Өрнөл: ₮6.6 тэрбумыг угаасан гэх хэргээр 83 хоног хоригдоод суллагдсан Т.Даваадалай

6.6 тэрбум төгрөгийн хахууль болон мөнгө угаах гэмт хэрэгт холбогдсон Хотын даргын орлогч асан Т.Даваадалай нийт 83 хоног хоригдоод, хилийн хоригтойгоор суллагдав. Энэ хугацаан дахь хэргийн өрнөлийг хүргэе.

Т.Даваадалай Х.Нямбаатарын нэгдүгээр орлогчоор томилогдохын өмнө төрийн байгууллагад ер ажиллаж үзээгүй. Ажлын туршлагаас нь харвал 2011-2015 онд Улаанбаатар төмөр замын ХНН-ийн туслах машинч, засварын хүлээн авагч, машинч, засварын инженерээр гараагаа эхэлж, сүүлд “Бодь” группийн R&D төвийн даргаар дөрвөн жил ажиллаад Х.Нямбаатарын дэргэд очсон намтартай нэгэн. Хөрөнгө орлогынх нь мэдүүлгийг сөхөн харвал,

• Өөрийн орлого: 2024 онд ₮525 сая | 2025 онд ₮93 сая
• Гэр бүлийн орлого: 2024 онд ₮201 сая | 2025 онд ₮262 сая
• Орон сууц, барилга, байгууламжийн үнэ: 2024 онд ₮1.2 тэрбум | ₮1.4 тэрбум
• 2024 онд автомашингүй хэмээн мэдүүлж байсан бол 2025 онд ₮65 саяын үнэтэй "BYD Song plus" загварын автомашинтай хэмээжээ
• Мөн 2025 онд ₮15 саяын үнэ бүхий үнэт эдлэлтэй, ₮200 саяын авлага, ₮2.1 саяын хадгаламжтай хэмээн мэдүүлсэн байна.

Харин хувьцаа эзэмшдэг компанийн тухайд,

2024 онд: Дава Бизнес Консалтинг ХХК ХХК, Анка Урбан Инженеринг энд Дизайн ХХК ХХК, Нью Эй Би Интернэйшнл Солюшн ХХК ХХК, 

2025 онд: Дава Бизнес Консалтинг ХХК ХХК, Нью Эй Би Интернэйшнл Солюшн ХХК ХХК

#Хотын даргын нэгдүгээр орлогчоор 1.7 жил ажилласан Т.Даваадалай яагаад баривчилж, ажлаас нь чөлөөлөхөд хүрсэн бэ?

|2026.04.25| ЭЦА-наас Т.Даваадалайгийн гэрт нэгжлэг хийж, 27-нд 48 цагийн хугацаатайгаар цагдан хорьсон. Түүнийг, эхнэрийнхээ болон эхнэрийнхээ үеэл дүүгийн үүсгэн байгуулсан ААН-д 5.6 тэрбум, эхнэрийнхээ найзын үүсгэн байгуулсан хоёр ААН-д 709 сая, түүнчлэн эхнэрийнхээ 50 хувийг эзэмшдэг ААН-д 47.9 сая, нийт ₮6.6 тэрбумыг угаасан байж болзошгүйгээр шалгасан. 

|2026.04.29| Хотын даргын нэгдүгээр орлогчийн ажлаа хүлээлгэн өгөв.

|2026.05.22| АТГ-аас түүнийг гэмт хэргийн нотлох баримтыг устгах, дахин гэмт хэрэг үйлдэж, гэрч, хохирогч зэрэг бусад хэргийн оролцогч нарт нөлөөлж болзошгүй гэдэг үндэслэлээр цагдан хорьж, таслан сэргийлэх арга хэмжээ авхуулах саналыг шүүхэд хүргүүлснээр нэг сарын хугацаатайгаар цагдан хорих болов.

|2026.05.29| АТГ-аас Т.Даваадалай, Н.Билгүүн нарын хэрэгт хамаарах Нийслэлийн төсөл хөтөлбөрийн 30 дансны ₮2.6 их наядыг царцаасан тухай мэдээллийг олон нийтэд өгсөн юм. Мөн эл өдөр Т.Даваадалайгийн өмгөөлөгчийн зүгээс цагдан хорих таслан сэргийлэх арга хэмжээг өөрчлүүлэх хүсэлт гаргасан ч шүүх хүлээж аваагүй.

|2026.06.03| Т.Даваадалайгийн дүү, "Улаанбаатар метро" төслийн захирал Т.Мөнхдалайг АТГ-аас саатуулж, |2026.06.04|-нд нэг сарын хугацаатайгаар цагдан хорих шийдвэрийг шүүхээс гаргав.

|2026.06.17| Т.Даваадалайгийн цагдан хорих хугацааг нэг сараар сунгаж шийдвэрлэв.

