Сайжруулсан шахмал түлшний мидлингийг "Энержи ресурс" төлбөртэй нийлүүлж эхлэхээр шахаж байна

Нүүрсний нөөц дуусаж, борлуулалт тасарсан тухай мэдээлэл цахим орчинд түгээд буй.

Шахмал түлшний түүхий эдийг "Энержи Ресурс" компани таван жилийн турш "Тавантолгой түлш"-д үнэ төлбөргүй нийлүүлдэг байсан бөгөөд долдугаар сарын 1-нээс больжээ. Энэ нь таван жилийн гэрээ дууссантай холбоотой юм. "Энержи ресурс"-ээс цаашид мидлингээ төлбөртэй нийлүүлэх байр суурь баримталж буй.

Энэ талаар "Тавантолгой түлш" ХХК-иас тодруулахад, "Одоогийн нөөцөөр хэвийн үйл ажиллагаа явуулж байна. "Энержи Ресурс" ХХК нийгмийн хариуцлагын хүрээнд таван жилийн хугацаанд манай компанийн түүхий эд буюу мидлингийг нийлүүлсэн. Гэхдээ гол асуудал нь тус компаниас "Цаашдаа гэрээгээ сунгаж, үнэгүй нийлүүлэх боломжгүй гэсэн” хариуг бидэнд мэдэгдээд байгаа.

Бид жилдээ 560 мянга орчим тонн түлш үйлдвэрлэж, Улаанбаатар хотын хэрэгцээг хангадаг. Зуны нөөц бүрдүүлэх үйл ажиллагаа бол 120 мянган тонныг бүрдүүлэх ёстойгоос 53 мянга орчим тонныг бүрдүүлээд байгаа. Есдүгээр сар хүртлээ энэ нөөцөө хийнэ.

Одоогоор мидлингийн үлдэгдэл 200 мянган тонн байгаа. Цаашдаа Засгийн газрын түвшинд "Энержи Ресурс" ХХК-тай хэлцэл хийх, мидлингийн гэрээний асуудлыг шийдвэрлэх хүлээлттэй. Хэрэв мидлингээ татаад эхэлбэл буцаад хэвийн үйл ажиллагаагаа үргэлжлүүлнэ гэсэн хүлээлттэй байна" гэлээ.

М.АГАР

Энэ мэдээнд өгөх таны үнэлгээ

Хуваалцаарай Жиргээрэй