Түр хороо дахин байгуулж, Н.Ганибалаар ахлуулах Т.Доржханд гишүүний тохуурхал

Өнгөрөгч даваа гарагт УИХ дахь АН-ын бүлэг хуралдаж дуусаад мэдээлэл хийсэн. Энэ үеэр УИХ-ын гишүүн Н.Ганибал "нүүрсний сонсголыг Г.Ганболд гишүүн МАН-ын дарга нарынхаа даалгавраар хийгээгүй. Мөн Т.Доржханд явуулахгүй гэдэг санал өгсөн" тухай мэдээлсэн билээ.

Тэгвэл өнөөдөр /2023.06.15/ УИХ-ын гишүүн Т.Доржханд Н.Ганибал гишүүний хийсэн мэдэгдлийн хариуд дараах зүйлсийг ярилаа.

Тэрбээр, "АН-ын бүлгийн хурлынхаа дараа мэдээлэл хийх үеэрээ МАН-ынхан, тэгээд ХҮН намаас Т.Доржханд нар нүүрсний сонсгол хойшлуулсан мэтээр ярьж, буруу мэдээлэл өгч байна лээ. Сонсгол хийсэн нэр төдий болоод өнгөрөх юм уу. Эсвэл бүгдийг нь байлцуулж байгаад асуудлын ард хамтдаа гарах юм уу. Би хоёр дахь хувилбартай нь санал нэгдэнэ. Сонгол заавал хийх ёстой.

Өнөөдөр зөвхөн нүүрсний хэрэг дээр ажиллах түр хороо байгуулъя гэдэг төсөл боловсруулаад байж байна. Энэ хаврын чуулганаар амжихгүй бол намрын чуулганд багтаана. Түр хороо байгуулаад Н.Ганибал гишүүнээр ахлуулъя. Шүүмжилдэг хэрнээ гар бие оролцдоггүй. Маш амархан байдлаар төсөөлөөд байх шиг байна. Асар олон тооцоолол хийх санхүүгийн схемүүд бий" гэлээ.

Товчхондоо бол тохуурхал. Энэ удаагийн нүүрсний хэргийг хянан шалгах түр хороо бүтэн нэг жил ажилласан. Гэвч сонсгол хийх нь битгий хэл хэрхэн ажилласан, юу уншиж судалсан тайлангаа ч тавиагүй байж байгаад татан буугдах хугацаагаа өнгөрүүлсэн. Энэ хугацаанд АН, МАН, ХҮН намаас ямар ч гишүүн шахаж шаардаагүй. Бүрэн эрхийн хугацаа дууссаны дараа Н.Ганибал гишүүн МАН-ын дарга нарын захиалгаар сонсгол хийгдээгүй хэмээн тавласан. Өнөөдөр Т.Доржханд гишүүн дахин түр хороо байгуулъя хэмээн тохуурхаж зогсоо юм.

Энэ мэдээнд өгөх таны үнэлгээ

Хуваалцаарай Жиргээрэй