"Доод ангийнхаа дүүд тусалж ₮260 мянгыг цуглуулж хандивт нь нэмэрлэсэн"

Өвөрхангай аймгийн нэгдүгээр сургуулийн сурагч 13 настай П.Шийрэвнямбуу тойгны ясны толгой нь 50 хувьтай хайлсан хүнд оноштой. Турк улсад эмчлүүлэх боломжтой гэсэн хариуг аван, хандивын аяныг эхлүүлээд байгаа юм байна. Түүнийг одоогоор Монголд бүрэн эмчлэх боломжгүй бөгөөд Бүгд Найрамдах Турк Улсад 140 сая төгрөгөөр эмчлүүлэх шаардлагатай болсон аж.

Тэгвэл бөх болох мөрөөдөлтэй П.Шийрэвнямбуугийн хандивын аянд Өвөрхангай аймгийн Нэгдүгээр сургуулийн 8-р ангийн "Г" бүлгийн сурагчид нэгдэж эмчилгээний зардалд 260.000 төгрөг хандивлажээ. Тэдний анги нийт 35 хүүхэдтэй бөгөөд доод ангийн дүүдээ туслахаар шийдэж хандивт нэгдсэн байна.

Энэ тухай ангийн багш А.Ганцэцэгээс тодруулахад "Ангийн багшийн хувьд санаачилга гаргаж хүүхдүүддээ хэлсэн. Хүүхдүүд маань дэмжсэн учраас эцэг эхчүүдээс нь зөвшөөрөл авсан. Эцэг эхчүүд ч мөн адил нааштай хүлээж аваад мөнгө цуглуулж эхэлсэн. Заавал нэг хүүхэд тэдэн төгрөг өг гэж шаардаагүй. Хандивт нэгдэхгүй ч байж болно. Тухайн хүүхдийн эрх учраас албадаж шаардсан зүйл байхгүй. Улмаар бүгд өөрсдийн боломжоороо, эцэг эхчүүдийнхээ тусламжтайгаар 260.000 төгрөг цуглуулсан. Надтай нийлээд 20 хүний мөнгө цугласан. Би ангиа төлөөлөөд П.Шийрэвнямбуугийн ээжтэй нь утсаар холбогдож мөнгийг нь шилжүүлсэн. Ээж нь маш их баяртай хүлээж авсан. Манай сургуулийн хувьд зөвхөн ангийнхан хүүхдүүд гэлтгүй доод, дээд ангиуд боломжоороо хандивт нэгдэж байгаа. Бид чинь нэг сургууль, нэг хамт олон шүү дээ" гэлээ.

П.Шийрэвнямбуу Хүүгийн хөл 2024 оны тавдугаар сард анх өвдөж, аймгийнх нь эмнэлэг шөрмөс сунасан гэж оношилсон байна. Эмч нар "яаралтай эмчилгээ хийлгэхгүй бол тойгны яс (сүүж) нь цаашид улам хайлж, амь насанд хүртэл аюул учруулах эрсдэлтэй" гэжээ.

Б.АЗЖАРГАЛ

Өөрийн сэтгэгдлээ илэрхийл

Share Tweet