|2026.07.23| Т.Даваадалайн цагдан хорих хугацааг дахин 15 хоногоор сунгав.

|2026.08.04| АТГ-аас Т.Даваадалай нь өөрийн хамаарал бүхий этгээд буюу эхнэр Б.А-ийн үүсгэн байгуулсан аж ахуйн нэгжээр дамжуулан хийх ёсгүй үйлдэл хийснийхээ хариуд 2025 оны 4 сарын 9-ний өдрөөс мөн оны 10 дугаар сарын 27-ны өдөр хүртэлх хугацаанд 5.2 тэрбум төгрөгийн хахууль авсан, гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авч ашиглан, мөнгө угаасан гэх мөрдөн шалгах ажиллагааг дуусгаж, шүүхэд шилжүүлэх саналтай прокурорт хүргүүлсэн.

|2026.08.07| Үргэлжлүүлэн 15 хоног цагдан хорих хугацаа |2026.08.06|-ны өдөр дуусаж, маргааш нь буюу энэ сарын 07-ны өдөр суллагдсан байна. Ингэхдээ Монгол Улсын хилээр гарах эрхийг хязгаарлах, хязгаарлалт тогтоох таслан сэргийлэх арга хэмжээ авч сулласан юм. Одоогийн байдлаар прокурорын байгууллагаас түүнийг үргэлжлүүлэн хорих саналыг шүүхэд хараахан хүргүүлээгүй байна.

Түүний холбогдсон хэргийн хуулийн заалт, ял шийтгэл

22.4 дүгээр зүйл.Нийтийн албан тушаалтан хахууль авах

1.Нийтийн албан тушаалтан хахууль өгөгчийн ашиг сонирхлын үүднээс албаны чиг үүргээ хэрэгжүүлсний хариуд, эсхүл хэрэгжүүлэхийн тулд, эсхүл хэрэгжүүлээгүйн хариуд, эсхүл хэрэгжүүлэхгүй байхын тулд, эсхүл гүйцэтгэх ёсгүй үйлдлийг хийсэн, эсхүл хийхийн тулд шууд, эсхүл бусдаар дамжуулан хахууль өгөхийг шаардсан, авсан бол нийтийн албанд ажиллах эрхийг хоёр жилээс найман жил хүртэл хугацаагаар хасаж хоёр жилээс найман жил хүртэл хугацаагаар хорих ял шийтгэнэ.

2.Энэ гэмт хэргийг хясан боогдуулах аргаар үйлдсэн, эсхүл их хэмжээний хахууль авсан бол нийтийн албанд ажиллах эрхийг таван жилээс найман жил хүртэл хугацаагаар хасаж таван жилээс арван хоёр жил хүртэл хугацаагаар хорих ял шийтгэнэ.

3.Энэ гэмт хэргийг улс төрд нөлөө бүхий этгээд, эсхүл зохион байгуулалттай гэмт бүлэг үйлдсэн бол нийтийн албанд ажиллах эрхийг бүх насаар хасаж арван хоёр жилээс хорин жил хүртэл хугацаагаар хорих ял шийтгэнэ.

18.6 дугаар зүйл.Мөнгө угаах

1.Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан; түүний хууль бус эх үүсвэрийг нь нуун далдлах, гэмт хэрэг үйлдэхэд оролцсон аливаа этгээдэд хуулийн хариуцлагаас зайлсхийхэд туслах зорилгоор өөрчилсөн, шилжүүлсэн; түүний бодит шинж чанар, эх үүсвэр, байршил, захиран зарцуулах арга, эзэмшигч, эд хөрөнгийн эрхийг нуун далдалсан бол зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ.

2.Энэ гэмт хэргийг:

• 2.1.энэ хуулийн тусгай ангид хорих ялын доод хэмжээг таван жилээс дээш хугацаагаар тогтоосон гэмт хэрэг үйлдэж олсон хөрөнгө, мөнгө, орлого болохыг мэдсээр байж;
• 2.2.байнга тогтвортой үйлдэж;
• 2.3.албан тушаалтан албаны чиг үүрэг, бүрэн эрх, нөлөөг урвуулан ашиглаж үйлдсэн бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

3.Энэ гэмт хэргийг зохион байгуулалттай гэмт бүлэг үйлдсэн бол таван жилээс арван хоёр жил хүртэл хугацаагаар хорих ял шийтгэнэ.

4.Энэ гэмт хэргийг хуулийн этгээдийн нэрийн өмнөөс, хуулийн этгээдийн ашиг сонирхлын төлөө үйлдсэн бол хуулийн этгээдийг тодорхой төрлийн үйл ажиллагаа явуулах эрх хасаж нэг зуун хорин мянган нэгжээс дөрвөн зуун мянган нэгжтэй тэнцэх хэмжээний төгрөгөөр торгох ял шийтгэнэ.

Өөрийн сэтгэгдлээ илэрхийл

Share Tweet