Г.Батцэнгэл толгой компани руу томилогдож, "Энержи ресурс"-ийг Д.Энхбат удирдана

Арванхоёрдугаар сарын 30-ны өдөр "Энержи ресурс" компанийн Гүйцэтгэх захирал Г.Батцэнгэл өөрийн хүсэлтээр ажлаа хүлээлгэн өгч буйгаа мэдэгдсэн.

Тэгвэл тэрбээр "Энержи ресурс"-ийн толгой компани руу шилжин томилогдож байгаа аж. Харин оронд нь "Юнител"-ийн Д.Энхбат "Энержи ресурс"-ийг удирдах нь.

Тодруулбал, "Энержи ресурс" нь "Mongolian Mining Coproration" компанийн охин компани юм. "Mongolian Mining Corporation"-ийг Люксембургт бүртгэлтэй "Mongolian Coal Corporation" 100 хувь эзэмшиж байна. Харин тус компани "Баруун наран" нүүрсний ордыг эзэмшдэг "Хангад эксплорейшн", Тавантолгой, Баянхөндийн төслийг удирддаг "Энержи ресурс" болон импорт, экспортын БНХАУ-ын хөрөнгө оруулалттай "Тяньжин Жэнчэнь" гэсэн компаниудтай гэсэн "ургийн мод" бий.

Г.Батцэнгэлийн хувьд олон жил "Энержи ресурс"-ийг удирдсан. Харин одоо засаглалын хувьд өгсөж, "Mongolian Mining Corporation"-д удирдах алба хаших юм байна. Үүний яриа хэлэлцээр 5-6 сар үргэлжлэх хуулийн хугацаатай байсан бөгөөд ажлаа өгөх огноо нь оны өмнө таарчээ.

"Mongolian Mining Corporation"-д MCS-ийн Ж.Оджаргал, Ж.Од нар хувьцаа эзэмшдэг.

Харин "Энержи ресурс"-ийн Гүйцэтгэх захирлаар "Юнител групп"-ийн СЕО асан Д.Энхбат томилогдоно гэсэн мэдээлэл бий юм.

М.ТЭНГИС

Энэ мэдээнд өгөх таны үнэлгээ

Хуваалцаарай Жиргээрэй