В.Путины “тархи”, Евразизмын эцэг Александр Дугин

ОХУ-ын эрдэмтэн Александр Дугины охин Дарья Дугина Москвагийн ойролцоох зам дээр өнгөрсөн бямба гарагт автомашинтайгаа дэлбэрч амиа алдсан талаар барууны том гэсэн бараг бүх хэвлэлүүд мэдээллээ.

ВВС зэрэг томчууд хүртэл энэ мэдээллийг топ хэсэгтээ байршуулжээ. Тэдгээр нийтлэлүүдэд Дарья Дугина гэхээсээ илүү эцэг Александр Дугинтай хамт явж байсныг онцолж, “Александр Дугин гол бай байсан уу” гэхчлэн бичсэн байна. Тэгэхээр, барууны хэвэлүүдийн анхаарлын төвд орсон энэхүү Александр Дугин гэгч хэн бэ гэдгийг танилцуулахаар бэлтгэлээ.

Маш товчоор хэлбэл, Александр Дугин бол одоо ОХУ-ын дагаж мөрдөж, хэрэгжүүлэхээр зүтгэж буй Евро Азийн холбооны үзэл санааны суурь Евразизм гэх үзлийг хөгжүүлэгч юм. Коммунизм нурж, капитализм хүчгүйдэж байгаа энэ үед ялангуяа ОХУ-ын хувьд зам мөрөө шинээр тодорхойлох зайлшгүй шаардлага үүссэн. Дээрх хоёрроос яавч ялгаатай байж таарах шинэ үзэл санаа, онол оросуудад хэрэгтэй байсан бөгөөд тэр нь А.Дугины олон жилийн өмнөөс сонирхон судалж, хөгжүүлж байсан Евразизм болсон юм. "Еврази үзэл" хэмээх ойлголт нь 20-р зууны эхэн үеийн философийн үзэл санаанаас улбаатай бөгөөд Зөвлөлт Холбоот Улсаас хойшхи орон зайн нэгдмэл байдал, түүний хөгжлийн барууны бус, онцгой зам юм.

Шинэ үзэл санаа нь ОХУ-ын гүрний ашиг сонирхолд ч онцгой нийцсэн учраас В.Путины сонирхлыг татсан нь тодорхой. Сүүлийн үед дуу хоолой нь улам чангарч, манай улс хүртэл зарим үйл ажиллагаанд нь татагдан ороод буй Евро Азийн гэх тодотголтой бүтцүүд чухам энэ Евразизм, А.Дугинтай салшгүй холбоотой.

В.Путин “Евро-Азийн холбоо”-ны хөгжлийн үзэл баримтлалын тухай алдартай нийтлэлээ  2011 оны аравдугаар сарын 5-нд Ерөнхий сайд байхдаа “Известия” сонинд гаргаснаар үзэл санаа амьдрлал дээр хэрэгжих нь тодорхой болсон гэж үздэг.  

“Евро-Азийн холбоо” нь Тусгаар тогтносон улсуудын хамтын нөхөрлөлийн орнуудтай цаашид нэгдэж, нэгдсэн нэг гаалийн холбоо болон эдийн засгийн шинэ орон зайг үүсгэх, Тусгаар тогтносон улсуудын хамтын нөхөрлөлийн орнуудын бүс нутгийн интеграцчилалын явцын үе шатыг ахиулж, эцэст нь гишүүн улсын байгууллагын бүрэн эрхтэй дүйцэхүйц хэмжээний улсуудын холбоог байгуулахаар шийдвэрлэсэн байлаа.

Холбооны төвд ОХУ байх бөгөөд Евро-Азийн холбооны удирдагчийн үүрэг гүйцэтгэнэ. Тухайн үед В.Путины танхиндаа зурсан төсөөллийн Евро Азийн холбоонд ОХУ, Беларус, Казакстан, Армен, Киргизстан зэрэг хуучин ЗХУ-ын таван “стан” байсан бөгөөд бүгд нийлээд Ази, Номхон далайн бүс нутагт нөлөөлөхүйц том холбоог үүсгэх учиртай байв. Энэ бол үндсэндээ ЗХУ-ыг шинэээр зохион байгуулна гэсэн үг байсан юм.

Анхны тэр нийтлэлд Евро-Азийн холбоог үүсгэх гол хүчин зүйл болох Евро-Азийн эдийн засгийн холбоог 2015 оноос албан ёсоор үйл ажиллагаагаанд оруулж, урьдчилсан тооцоогоор 2025 онд бараа бүтээгдэхүүн, үйлчилгээ, санхүү, ажиллах хүчний чөлөөт урсгалыг бий болгон, Европын холбоотой дүйцэхүйц эдийн засгийн холбоог байгуулахаар төлөвлөсөн талаар дурдсан байдаг.

Энэхүү нийтлэлийг В.Путин л бичсэн болохоос концепцийг нь А.Дугин боловсруулсан гэж үздэг. Барууны хэвлэлүүдэд А.Дугиныг нэг бус удаа “В.Путины тархи” хэмээн цоллосон нь ийм учиртай. В.Путины судалгааны сэдвийг нь шүүрч авснаар А.Дугин К.Маркс, Ф.Ницще нартай зэрэгцэж, онол, үзэл баримтлалаа амьдрал дээр турших боломж олсон цөөн сэтгэгчдийн нэг болсон юм. Ардчилал мухардаж, улс орнууд тус бүртээ цаашид хөгжих үзэл баримтлалаа боловсруулж эхэлсэн үе ч таарсан.

А.Дугин өнгөрсөн арванхоёрдугаар сард Евразийн Геополитикийн форумд оролцохдоо “Өнөөдөр бодит байдал дээр бид юу харж байна вэ? В.Путин Ши Жиньпинтэй хамтран Их Евразийн төслийг тунхаглаж байна... Бидний нүдний өмнө Римланд төсөл Евроазийн төсөл болон хувирч байна" хэмээн онцлон тэмдэглэжээ.  

ОХУ-ын Евро-Азийн холбоо болон БНХАУ “Нэг бүс-Нэг зам” санаачилгын стратегийн хамтын ажиллагааны уялдаа нь асар өргөн ирээдүйтэй юм. Торгоны замын эдийн засгийн бүс нь ОХУ-ын эдийн засгийн хүндийн төвийг зүүн тийш нүүлгэж Сибирь болон Алс дорнодын бүс рүү чиглүүлэн Ази болон Европын эдийн засгийн зөрүүтэй байдлыг арилгахад Евро-Азийн холбоог үүсгэн байгуулсны гол ач холбогдол оршино гэж үзэж байна. Арктикийг эзэмших тэмцэл сүүлийн үед эрс хурцадсан нь ч үүнтэй холбоотой юм.

Энэ мэдээнд өгөх таны үнэлгээ

Хуваалцаарай Жиргээрэй