Хөтөлийн “Цемент шохой” үйлдвэрийг Л.Наранбаатар зогсоож, С.Бямбацогт чичилсний учир

Өнгөрөгч амралтын өдрүүдэд Зам тээврийн шинэ сайд С.Бямбацогт ажилдаа ороод юун түрүүнд Дарханы замыг зорив.

Тэр зам дээр зорчиж ирээд хар шөнөөр “Хөтөлийн цемент шохой үйлдвэр” цемент нийлүүлэхгүй тасалдсанаар замын ажил саатах гол шалтгаан болоод байгаа” гэх утга бүхий пост бичсэн юм.

Сайдын хариулт болгож “Монполимет” группийн ТУЗ-ийн дарга Н.Мөнхнасан Дарханы замд 235 вагон буюу 15,500 тонн цемент өнөөдрийг хүртэл тасралтгүй нийлүүлсээр байгаагаа бичсэн. Ингэснээр Дарханы замд Монцемент гол ачааллыг нь үүрч байгаа ч, гуравдугаар сараас хойш вагон хангалтын асуудал сайжраагүй гэсэн билээ. Эл мэдэгдлээс хувийн хэвшлүүд нь тодорхой хэмжээний ачаалал үүрэлцээд мачийж буй ч, төрийнх нь байхгүй гэж дүгнэж болохоор байгаа юм.

Харин С.Бямбацогт сайд яагаад гэнэт “Хөтөл цемент шохойн үйлдвэр”-ийг чичлэхэд хүрэв гэдэг асуулт гарч ирж буй.

Уг нь “Хөтөл цемент шохой” үйлдвэрийг хувийн хэвшлээс хураасан эзэн нь Л.Оюун-Эрдэнийн Засгийн газар. Засгийн газрын гишүүн болсон С.Бямбацогт уг нь төрд авсан өмч рүүгээ ноцож дайрмааргүй байлтай. Үүний цаана эрх ашиг чухалзаж байгаа юу, замын асуудалд санаа зовсон сайдын зовнил уу гэдэгт учир бий.

-С.БЯМБАЦОГТ САЙДЫН ЗЭМЛЭЛ ЭРХ АШГИЙН ҮНЭРТЭЙ ЮУ-

НЭГДҮГЭЭРТ: Түүнийг эрх ашгийн үүднээс ийн чичилж байгаа хэмээн хардагсад бий юм. Учир нь сайдаар томилогдсон даруйд түүнийг цементийн буюу дэд бүтцийн үйлдвэртэй тул ашиг сонирхлын зөрчилтэй хэмээж байв. Энэ удаад ч эл хардлага адилхан. Түүний чичлэлт Дарханы зам дээр цемент нийлүүлэгчийн халаа солио оруулах уу гэх утга.

Тэрбээр баруун аймгуудыг хямд цементээр мөдхөн хангана гэх үгийг үргэлж амнаасаа унагааж ирсэн нэгэн билээ.

Түүний дүү нар болох С.Баянмөнх, С.Баянчулуун, С.Балжинням нарын нэр дээр бүртгэлтэй "Нью прогресс" групп нь монголын дэд бүтцийн салбарт үйл ажиллагаа явуулж буй үндэсний томоохон бүтээн байгуулагч групп компани юм. Харин тус группийн бодлогыг С.Бямбацогт гишүүн тодорхойлж, түүний дүү нар удирддаг гэх нь бий.

-ҮЙЛДВЭР ДӨНГӨН ДАНГАН АЖИЛЛАЖ, 10-Р САРААС “ТЭГ ЗОГСОЛТ” ХИЙХ ЭРСДЭЛТЭЙ БАЙНА-

ХОЁРДУГААРТ: “Хөтөлийн цемент шохой үйлдвэр” чухам яагаад Дарханы зам дээр цемент нийлүүлэлт хийж чадахгүйд хүрсэн гэдэг нь сайдын хөндсөнөөр бодит асуудал уу.

Энэ дагуу бид тус үйлдвэр ажиллаж байгаа эсэхийг сураглалаа.

Ингэхэд эх сурвалжуудын мэдээллээр “Тус үйлдвэрийн үйл ажиллагаа яг ч зогсчихоогүй. Дөнгөн данган ажиллаж байгаа. Ингэж ажиллаж байгаагаа засвар үйлчилгээний ажил хийж байгаа” хэмээн ажилчдадаа тайлбарлан өдөр хоногийг аргацааж байгаа аж. Мөн дарга нь алдаг оног ажилдаа ирж байгаа гэх сураг ч байна.

Ноцтой нь: Нөхцөл байдал яг өнөөдрийн түвшинд цааш үргэлжилбэл ирэх аравдугаар сараас үйлдвэр тэг зогсолт хийх эрсдэлтэй байгаа аж.

Бидэнд олдсон нэмэлт мэдээллээр тус үйлдвэрийн Л.Наранбаатар захирал цалингаа бүрэн бүтэн өгөхөө больсон гэх.

Учир юу гэвэл, “Хийж бүтээснээр нь буюу гүйцэтгэлээр нь үнэлж цалинжуулна” гэх шинэхэн дүрэм журмыг цалингийн системдээ мөрдлөг болгож эхэлжээ.

-ЗАХИРАЛ Л.НАРАНБААТАР СУРАГГҮЙ-

“Цементийн үнийг бут цохино” уриатай гарч ирсэн Л.Наранбаатар “Хоосон ам, шалдан гуя” гэгч нь болчихов уу. Дарханы замын цемент тасалдуулсан хэргээр салбарын сайдадаа өчигдөр /2022.09.05/ зэмлүүлсэн сурагтай.

Ажилд томилогдсон цагаасаа “өм төллөө, шуудайтай боллоо, цалингаа тавилаа” хэмээн попорч байснаас бусдаар үйлдвэр нь ямар нөхцөл байдалд байгаа талаар гарч ирээд нэг ч үг цухуйлгаж байсангүй. Хэвлэлд ч хариу өгдөггүй. Хаалттай хөшиг татсан.

Өөрийн сэтгэгдлээ илэрхийл

Share Tweet