Цалин ба энерги: Ажлын амжилт гаргахад туслах 10 зоосны дүрэм

Фэн-Шүй-гийн тусламжтайгаар хэрхэн өндөр цалинтай ажилд орох вэ?

Ажилд орохынхоо өмнө эхлээд танд чухам ямар ажил мэргэжил энергийн хувьд тохирох, зохих эсэхийг олж мэдэх хэрэгтэй. Өндөр цалин хөлстэй л бол ямар ч хамаагүй ажил танд тохирно гэсэн үг биш юм. Ажил мэргэжлийн тань энерги таны хувийн энергитэй тохирч, зохицож байх нь маш чухал зүйл. Тэгсэн тохиолдолд таны ажил төрөл ч тэр, ахуй амьдрал чинь ч баяр баяслаар дүүрэн байж, та сэтгэл санааны хувьд өөдрөг сайхан байна гэсэн үг. Бид үүнийг л хүсдэг шүү дээ.

Ажиллах эрч хүч буурах үзэгдэл чухам юутай холбоотой байдаг вэ?

Зарим нэг аж ахуйн нэгж, байгууллага, компанийн ажил урагшлахгүй, ажлын идэвхи нь буурсан тохиолдол болгон ихэнхидээ энергитэй шууд холбоотой байдаг аж. Ялангуяа, байгалийн үзэгдэл, Дэлхий ертөнцийн эрчим, энергийн ерөнхий өөрчлөлт, хувьсалтай шууд холбоотой байдаг ажээ.

Тиймээс ажлын эрч хүч, идэвхийг дээшлүүлэхийн тулд ажлын байр, оффисын дотоод засал чимэглэл, эсхүл тавилга зэргийг өөрчилж байх явдал маш чухал нөлөөтэй.

Ханын цаасны өнгийг солих, тавилгын байршлыг өөрчлөх, мөн шинээр эд хогшил авчирч тавих гэх мэт. Тохирсон өөрчлөлтийг хийхийн тулд тухайн албан тасалгаа, оффист шинжилгээ хийсний дараа хийнэ. Фэн-Шүй-н тусгай мэргэжилтэн ч юм уу, салбарын бусад мэргэжилтнүүдээс заавар зөвлөгөө аваарай.

Ажлын байр, оффист аз, амжилтын уур амьсгалыг хэрхэн бүрдүүлэх вэ?

Ажлын байр, оффис дахь – АЗ, АМЖИЛТ – бол ажилтан бүрийн тухайн ажилд тохирсон эсэх энергиэс хамаарна. Түүнчлэн, тухайн ажлын байр, оффисын хэсэг бүрийн энергийн зохицлоос бас шалтгаална. Энэ тохиолдолд хүмүүсийн энерги тухайн ажлын байр, оффисын энергитэй таарч, тохирсон уур амьсгалыг бүрдүүлснээр АЗ, АМЖИЛТ-ыг дуудаж байдаг.

Гэхдээ үүнийг яаж хийх вэ, гэдэг бол маш чухал бөгөөд бас нэлээд нарийн төвөгтэй асуудал. Фэн-Шүй-гийн нэлээд сайн ойлголттой, бас ажлын дадлага, туршлагатай байх шаардлагатай. Таагүй байдлаас гарахын тулд ажлын байр, оффисыг хэсэг, тасгуудаас бусад бүх хэсгийг бүхэлд нь шинэчлэх явдал юм. Зөвхөн шинэчлээд ч зогсохгүй, компанийн байршил зэргийг өөрчлөн, өөр газарт нүүж очсон ч болно. Үүнээс гадна, ажиллах хүмүүсийг ч зөв сонгох нь чухал. Ажлын баг хамт олныг зөв бүрдүүлэх нь маааш чухал. Тухайн ажлын энергитэй тохирсон энергитэй хүмүүсийг ажилд авна гэсэн үг. Харин энэ бүхнийг зөвхөн тусгай мэргэшсэн хүмүүсийн зөвлөгөө, нарийвчилсан судалгаан дээр үндэслэн хийнэ. Энэ нь нарийн төвөгтэй, хугацаа шаардсан ажил байдаг болохоор компанийн удирдлагууд, ажилтнууд хийхээс төвөгшөөн, тэр болгон Фэн-Шүй-н дүрэм, зөвлөгөөг дагаж мөрддөггүй. Гэхдээ л та үнэхээр л ажил төрөл, бизнес тань өөдтэй, урагштай байгаасай гэж бодож байгаа л бол мэргэжлийн зөвлөхүүдэд хандаад үзээрэй. Үр дүн нь дорхноо л анзаарагдана шүү!

