Б.Дашдаваагаар удирдуулдаг "Цахилгаан дамжуулах үндэсний сүлжээ" ТӨХК 8.3 тэрбум төгрөгөөр "Богд дэд станц" барихад шаардлагатай тоног төхөөрөмж авах тухай тендер зарласан байна.
Тус тендерийг өнгөрсөн баасан гарагт буюу /2025-11-28/-ны өдөр зарласан бөгөөд материалыг энэ сарын 22-ны өдрийг дуустал хүлээн авахаар тусгажээ. Тус тендер дөрвөн багцтай. Багц болон түүний төсөвт өртгийг тодруулбал,
- Багц № 1: Хүчний трансформатор - 3.4 тэрбум
- Багц № 2: Анхдагч хэлхээний тоноглол - 2.7 тэрбум
- Багц № 3: Тоноглолын бетон суурь - 240 сая
- Багц № 4: Реле хамгаалалт автоматикийн байгууламж - 1.9 тэрбум
Уг тендерийн нийт өртөг болох 8.3 тэрбум төгрөгийг "Цахилгаан дамжуулах үндэсний сүлжээ" ТӨХК өөрийн хөрөнгөөс гаргахаар тусгажээ. Дээр дурдсанчлан дөрвөн багц тендерийг уг компанийн ерөнхий инженер Б.Эрхэмзаяа баталсан байна.
Үүнээс ганцхан 240 саяын өртөгтэй Багц № 3-т байгаа тоноглолын суурийн бетон хийц эдлэлүүдийг дотоодын үйлдвэрээс худалдан авах боломжтой. Харин үлдсэн гурван багцад хамаарах тоноглолыг гаднаас авна гэсэн үг.
Дотоодоос авах боломжтой суурийн бетон хийцийн эдлэлд нийт 15 нэр төрлийн 58 ширхэг тоноглол багтаж байна. Дурдвал, шугамын порталын суурь, аянга зайлуулагч цамхгийн суурь, трансформаторын САС-н суурь гэх мэт хамаарч буй юм.
Тус тендерт оролцогч компанийн санхүүгийн чадавхад дараах зүйлсийг шаардсан байна. Үүнд,
- Сүүлийн 3 жил буюу 2022, 2023, 2024 тус бүр борлуулалтын орлого нь батлагдсан багц тус бүрийн төсөвт өртгийн 100 хувиас доошгүй байна. -
- 2022, 2023, 2024 онуудын санхүүгийн тайланг өөрийн тендертээ хавсарган ирүүлэх шаардлагагүй бөгөөд цахим системээр дамжуулан Сангийн яамны цахим санхүүгийн тайлангийн www.e-balance.mof.gov.mn мэдээллийн системээс тендерт оролцогчдын санхүүгийн тайлангаас борлуулалтын орлого, болон бусад шаардлагатай мэдээллийг шалгана. Мөн сүүлийн 3 жилийн санхүүгийн тайланд хийсэн аудитын дүгнэлтийг ирүүлэх.
- Түргэн хөрвөх чадвартай хөрөнгө болон авах боломжтой зээлийн хэмжээ нь багц тус бүрийн батлагдсан төсвийн 100%-иас багагүй байна. Мөн байгууллагын дансны үлдэгдэл (Харилцагч банкны) багц тус бүрийн батлагдсан төсвийн 100%-иас багагүй байвал нотлох баримт бичиг ирүүлэх шаадлагагүй гэжээ.
Харин Тендерийн баталгааны дүн 0.5 хувьтай тэнцэхээр буюу
- Багц №1: 17,140,000.00
- Багц №2: 13,545,286.32
- Багц №3: 1,201,932.00
- Багц №4: 9,896,781.68 төгрөг байх юм байна.
Уг тендерийн дэлгэрэнгүй мэдээллийг ЭНД дарж харах боломжтой.
Нэмэлт: "Цахилгаан дамжуулах үндэсний сүлжээ" ТӨХК нь Монгол Улс дахь цахилгаан дамжуулах сүлжээг удирдаж, аюулгүй, тогтвортой, найдвартай цахилгаан эрчим хүчийг хэрэглэгчдэд хүргэх зорилготой байгууллага юм. Гүйцэтгэх захирлаар ажиллаж буй Б.Дашдаваагийн хувьд 1994 оноос хойш эрчим хүчний салбарт ажиллаж буй бөгөөд,
- 2012-2016 онд Цахилгаан дамжуулах үндэсний сүлжээ ТӨХК-ийн Улаанбаатар салбарын дарга, Техникийн бодлого, зохицуулалтын хэлтсийн дарга
- 2016-2018 онд ДЦС-4 ТӨХК-ийн тэргүүн дэд захирал бөгөөд ерөнхий инженер
- 2019-2022 онд Цахилгаан дамжуулах үндэсний сүлжээ ТӨХК-ийн Тэргүүн дэд захирал бөгөөд Ерөнхий инженер
- 2022-2023 онд Гүйцэтгэх захирлын албан үүргийг түр орлон гүйцэтгэгч
- 2023.02.03-наас одоог хүртэл Гүйцэтгэх захирлаар ажиллаж байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.