БНАСАУ-ын төрийн албаныхан шинээр төрсөн хүүхдэд Жу Аэ гэдэг нэр өгөхийг хориглож, нэгэнт ийм нэртэй болчихсон хүмүүсийг нэрээ солихыг албадах болжээ. Учир удирдагч Ким Жон Ун охиноо Жу Аэ гэж нэрлэсэнтэй холбоотой гэж БНСУ-ын koreatimes.co.kr цахим хуудаст бичсэн байна.
Уг мэдээллийн анхдагч эх сурвалж болох “Чөлөөт Ази” радиод БНАСАУ-д амьдардаг нэрээ нууцалсан эх сурвалж "Хойд Пёнган мужийн Чонжу хотын Аюулгүй байдлын хэлтэс хоёрдугаар сарын 8-нд Жу Аэ нэртэй эмэгтэйчүүдийг дуудаж, нэрээ солихыг тушаасан" гэх мэдээллийг өгсөн гэнэ.
БНАСАУ-д удирдагчийнхаа нэрийг энгийн иргэдэд өгөхийг цээрлэдэг уламжлал бий. Тодруулбал, БНАСАУ-ыг үндэслэгч Ким Ил Саны үед Ил Сан, , Ким Жон Илийн үед Жон Ил, одоогийн удирдагч Ким Жон Уны үед Жон Ун нэрийг хориглож иржээ.
Ингэхдээ төрийн эрх мэдлийг авахаас ч өмнө эхлүүлдэг учраас нэр хориглолт нь нэг ёсондоо ирээдүйн удирдагчийг багцаалах боломж, тахин шүтэх үзлийг эхлүүлэх нэг арга гэж тооцогддог юм байна.
Өөрөөр хэлбэл, Ким Жон Уны охин, 10 орчим настай Жу Э охин БНАСАУ-ын ирээдүйн удирдагч байж магадгүй аж. Тус улсын хэвлэлүүд сүүлийн үед Жу Аэг нэрээр нь бус, "Эрхэм охин", "Хүндэт охин" гэх зэргээр бичих болжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.