Хакүхог тойрсон дуулиан: Монголчууд голлодог Миягино дэвжээний галыг япончууд таслах уу

Япон орны үндэсний нь гол спорт гэж болмоор сүмогийн дэвжээнд монголчууд хаанчилсан он жилүүд саяхан, одоо ч тэнд монгол сүмочдийн халаа тасраагүй байна.

Харин Хакүхо Шо буюу М.Даваажаргал иргэншлээ сольж, Японд нэгэнтээ суурьшихаар шийдсэн. Нэг ёсондоо сүмогийн ертөнцөд өнгөрүүлсэн амьдралдаа итгэл төгс үлдсэн юм. Монгол иргэншлээс татгалзсан явдал нь монголчуудад олон янзын сэтгэгдэл үлдээсэн байх. Сүүлийн үед түүний хариуцсан дэвжээний сүмоч Хокүсэйхо А.Даваанинжэд холбогдох мэдээ, мэдээллүүд цацагдаж, Хакүхогийн дэвжээг хаах эсэх асуудал яригдаж байна.

Японы хэвлэл мэдээллийн байгууллагууд энэ талаар шуурч байна гэх. Энд бас тодорхой хэмжээнд ажиглацгааж байна, үйл явдлыг.

Хамгийн сүүлд Хакүхог нэгэн монгол эмэгтэйтэй гэр бүлээс гадуурх харилцаатай болсон гэдэг мэдээлэл түглээ.

Энэ мэдээллийн эх үндсийг хөөж үзвэл moneytalk.tokyo, love-all.jp, ameblo.jp гэх мэт блог маягийн сайтуудад тулж очиж байна.

Тэнд Хакүхог М нэртэй монгол эмэгтэйтэй амрагийн харилцаа үүсгэсэн гэж бичжээ. Moneytalk.tokyo дээр 2017 оны арванхоёрдугаар сарын 6-нд нийтэлсэн блог дээр Шүкан Бүншүн (週刊文春, Weekly Bunshun) нэртэй сонин Хакүхо болон түүний амрагийн зургийг олж авсан гэж мэдээлсэн талаар бичсэн аж.

Харин love-all.jp блогийн 2021 оны нийтлэлд Шүкан Бүншүн 2015 оны тавдугаар сарын 7-н болон 14-нд гаргасан дугаартаа Кюүшү дэх Рицүмэйкан Ази Номхон далайн их сургуульд сурдаг М нэртэй хүнтэй амрагийн харилцаа үүсгэсэн гэж мэдээлж байсан талаар дурджээ.  Мөн өмнө дурдсан Шүкан Бүншүн сонин 2017 оны арванхоёрдугаар сарын 7-нд нийтлэгдсэн дугаартаа Хакүхо болон түүний амрагийн харилцаатай эмэгтэйн зургийг цацсаныг онцолжээ.

Нэг ёсондоо Шүкан Бүншүн сонинд 2015, 2017 онуудад нийтлэгдсэн мэдээллийг дээрх блогууд авч тавьсан болж таарч буй. Харин Шүкан Бүншүний дугаарууд онлайн байдаг юм байна. Түүгээр бол, дээр дурдагдаад буй

• 2015 оны тавдугаар сарын 7 ба 14-ний дугаар нь ямар нэг текстгүй
• 2017 оны арванхоёрдугаар сарын 7-ны дугаар нь тексттэй бөгөөд “Хакүхогийн амрагийн хоёр зураг” гэсэн мэдээ маягийн бичвэр багтсан байх аж.

Шүкан Бүншүн нь 1959 онд байгуулагдсан Токио хотод үйл ажиллагаа явуулдаг сонин юм.

Хамгийн сүүлд шинэ мэтээр буусан энэ мэдээллийг шалгахад л аль 2015, 2017 онд нийтлэгдсэн сонины мэдээ байх жишээтэй. Түүнийг нь бас 2021 онд өөр блог сайтууд эш татан мэдээлсэн нь эдгээр өдрүүдэд халуун сэдэв болсон байх юм.

Үндсэн юм руугаа оръё. Энэ бол Японд Хакүхогийн тэргүүлдэг Миягино дэвжээг хаах тухай асуудал юм.

“Postseven” гэдэг Японы сэтгүүл энэ талаар бичихдээ “Хакүхог унасан дээр нь дэвсэж, Миягино дэвжээг хаах санаархал явж байна” гэж онцолсон нь анхаарал татсан юм. Нарийн дэгтэй газар хатуу журамтай. Хакүхогийн дэвжээний бөх Хокүсэйхо А.Даваанинжийн сүмочдийг дэглэсэн асуудал сөхөгдсөний дараа үүнд тулгуурлан, Миягино дэвжээг сулруулах үйл ажиллагаа явуулж буй талаар дурдсан нь анхаарал татсан юм.

Хокүсэйхо А.Даваанинж дэвжээний бөхчүүдээ дэглэх дэглэхдээ нэг дор 20 бургер идэхийг тулгадаг, нурууг нь цавуудаж наадаг гэхчлэн балмад үйлдлүүд гаргадаг талаарх эш үндэс султай мэдээлэл мөн цацагдсан.