ФЭН-ШҮЙ-ГИЙН АЛТАН ЗООСНЫ 10 ДҮРЭМ

Таны ажлын байр, оффисын нөхцөл байдлыг тань дээшлүүлж, ажил төрөл, бизнестээ амжилт олоход тань туслах ашигтай 10 зөвлөгөөг ийнхүү санал болгоё.

ЗӨВЛӨГӨӨ НЭГ.

Ажлын ширээгээ аль болохоор орох, гарах хаалганы эгц өөдөөс харуулан тавих хэрэггүй. Хэрэв ширээ тань хаалганы эгц өөдөөс харсан байвал хаалгаар орж, гарах хүн болгон зөвхөн танаас л янз бүрийн зүйл асууж, лавлан, гуйлт эсвэл үүрэг даалгавар өгч, таны хийх ажил тань нэмэлт ажилд дарагдана гэсэн үг.

Энэ байдлаас гарах ганц арга бол – ширээгээ ялимгүй хажуу тийш нь болгоорой.

ЗӨВЛӨГӨӨ ХОЁР.

Та ширээнийхээ ард суухад чинь орох, гарах хаалга танд харагдаж байх ёстой.

Өөрт ногдсон үүрэгт ажлаа ямар нэгэн саадгүйгээр, анхаарлаа төвлөрүүлэн хийхэд тань энэ зөвлөгөө туслана. Танд хаалга харагдаж байвал, та аюулгүй байдлыг мэдрэх болно. Учир нь, бидэн рүү дөхөн ирж буй хүмүүсийг харж чадахааргүй орчинд байвал, бид байгалиас заяасан инстинкт буюу зөн совингоороо ямар нэгэн байдлаар айдас мэдэрч, байнгын түгшүүртэй байдалд байдаг юм.

ЗӨВЛӨГӨӨ ГУРАВ.

Таны ширээний ардуур хүн явах зайгүй байх ёстой. Хэрэв таны ардуур хэн нэгэн явж өнгөрөх нь таны анхаарлыг сарниулж, дургүйцлийг хүргэнэ.

Мөн л байгалиас заяасан зөн совингоо даган, байнгын түгшүүртэй байдалд байна.

ЗӨВЛӨГӨӨ ДӨРӨВ.

Ажлын байр, оффисоо өөр бусдын хараанаас байнга хамгаалж байх хэрэгтэй.

Бусдын хараанд өртөн, нээлттэй байх нь таныг таагүй, эвгүй байдалд оруулдаг. Танд таагүй биш санагдавч, бидний далд ухамсар таагүй байдлыг мэдэрч байдаг. Эвсэг, найрсаг хамт олны дунд ажиллаж байсан ч хамаагүй хаалга үүдээ аль болохоор л байнга хаалттай байлгаарай.

Мөн ширээгээ хамтрагчийнхаа ширээтэй ойрхон байрлуулах хэрэггүй. Бас л таагүй, тухгүй эвгүй мэдрэмж төрнө. Ширээ хоорондын зай хол байх тусам та ч тэр, хамтрагч чинь ч тэр аюулгүй байдлыг мэдэрч, ажлаа сайн хийнэ шүү.

ЗӨВЛӨГӨӨ ТАВ.

Гэрэл гар дээр чинь шууд тусаж байх хэрэгтэй. Тиймээс ширээний чийдэн аваад, яг таны гарын эгц дээрээс гэрэл тусч байхаар тохируулаарай. Сүүдэртэх нь ажил хийхэд тань саад болно.

