УЛС ТӨРУлс төрийн мэдээ
2025 оны төсвийг ЕТГ-т өнөөдөр хүргүүлж, Ерөнхийлөгч хориг тавих эсэхээ энэ долоо хоногт шийднэ
УИХ Монгол Улсын 2025 оны төсвийн төслийг хэлэлцэж, энэ сарын 8-ны өдөр эцэслэн баталсан. Улмаар өнгөрсөн баасан гарагийн /2024.11.15/ УИХ-ын чуулганы нэгдсэн хуралдаанаар эцсийн найруулгыг сонссон билээ.
Тэгвэл өнөөдөр ёсчилж, Ерөнхийлөгчийн Тамгын газарт хүргүүлэх чигтэй байна.
Хуулиар УИХ-аас баталсан аливаа хууль тогтоомж эцсийн байдлаар Ерөнхийлөгчийн Тамгын газарт ирсний дараа хянагдаж дууссанаас хойш ажлын таван хоногт багтаан хориг тавих хуулийн зохицуулалттай юм.
Хэрэв Ерөнхийлөгч У.Хүрэлсүх бүхэлд нь болон хэсэгчлэн хориг тавивал УИХ-аар оруулж хэлэлцэнэ.
- Монгол Улсын Үндсэн хуулийн 33 дугаар зүйлийн 1 дэх хэсэгт "Улсын Их Хурлын баталсан хууль, бусад шийдвэрт бүхэлд нь буюу зарим хэсэгт нь хориг тавих ба Ерөнхийлөгчийн тавьсан хоригийг Улсын Их Хурлаар хэлэлцэж, чуулганд оролцсон нийт гишүүний гуравны хоёр нь хүлээж аваагүй бол уг хууль, шийдвэр хүчин төгөлдөр хэвээр үлдэнэ" гэж хуульчилжээ.
Тэгэхээр ажлын тав хоногт буюу энэ долоо хоногт багтаж, Ерөнхийлөгч төсвийн төсөлд хориг тавих эсэхээ шийдэх юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.