Энэ нь өндрөө авч, Хакүхогийн Миягино дэвжээг цаашид хэн удирдах вэ гэдэг асуудалд хөтөлсөн.

Хоёрдугаар сарын 23-нд сүмо бөхийн холбооны Удирдах зөвлөл хуралдаж, Хокүсэйхо А.Даваанинж болон Миягино дэвжээний багш Миягино Ояката нарт шийтгэл оноосон юм. Үүгээр Миягино Ояката хоёр зэрэглэл буурч, цалингаа хасуулсан. Дэвжээний удирдлагаас албан ёсоор чөлөөлсөн, тэр Миягино дэвжээг одоо удирдахгүй.

Энд нэг зүйл тодотгоход, Миягино бол Хакүхогийн удирдаж байсан, саяхан Хокүсэйхогийн хэргийн улмаас болиод буй дэвжээ. Миягино Ояката гэж Хакүхог хэлж байгаа юм.

Тэгвэл хэн удирдах вэ.

Сүмо бөхийн холбооноос бол Исэгахама галын аль нэг оякатагаар удирдуулах шийдвэр гаргасан байна.

Энэ тал дээр “SevenPost” сэтгүүл,

“Миягино дэвжээнд туслах ояката Магаки бий. Дээд зиндаанд барилдаж байсан. Түүнд дэвжээ удирдах зөвшөөрөл өгсөнгүй. Шалтгаан нь, зургадугаар сарын 1-нд зодог тайлна, магэ үснээсээ салаагүй байгаа тул болохгүй гэсэн. Гэвч үсээ авхуулаагүй үедээ дэвжээ удирдсан тохиолдол цөөнгүй л байдаг.

Харин Исэгахама галд цөөн ояката бий. Залуу эсвэл, оякатагийн лиценз зээлсэн хүмүүс” гэжээ.

Үүнд нэг учир байна.

Дэвжээг удирдуулахгүй гэсэн Магаки Ояката нь Хокүсэйхо А.Даваанинжийн төгссөн Тоттори Жёохорү сургуулийн дасгалжуулагчийн хүү аж. Чухам энэ шалтгаанаар түүнд зөвшөөрөл өгөөгүй гэх. Учир нь Хакүхо тус сургуулиас Миягино дэвжээнд бөх авдаг уламжлалтай. Өөрөөр хэлбэл монгол залуус, “Хакүхо цом” тэмцээнд амжилт гаргасан хүүхдүүд энэ замаар Миягино дэвжээнд ирдэг юм байна.

Тэгэхээр Магаки Ояката дэвжээ удирдвал энэ уламжлал тасрахгүй. Харин таслахын тулд Магакиг дараагийн удирдлага болгохгүй,  Исэгахама галаас ояката авчирна гэж шийдсэн хэмээх өнцөг дурдагджээ.

Иймд өмнө нь ижил зам туулсан Кисэ, Касүгаяма дэвжээний нэгэн адилаар Миягима хаагдах, цаашлаад өөр дэвжээнд нэгдэх юм уу, бөхчүүдийг нь тараан хуваарилах үйл явц өргөх магадлалтай гэнэ.

Хоёрдугаар сарын 24-нд удирдах зөвлөл хуралдахын өмнө Миягино дэвжээг хаах санал ч гарсан талаар мэдээлэгдсэн. Харин хэрэг тарьчихаад буй Хокүсэйхо А.Даваанинжийн хувьд хэдийнэ зодог тайлах хүсэлтээ өгчхөөд байгаа.

Миягино дэвжээ бол сүмогийн ертөнцөд монгол хүчтэнүүдийн замыг засдаг газар. Хакүхо энэ дэвжээний багш болсноор энэ галыг таслахгүй байх эх оронч гэмээр үүрэг хүлээсэн байв. Үүнд нь УИХ-ын дарга Г.Занданшатар нараас эхлээд манай төрийн томчууд ч баяр хүргэж, амжилт хүсэж байсан удаатай.

Бусад бөхчүүдээ дэглэдэг, балмад үйлдэл гаргадаг гэх Хокүсэйхо А.Даваанинж нь өдгөө дөнгөж 22 настай. 204 см өндөр, 182 кг жинтэй. Ирээдүйн ёкозүна гэгдэж байсан юм. Дэвжээний бусад бөхчүүдийн гомдлоор хэрэг шалгагдсан, улмаар Хокүсэйхо өөрөө зодог тайлах хүсэлт гаргасан зэргийг харвал энэ гүтгэлэг биш бололтой.

Харин үүний далимд, Хакүхо буюу Миягино Оякатагийн дэвжээ удирдах эрхийг болиулсан нь хатуудсан шийтгэл байлаа. Өмнө нь хэвлэлүүд зүгээр л торгох, башё өнжих шийтгэл оноох болов уу хэмээн мэдээлж байсан. Гэвч орлох хамгийн боломжтой Магакиг ояката болгохоос татгалзсанаар ерөөс монголчуудын амжилт гаргадаг Миягино дэвжээний ирээдүй хавчигдсан явдал болов.

Энэ мэдээнд өгөх таны үнэлгээ

Хуваалцаарай Жиргээрэй