Мартагдсан амлалт: LRT тээврийг хоёр жилийн өмнө эхлүүлэхээр зарласан ч "замхарлаа"

Хотын дарга асан Д.Сумъяабазар 2022 онд хөнгөн галт тэрэгний LRT төслийг санаачилж, энэ хавар ашиглалтад оруулна хэмээн мэдэгдсэн ч замхраад байна.

Эргэн санабал, 2022 оны улсын төсвийн тодотголоос хамгийн анхаарал татсан сэдэв нь Улаанбаатар хотод барьж, байгуулах хөнгөн галт тэрэг буюу LRT төсөл байв. Тус төслийн зээлийн санхүүжилтэд Засгийн газраар баталгаа гаргуулахаар Сангийн яам оруулж ирсэн юм.

Харин УИХ-ын гишүүдийн байр суурь хуваагдсан. Улаанбаатар хотын тойргоос сонгогдсон гишүүд төслийг дэмжсэн бол Ч.Хүрэлбаатар тэргүүтэй гишүүд эсэргүүцсэн байдаг. Улмаар МАН-ын бүлгийн хуралдаанаар тус төслийг судлах ажлын хэсэг байгуулсан.

Ажлын хэсэг 14 хоногийн турш ажиллаж, LRT төслийг дэмжин үргэлжлүүлэх эсэхэд нэгдсэн шийдвэр гаргахаар болсон. Тус ажлын хэсэгт,

• Д.Тогтохсүрэн
• Э.Бат-Амгалан
• Х.Булгантуяа
• С.Бямбацогт
• Б.Жавхлан
• Х.Нямбаатар
• Ж.Сүхбаатар
• Ч.Хүрэлбаатар
• Н.Энхболд нар багтсан.

Харин энэ төслийн гол тоглогч хотын дарга асан Д.Сумъяабазар. Тэрбээр сонгуулийн өмнө буюу энэ хавар хөнгөн галт тэргийг ашиглалтад оруулна гэж зүтгэсэн ч амжилт ололгүй замхарсан.

Товчоор тайлбарлавал, Хан-Уул дүүргийн Буянт-Ухаа хорооллоос БЗД-ийн Сансарын тойрог хүртэл нийт 18.1 км үргэлжлэх хөнгөн галт тэрэг зорчих бүтээн байгуулалтын ажил юм. Одоогоор энэ хооронд зорчигч нийтийн тээврээр 120 цаг явж байгаа бол үүнийг 40 минут болгож, гурав дахин хугацаа хэмнэх тооцоо гаргаад байсан. Энэ хооронд нийт 15 буудал.

Уг ажлыг 2022 оны тавдугаар сарын дундуур эхэлж, 2024.05.31-ээс нийтийн тээврийн үйлчилгээ үзүүлж эхлэхээр тооцсон. Нэг ёсондоо 2024 оны УИХ-ын сонгуулиас өмнө хотын нэг захаас хөнгөн галт тэрэг хөдөлж, Сансарын тойрог хүртэл давхина гэх амлалтыг Д.Сумъяабазар өгч байлаа. Энэ амлалт биелэхгүй бол МАН нийслэлд ялалт байгуулахад асар бэрх болно гэгдэж байв.

Энэ асуудлыг эргэн сөхсөний учир нь өнгөрсөн амралтын өдөр "хөнгөн галт тэрэг 2024 оны хавар ашиглалтад орно" гэж бичиж байсан иргэдийн пост амь орсонтой холбоотой. Гацсан гол шалтгаан хөнгөн галт тэрэгний замыг хэт өндөр үнээр тавихаар тооцоолсонд байв. Тодруулбал, нэг км тутмыг 51 сая ам.доллароор барина гэгдсэн. Энэ хүрээнд урд хөршийнхөн барилгын бүтцийн ажил болоод ажиллах хүчний ихэнх хувийг дотоодоос авна. Ингэхдээ санхүүжилтээ 40/40/20 хувиар гурав хувааж олгохоор яригдсан. Хэдий ТЭЗҮ 926 сая ам.долларын өртөгтэй гарсан ч гааль, НӨАТ-ыг чөлөөлж, газрын нөхөн төлбөрийг газар олголт зэргээр зохицуулж, 790 сая ам.доллар хүртэл бууруулна хэмээн нийтэд танилцуулсан.

Гэсэн ч энэ ажил замхарч одоогийн түвшинд зөвхөн мэдээ, пост, ирээдүйг зөгнөсөн улс төрчдийн яриа төдий зүйл л болж үлджээ. Хэрэв түүний хэлснээр энэ төсөл бүтсэн бол нийслэлийн иргэд сарын дараа хөнгөн галт тэргээр зорчиж эхлэх байлаа.

Энэ мэдээнд өгөх таны үнэлгээ

Хуваалцаарай Жиргээрэй