О.Цогтгэрэл өөрийн дүрмээр "тоглоно"

Ардчилсан намын шинэ дүрэм Улсын дээд шүүхэд бүртгэгдсэнээс хойш АН-ын ЕНБД, дэд дарга нарыг чөлөөлөгдсөнд тооцдог болсон. Өөрөөр хэлбэл О.Цогтгэрэлийн намын дарга гэх албан тушаалаас бусад бүх албан тушаал хүчингүй болсон гэсэн үг.

Хэдхэн жилийн өмнө л хоёр дарга, хоёр тамгатай болж хагарч бутарч байсан АН 2025 онд бутарсан шаазан шиг байдлаа зугуу зугуухан эвлүүлэх гэж үзэв. Пүрэв гарагт АН-ын дарга О.Цогтгэрэл хийсэн мэдэгдэлдээ намаа анхан шатны нэгжээс нь авхуулаад бүрэн шинэчлэхээ зарласнаас гадна генсекээ ч нэрлэчхэв.

АН-ын Ерөнхий нарийн бичгийн даргын үүрэг гүйцэтгэгчээр УИХ-ын гишүүн Д.Ганбатын сонгуулийн менежерээр хэд хэдэн удаа ажиллаж, гаргаж ирж байсан нэгэн аж. АН дотор генсекээр Н.Ганибалыг улираана гэх яриа нэвт шувт явсан. Гэхдээ нөгөө талд АН дотор фракцуудын ашиг сонирхлыг тэнцүү хуваарилна гэдэг О.Цогтгэрэлд сорилт. Тэр юутай ч Улсын дээд шүүх намын шинэчилсэн дүрмийг батлахыг хүлээж байсан нь ч илт байв.

АНУ руу консулаар явсан АН-ын дарга асан С.Эрдэнэ Монголд ирчихсэн яваа нь томилгооны марафоноос хоцрохгүй гэснийх биз.

Тэр жил АН тамгаа ч, даргаа ч хоёр болгож бужигнуулахад С.Эрдэнийн үүрэг ч өндөр байсан. Нэгэнт Л.Гантөмөрийн нам дотроо хэн хэнд нь гэнэ алдахгүйг хичээж эхийг нь эцээхгүй, тугалыг нь тураахгүй гэдэг арга барилыг одоогийн АН-ын дарга тэнцүүлж явна гэвэл барахгүй юм болно. Гэсэн ч түүнд тал талын шахалтууд удтал ирсний ард тэр битүү хүн гаргаж ирж, нам доторх фракцууддаа өөрийн байр сууриа илэрхийлээд авав.

Нэгэнт Улсын дээд шүүх шинэчилсэн дүрмийг баталсны араас АН-ын тэргүүн дэд дарга, дэд дарга нар болон Улс төрийн зөвлөлийн гишүүд ч мөн чөлөөлөгдөж байна. Үндэсний бодлогын хорооны хуралдаанаарр уг албан тушаалтнуудыг томилох дүрэмтэй.

Ирэх хоёрдугаар сарын 1-ээс Ардчилсан нам 170 мянган гишүүнээ шинэчлэн бүртгэх ажлыг эхлүүлэх бөгөөд энд намын анхан шатнаас авхуулаад сонгуулийн ерөнхий процесс, тактикийг гадарладаг туршлагатайгаар нь одоогийн Д.Амарбаясгаланг генсек болгосон гэж намын зарим гишүүд нь ярьж буй. Гэхдээ 4-р сарын 1-ний дотор АН ИХ хурлаа хийж, шинэ бүтцээ батламжлах бөгөөд үүгээр одоогийн генсекийг жинхлэх эсэх нь шийдэгдэнэ. Энэ бол О.Цогтгэрэлийн халаасанд хав дарагдах хөзөр.

Намын дарга нь бүлгийн даргаа хийсэн ч болохгүй зүйлгүй гэх байр суурь илэрхийлж байсан О.Цогтгэрэлийн хувьд намын дотоод сонгуулиас өмнө бүтцийн шинэчлэл дээрээ гол хүчээ хаяж, хүчирхийллийн хэргүүдэд нэр холбогдоод буй намын гишүүдийнхээ асуудлыг ч авч үзэж, намынхаа нэрийг цэвэрлэх биз. АН-ын хуучин болон шинэ гишүүддээ Democracy passport олгож, цахимжуулах аж.

4-р сарын 7, 8-нд АН-ын Их хурлыг хуралдуулж, шинэ бүтцээ батламжилж, их хурлаас албан ёсны Үндэсний бодлогын хороо болон Ерөнхий нарийн бичгийн дарга, Улс төрийн зөвлөлийн гишүүдийг томилох бөгөөд 5-р сараас АН 2027 оны буюу Монгол Улсын Ерөнхийлөгчийн сонгуулийн бэлтгэл ажил, дотоод сунгааг зохион байгуулах юм.

Энэ бол О.Цогтгэрэлийн хувьд АН-ыг УИХ-ын сонгуульд зэхүүлэхээс өмнө намдаа ерөнхийлөгчийн суудлыг олж өгнө гэдэг том амлалт өгчихөж байгаа хэрэг.

Тэр Г.Занданшатарын Засгийн газар хамтралын гар сунгахыг хүлээх эс бөгөөс сөрөг хүчний тасралтгүй шүүмжлэлээр бөмбөгдөж, улмаар томоохон хэлцлийг нь цуцлуулах, засгийг огцруулах зэрэг акцуудыг нам дотроосоо идэвхтэй явуулж буй.

АН нэгдмэл гэдэг ойлголтыг намын залуу гишүүдээрээ байнга яриулж, хагаралгүй бүтэн намын имижээ ч тээж яваа. 2004 оны УИХ-ын сонгуулийн дараах АН-ын хуваагдал тухайн үед улс төрийн хүрээнд хамгийн ичмээр үйл явдал болсон бөгөөд мөн л тамганы хэрүүл дэгдэж, өөрсдийн Ерөнхий сайдаа татан унагаж байсан гашуун түүхтэй.

Иймээс өнөөдрийн АН-д Ерөнхийлөгчийн, УИХ-ын гээд хоёр сонгуулийн сорилт урд бий учир О.Цогтгэрэл нэгэнт саналын давуугаар намын даргын тамгаа атгасных өөрийн дүрмээр тоглохоо зарлаж эхэллээ.

2025 онд МАН өөрийн Д.Амарбаясгаланг "алдаж", 2026 онд харин АН өөрийн Д.Амарбаясгаланг олж авав.

Тэд МАН дотор хөлөө чангалах тактикийг Д.Амарбаясгалан хэрэгжүүлж байсан шиг АН дотор үүнийг гүйцэтгэж чадах хүнээр анхан шатнаас нь дунд шат хүртэл ажилласан, сонгуулийн менежерийг томилж харууллаа.

Засгийн газарт хамтарч, дунд шатны даргын суудал нам дотроо горилж сууснаас сөрөг хүчний дүрээ улам тодотгож, сонгуулийн пи ар хийхээр АН эрс шулууджээ. Гэхдээ үүнээс наана АН доторх фракцуудын томилгооны өрсөлдөөн хэдийнээ эхэлчихсэн нь мэдээж.

Т.БАТСҮРЭН

Өөрийн сэтгэгдлээ илэрхийл

Share Tweet