ЗӨВЛӨГӨӨ ЗУРГАА.

Ажлын байр, оффисоо байнга цэвэрхэн байлгаарай. Бүх булан, тохой цэвэрхэн байх ёстой шүү. Хайрцаг, шүүгээ, шургуулганд байгаа хэрэггүй бичиг баримт, цааснуудаасаа байнга салж байгаарай. Хэрэгтэй бичиг баримттай хавтасыг нүдэнд ил харагдах газарт байлгаарай. Хаалга үүднийхээ ард хэрэггүй цаас, бичиг баримт тавьсан бол хаяарай.

ЗӨВЛӨГӨӨ ДОЛОО.

Ажлын өрөөний утас, эсхүл гар утсаа аль болохоор нүдэнд ил харагдахуйц бас гарт ойр газар тавиарай. Утсаар их ярих шаардлагатай ажил эрхэлдэг бол мэдээж гарынхаа хажууд тавих нь зөв. Биднээр хэлүүлэлтгүй мэдэж байгаа байх л даа. Гэхдээ л “хүн хэлэхээс наашгүй” гэдэг дээ.

ЗӨВЛӨГӨӨ НАЙМ.

Таны хэрэглэдэг ажлын материал (үзэг, цаас, бал, дэвтэр) гэх мэт зүйлийг ширээнийхээ дээд шургуулганд ил хийгээрэй. Аль болохоор өөрт ойрхон байлгаснаар та ажлын цагаа хэмнэх болно. Өөрт ойр биш өөр шүүгээ, саванд хийснээр та цагаа алдах болно.

ЗӨВЛӨГӨӨ ЕС.

Ажлын байр, оффисын өрөөндөө ваартай (савтай) цэцэг тавиарай.

Цэцэг ургамлын байдал таны байдалтай шууд холбоотой ургадаг юм. Учир нь, тарьж буй эсхүл ургуулж буй цэцэг “эзэн”-тэйгээ энергийн хувьд холбоотой болдог юм. Цэцэг тань гундуу байвал, таны ажил төрөл, амьдрал ахуйд ямар нэгэн асуудал үүсч эхэлдэг. Цэцэг тань сайхан ургаж, дэлгэрч байгаа бол таны ажил ч урагш ахицтай байгаагийн илрэл.

ЗӨВЛӨГӨӨ АРАВ.

Тухайн өдрийн ажлын цаг дуусч, ажил тарах болгонд ширээн дээрх тоос, шороо, хогийг цэвэрлэж хэвших хэрэгтэй. Зөвхөн ширээ гэлтгүй бусад тоос, шороог ч бас цэвэрлээрэй. Хүн ер нь муухай зүйл, замбараагүй байдалд хурдан дасдаг шүү дээ. Ажил дээр чинь гаднаас хүмүүс ирэх үе ч юм уу, эсхүл хурал цуглаан хийх тохиолдолд л цэвэрлэгээ хийх нь элбэг. Ажлын байр, оффис дахь эмх замбараагүй байдал, тоос, шороонд дарагдсан байдал ажлын эрч, хүч, идэвхи зэрэгт сөргөөр нөлөөлдөг болохыг бид тэр болгон мэддэггүй, бас тэр болгон ач холбогдол өгдөггүй шүү дээ. Тиймээс энд өгүүлсэн бүх зөвлөгөөг дагаж мөрдөхийг хичээгээрэй.

Ажил дээр байгаа хэрэггүй хог хаягдал, бичиг цааснаасаа салж, ажлын байр, оффисын өрөөгөө сайхан болгоорой. Ингэх нь гоо зүйн талаасаа ч сайн байхаас гадна, эрүүл мэнд, сэтгэл санаа (психологи)-ны хувьд ч танд тустай гэдгийг санаарай.

Энэхүү зөвлөгөөнүүдийг уншаад, дагаж мөрдвөл таны ажиллах эрч хүч тань нэмэгдэж, амжилтанд хүрэх зам тань нээгдэх болно.

Танд ажлын өндөр амжилт хүсье!

О.АНАР

(Эх сурвалж: elle.ru)