Г.Сайханбаяр ЗГ-аа "давж", Ж.Энхбаярын чиглэлээр “Восток 2022” цэргийн сургуулилтад оролцжээ

Өнгөрөгч долоо хоногийн сүүлээр Ж.Энхбаяр, Г.Сайханбаяр нарын тарьсан хэрэг олон улсын түвшинд улс орны чих халууцуулж, дотоодод маргаан дагуулав.

Тодруулбал, Сайд Г.Сайханбаяр ОХУ-аас Куриллын арлуудтай холбоотойгоор Япон Улсад сануулга өгөхөөр явуулсан “Восток 2022” цэргийн хээрийн сургуулилтад монгол цэргүүдийг оролцуулсан явдал.

Хамгийн хачирхалтай нь:

Нэгдүгээрт, Засгийн газар мэдээгүй байхад ҮАБЗ-ийн нарийн бичгийн дарга Ж.Энхбаяр толгой мэдэн шийдвэр гаргаж, Г.Сайханбаярт чиглэл өгөөд явуулчихсан гэх яриа ихээхэн анхаарал татах өнцөг болов.

Хоёрдугаарт, Гадаад харилцааны яам нь “Энэ удаагийн цэргийн сургуулилтад оролцож болохгүй” гэсэн зөвлөмж өгсөөр байхад салбарын сайд нь Засгийн газрын бодлогоос сөрсөн үү гэх асуулт эндээс үүсч буй.

Х.Баттулга Ерөнхийлөгч байхдаа ҮАБЗ-ийн нарийн бичгийн даргын эрх ямбыг: ҮАБЗ-ийн гишүүд бүрэн эрх, чиг үүргээ хэрэгжүүлэхэд нь туслах, тэднийг үндэсний аюулгүй байдлын талаарх судалгаа, мэдээллээр хангах, зөвлөлийн ажлын албаны дарга, дэд дарга, Стратеги судалгааны хүрээлэнгийн захирлыг томилж, чөлөөлөх, зөвлөлийн хуралдаанд оролцож, Зөвлөлийн шийдвэр, тэмдэглэлийн төслийг боловсруулах гэхчлэн хэдэн хэдэн зүйлээр зааж өгчээ.

Харин У.Хүрэлсүх Ерөнхийлөгч болоод ҮАБЗ-ийн нарийн бичгийн даргын эрх ямбыг: төрийн өндөр албан тушаалтны зэрэг зиндаа, хангамж, нөхцөлөөр хангагдаж, Ерөнхийлөгч, УИХ-ын дарга, Ерөнхий сайдыг төлөөлж аль ч байгууллагад чөлөөтэй нэвтэрч, хүлээгдэлгүй уулзах дархан эрхтэй болгосон байдаг.

Ямартай ч Ж.Энхбаярт ҮАБЗ-ийн нарийн бичгийн даргын эрх ямбад цэрэг хөдөлгөх, гадаад харилцааг дур мэдэн шийдвэрлэх нэг ч үг өгүүлбэр байхгүй.

Харин Засгийн газрын гишүүн Г.Сайханбаярт “Засгийн газрын гишүүний үүргээ чиг шударгаар биелүүлэхээ тангараглая. Миний бие энэ тангаргаасаа няцвал хуулийн хариуцлага хүлээнэ” хэмээн өргөсөн тангараг бий.

Тэгэхээр эрх ямбаа хэтрүүлэн ашиглаж хар хайрцагны бодлогоо үл хүндэтгэсэн, олон улсын тавцанд улсаа нүүр хийх газаргүй болгосон, Засгийн газраасаа давж шийдвэр гаргасан тэд өөрийн амаар тайлбар хийх шаардлагатай байна. Түүний дараа хариуцлагын асуудал зүй ёсоор хөндөгдөх буй за.

Ж.Энхбаярын хувьд: Цэргийн нэгдсэн дээд сургууль, МУИС-ийг дүүргэсэн эрх зүйч мэргэжлээр төгсөөд 2008 оноос хойш гурван удаа УИХ-ын гишүүнээр сонгогдож ажилласан. 2020 оны УИХ-ын сонгуульд өөрийн хүсэлтээр нэр дэвшихээс татгалзаж, Ерөнхий сайдаар ажиллаж байсан У.Хүрэлсүхийн Ахлах зөвлөхийн албыг хаших сонголтыг хийсэн. У.Хүрэлсүх Ерөнхийлөгчийн тангараг өргөсөн даруйдаа түүнийг ҮАБЗ-ийн нарийн бичгийн даргаараа авч ирсэн. Эл албан тушаалдаа ирээд нэг жил гурван сар болж байна.

Г.Сайханбаярын хувьд: 2020 оны сонгуулийн дараа У.Хүрэлсүхийн Засгийн газарт Батлан хамгаалахын сайдаар анх орж ирсэн. Сая Засгийн газрын бүрэлдэхүүнд өөрчлөлт орох дүйвээнээр Ерөнхийлөгч У.Хүрэлсүхийн гуйж үлдээсэн таван сайдын нэг. Мөн зарлиг гаргаж, генерал цол олгосон таван хүний нэг.

Өөрийн сэтгэгдлээ илэрхийл

Share Tweet