Төсвийн хөрөнгийг хувьдаа завшсан Я.Сумхүүд 2 жил хорих ял оноолоо

Таван сар Хөшигийн хөндийн бүтээн байгуулалтын захиргааны даргаар ажиллахдаа албан тушаалаа урвуулан ашиглаж их хэмжээний хохирол учруулсан Я.Сумхүүд хоёр жил хорих ял оноолоо.

Тодруулбал, Я.Сумхүү нь гүйцэтгэх захирлаар нь ажиллаж байсан “Сонголт дизайн” компанийнхаа ажилтан Д.Урангоог төслийн менежер, Ц.Урангоог график дизайнер, Б.Моломыг ус хангамжийн инженер, М.Одбаярыг инженер гэх албан тушаалд томилон тэдний данс руу 2024 оны аравдугаар сараас 2025 оны хоёрдугаар сарын хооронд 69.8 сая гаруй төгрөг шилжүүлж, тэднээс буцаан авч хувьдаа завшсан хэрэгт холбогдсон юм.

Улмаар Нийслэлийн прокурорын газраас Эрүүгийн хуулийн 22.1-2 дахь хэсэгт заасан албан тушаалаа урвуулан ашиглаж их хэмжээний хохирол учруулсан хэмээн яллах дүгнэлт үйлдсэн.

Анх “Сонголт дизайн” ХХК-ийн есөн ажилтныг Хөшигийн хөндийн бүтээн байгуулалтын захиргаанд ажилд томилон татвар төлөгчдийн мөнгөөр цалинжуулж, албан тушаалаа урвуулан бусдад давуу байдал олгосон хэмээн АТГ-т анх шалгасан байдаг. Дээрх дөрвөн хүнийг сард 4-4.5 сая төгрөгөөр цалинжуулсан нь мөрдөн шалгах ажиллагааны явцад цуглуулсан баримтаар тодорхой болсон юм.

Шүүхээс Я.Сумхүүгийн нийтийн албанд ажиллах эрхийг гурван жил хасаж, хоёр жилийн хугацаагаар нээлттэй хорих байгууллагад ял эдлүүлэхээр шийдвэрлэсэн юм. Мөн Д.Урангоо, Ц.Урангоо, Б.Молом нараас хураан авч, АТГ-ын хохирол, төлбөрийн дансанд хадгалж байгаа 10 гаруй сая төгрөгийг “20 минутын хот” үндэсний хорооны дансанд шилжүүлэхээр шийдвэрлэв.

Тус хэрэгтэй холбоотой агуулгыг Р.Эрдэнэбүрэнгийн сонгуулийн тойргоос тендер түүдэг "Сонголт дизайн" ХХК-ийн ажилчид төсвөөс цалин халааслав нийтлэлээс унших боломжтой.

О.ОНОН

Өөрийн сэтгэгдлээ илэрхийл

Share Tweet