АНУ-ын Тусгай ажиллагааны хүчин, Тэнгисийн цэргийн корпусын бүрэлдэхүүн Тайваньд дотоодын цэргүүдийг нууцаар сургаж байгаа гэж АНУ-ын өндөр албан тушаалтнаас иш татан “The Wall Street Journal” /WSJ/ агентлаг мэдээлэв.
Эх сурвалжийн мэдээлснээр, АНУ-ын тусгай ажиллагааны 20 орчим алба хаагч Тайванийн хуурай замын цэргийн цөөн тооны анги бүрэлдэхүүнд цэргийн сургалт хийж байгаа гэв. Мөн америкийн тэнгисийн цэргүүд Тайванийн тэнгисийн цэргийнхэнтэй хамтран ажиллаж байгаа гэнэ. Эх сурвалжаас тодруулахад, АНУ-ын арми Тайваньд хамгийн багадаа нэг жилийн өмнөөс байршиж байгаа аж.
Цагаан ордон, Пентагоны удирдлагууд Тайваньд АНУ-ын цэргийнхэн байгаа тухай мэдээлэлд ямар нэгэн тайлбар өгөхөөс татгалзсаныг “The Wall Street Journal” онцолжээ.
Өмнө нь, БНХАУ үүсгэн байгуулагдсан ойн өдрөө аравдугаар сарын 1-нд тэмдэглэн өнгөрүүлсэн бөгөөд Тайванийн ойролцоо БНХАУ-ын нисэх хүчин агаарын хил зөрчсөн талаар барууны хэвлэл мэдээллийн хэрэгслүүд мэдээлж байсан. Ийнхүү аравдугаар сарын 4-ний даваа гарагт Тайванийн нэг талаас зарласан агаарын довтолгооноос хамгаалах бүсэд БНХАУ-ын Агаарын цэргийн хүчний 56 онгоц ниссэн тухай Тайванийн эрх баригчид мэдээлэв. Нийтдээ даваа гараг болон даваа гарагаас өмнөх гурав хоногийн хугацаанд эх газрын Хятадын цэргийн 148 нисэх онгоц Тайванийн бүс нутагт хамаарах агаарын орон зайд нэвтрэн орсон гэж тайланд дурьджээ.
АНУ-ын Төрийн Департаментаас БНХАУ-ын ийм гэнэтийн үйлдэлд маш их санаа зовж буйгаа илэрхийлж, өдөөн хатгасан үйлдэл хэмээн буруутгав. Үүнтэй холбоотойгоор Тайванийн Батлан Хамгаалах Хэлтсийн дарга Цю Гожэн хэлэхдээ 2025 он гэхэд Бээжин Тайванийн асуудлыг цэргийн хүчээр шийдвэрлэхэд бүрэн бэлэн болсон гэв.
Тайванийг тойрсон асуудал 1949 онд БНХАУ-ын Коммунист Нам үүсгэн байгуулагдсанаа зарлан тунхаглаж Гоминьданы намын нэг хэсэг Тайванийн арал дээр суурьшсан цагаас эхтэй. Харин Бээжин “нэг Хятадын зарчим” гэх үзэл баримтлалыг батлан мөрдөж үүний хүрээнд Тайвань дахь БНХАУ болон БНХАУ гэсэн хоёр тусдаа улсыг хоёуланг нь хүлээн зөвшөөрөх боломжгүй гэж үзсэн. Үүний зэрэгцээ бараг бүх томоохон улсуудад Тайбэй хотын албан бус соёл, эдийн засгийн хэлтэс бий болсон.
Тайвань болон Хятадын харилцаа Тайванийн Засаг захиргааны тэргүүнээр Гоминьданы тэргүүн Ма Инжю ажиллаж эхэлсэн үеэс 2008-2016 оны хооронд эрс сайжирсан түүхтэй. Гэсэн хэдий ч, Цай Ин Вэнь 2016 онд Тайванийн Засаг захиргааны даргаар ажиллах болсноос хойш Бээжин Тайваньд цэргийн дарамт үзүүлэх нь улам ихэссэн билээ.
(Эх сурвалж: Interfax)
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
ЗӨВ ЗҮЙТЭЙ