ, нөгөө талд хамаг бүхнээрээ шийдсэн Г.Занданшатар зогсож байна. Гэхдээ МАН-ыг бүр татан буугдах хар нүх рүү оруулахгүйн тулд тэд зөвшилцөх нь тодорхой болов.

Ердөө сарын өмнө Д.Амарбаясгалантай уулзаад, "Намын дэд дарга болчих" гэж байсан хүн ингэж их улайрчихлаа. Тэр өөрөөсөө ялгарч буй энэ их уур, өшрөл, дургүйцэл, тэмцэх хүслээ 2027 оны Ерөнхийлөгчийн сонгуульд зориулан, одоо тултал ашиглана. Өөрийгөө эргэж сойх агуулга.

Харин Үндсэн хууль зөрчинө гэдгээ мэдсээр байж, өөрийнх нь хэлснээр "...ийм муухай сценариар" Г.Занданшатарыг огцруулсан Х.Булгантуяа бол ухамсарт үйлдлээр энэ бүхнийг хийсэн болж таарч байгаа. Тэгэхээр Х.Булгантуяаг УИХ-ын гишүүнээс нь түдгэлзүүлж, хорих ял өгүүлчихгүйн тулд Д.Амарбаясгалангийн тал зөвшилцөх саналд чих зөөлөн хандахаас аргагүй болов. Д.Амарбаясгалан ч тэр бух шиг улайрсан Г.Занданшатарт мэдээллийн эх сурвалж, үнэд орох элемент гэдгээрээ наймаа хийх шат руу үсрэх биз ээ. Түүн дээр хожил алдахгүй байхаа нөгөөх нь сайтар тооцоолох буй за.

Нэгэнт ҮХЦ-ийн шийдвэр гаргуулчихсан Г.Занданшатар намынхаа Удирдах зөвлөлийн хурлын үеэр "Эвлэрэхгүй" гэх агуулгаар хаалга савах хэмжээний том зан үзүүлэхээ харин ч нэг мэджээ. Ингэж тэр нүүдлээ ахиулах нь.

Өчигдөр орой тэр МАН-ын бүлгийг өөрийнхөө талд томилуулчихлаа. Х.Булгантуяаг УИХ-ын дэд даргаас буулгаж, Ж.Бат-Эрдэнийг симбол дүрд түр сойж үзүүлэв. Үе тэнгээ бодсон ч тэр, Ж.Бат-Эрдэнийг ингээд хөөрхөн ширээ дэрлүүлээд, тулхтай цорволзох нэг дүрээ нойрсуулчхаж байна. Намын болоод улс төрийн дотоод нөхцлүүд дээрээ энэ мэтээр урагшаа явах нь.

Харин гаднах орчин бол өөр. Г.Занданшатар ордноор нэг арга заль сэдэж, ойр зуурт дүрүүдээ өөртөө татсаар байхтайгаа яг зэрэгцүүлж, цонхоо нээхээс өөр аргагүй. Мянгантаа засгаа хамгаалж, МАН-ын дарга болж, Ерөнхийлөгчийн сонгуулийг мөрөөдөөд ч гаднах орчноо мартваас түүнийг шуудхан шараад идчихнэ.

Тэгэхээр тасалдах гээд байгаа эрчим хүчиний асуудал, шатахууны хомстол, эмч, багш нарын цалин, ахмадын тэтгэвэр нэмэх, элгээрээ хэвтээд байгаа ААН-үүдээ тэврэх түмэн аргыг түүнд зэрэгцүүлэх шаардлага тулгарч байна. Ерөөс Л.Оюун-Эрдэнийн гол алдаа нь, баялгийн санд хэтэрхий төвлөрч, иргэн Доржийн хөргөгчид хүнс байгаа эсэхийг мартсан, вакумжсан асуудал байсан. Энэ вакумаа хага ханзалж, улс төрийн нүүдэлтэйгээ гаднах орчноо зэрэгцүүлэх учиртай.

Багш нар дундаа Г.Занданшатар өөрөө ороод суух хэрэгтэй. Ингэнэ гэдгээ харуулах мэтээр өчигдөр багш нарын төлөөлөлтэй ямар ч байсан уулзжээ. Х.Нямбаатар талбайн жагсагчид дунд л явж байсан, үгийг нь сонсдог-бас мэтгэлцдэг сайд байв, Л.Оюун-Эрдэнийн танхимд. Одоо харин Г.Занданшатар хэнийг ч урдаа барихгүй, өөрөө гарах, өөрөө нийгмийн зөрчилтэй талууд дээрээ очих цаг нь болсон.

Одоо түүнийг ер нь өөрийн хүслээс нь өөр зогсоох зүйлгүй болжээ. Намын даргаа авч чадаж гэмээнэ, намынхан нь дэвшүүлэн зайлуулах арга хэрэглэх тулсан пойнтыг ч тэр өөртөө тооцоолсон харагдана.

Редакцын өмнөх агуулга:

Энэ мэдээнд өгөх таны үнэлгээ

Хуваалцаарай Жиргээрэй