Нэг дороос | Н.Учрал тамгаа гардан авч, үүрэгт ажилдаа орлоо

Өнөөдөр эрх баригч нам УИХ-ын даргыг тодруулах үйл явдлыг Eguur news агентлаг НЭГ ДОРООС хүргэж байна.

УИХ-ын даргаар сонгогдсон Н.Учрал тамгаа гардан авч, үүрэгт ажилдаа орлоо.

НЭМЭЛТ: 14.20 цаг

-УИХ-ын даргад Н.Учралыг томилохыг 97 гишүүнээс 80 нь ДЭМЖЛЭЭ-

Тэргүүн Шадар сайд бөгөөд Эдийн засаг, хөгжлийн сайд Н.Учралыг УИХ-д даргад томилох асуудлыг УИХ-ын чуулганы хэлэлцэх асуудлыг дарааллын хоёрт оруулж ирсэн. Ардчилсан нам эл асуудлаар байр сууриа нэгтгэхээр 14.00 цаг хүртэл завсарлага авсан юм.

Улмаар үдээс хойших хуралдааны эхэнд санал хураалт явуулахад УИХ-ын даргад Н.Учралыг томилохыг 97 гишүүнээс 80 нь ДЭМЖИЖ, 17 нь татгалзлаа. Чингэснээр, тэрбээр 82.5 хувийн саналаар УИХ-ын дарга боллоо.

НЭМЭЛТ: 10.15 цаг

-МАН-ын бүлэг УИХ-ын даргад Н.Учралыг нэр дэвшүүлэхийг дэмжлээ-

УИХ-ын даргад Тэргүүн Шадар сайд бөгөөд Эдийн засаг хөгжлийн сайд Н.Учралыг нэр дэвшүүлэх асуудлыг МАН-ын бүлэг хэлэлцэж дууслаа.

Нэр дэвшүүлэхтэй холбоотой УИХ-ын гишүүн С.Бямбацогт, Ч.Номин нар үг хэлсэн байна. Мөн УИХ-ын даргад нэр дэвшигч Н.Учрал бүлгийн гишүүдэд хандаж МАН-ын XXXI Их хурлын үр дүн болон МАН-ын шинэчлэлт, бодлогын асуудлаар мэдээлэл өгсөн аж.

МАН-ын бүлгийн гишүүдийн олонхын саналаар Н.Учралыг УИХ-ын даргад нэр дэвшүүлэх асуудлыг дэмжжээ.

НЭМЭЛТ: 09.15 цаг

-МАН-ын УЗ Н.Учралыг спикерээр 100 хувийн саналаар дэмжлээ-

МАН-ын Удирдах зөвлөл хуралдаж дууслаа. Уг хуралдаанаар УИХ-ын даргад Тэргүүн Шадар сайд бөгөөд Эдийн засаг, хөгжлийн сайд Н.Учралыг дэвшүүлэн оруулж иржээ. Улмаар Удирдах зөвлөлийн 39 гишүүн 100 хувийн саналаар дэмжсэн байна.

Одоо үргэлжлүүлэн МАН-ын бүлэг хуралдаж хэлэлцэнэ.

ЭХЛЭЛ: 08.00 цаг

-МАН-ын УЗ 08.00 цагт хуралдсаны дараа бүлгээ хуралдуулна-

Монгол Ардын намын Удирдах зөвлөл өнөөдөр /2025.11.20/ 08:00 цагаас Тусгаар тогтнолын ордонд хуралдахаар товлоод байгаа. Хуралдаанаар УИХ-ын даргад нэр дэвшигчийг тодруулах юм. Эл хурлын дараа УИХ дахь МАН-ын бүлэг ээлжит бусаар хуралдах аж.

МАН-ын шинээр бүрдүүлсэн Удирдах зөвлөл хэн байхыг эхлээд шийднэ. УЗ-д Ерөнхийлөгчийн хүмүүс жин дарж байгаа гэдгийг дээрхээс тодорхой харж болно. Одоогийн байдлаар тус намын дарга Н.Учралыг спикеэрээр тавих асуудал хүчтэй яригдаж байна.

Express Your Reaction

Share Tweet