Танилц: “Тавантолгой түлш” ХХК-нд барьцалдуулагч нийлүүлсэн БНХАУ-ын дөрөв, дотоодын гурван компани

"Сайжруулсан" шахмал түлшний гол асуудал барьцалдуулагч болчхоод байна. Иймд чухам ямар компаниуд нийлүүлж ирсэн нь анхаарал татаж буй юм.

-Барьцалдуулагч нийлүүлж байсан БНХАУ-ын ДӨРВӨН компани-

“Тавантолгой түлш” ХХК жилд 25 мянган тонн барьцалдуулагч бодис хэрэглэдэг. Үүнийхээ 50 хувийг 2022 он хүртэл БНХАУ-аас, 2022 оноос 50 хувийг дотоодын компаниудаас авдаг болсон билээ.

БНХАУ-аас манайд барьцалдуулагч экспортолсон;

1. Erlianhaote city Hongxiang trading Co.,LTD,
2. Gobi heijin Industry and trade Co.,LTD,
3. Erlian Xincai Trade Co.,LTD,
4. Erlian city huibang trading Co.,LTD

гэсэн дөрвөн компани байжээ.

-Барьцалдуулагч нийлүүлсэн дотоодын ГУРВАН компани-

Тэгвэл гадны компаниудыг халж, дотоодын компаниудаас авахаар 2022 оноос идэвхтэй яригдаж эхэлсэн. Улмаар 50 хувиа дотоодоосоо авдаг болсон.

Барьцалдуулагч нийлүүлэх сонирхлоо дараах компаниуд илэрхийлж иржээ.

"Бэл Кросс" ХХК, "Баялаг Эрдэм Цом" ХХК, "Виртуал Софт" ХХК, "Гарааны баргил Тех" ХХК, "Ганхүдэр Орд" ХХК, "Хангай Хан Өндөр" ХХК, "Өлзийт Төв" ХХК, "Каолин Ланд Бридж" ХХК гэсэн найман компани.

Нээлттэй мэдээллээс шүүж үзэхэд

1. “Гарааны баргил Тех" ХХК,
2. "Каолин Ланд Бридж" ХХК,
3. “Баялаг Эрдэм Цом" ХХК гэсэн гурван компани тендерт шалгарч, нийлүүлэлт хийжээ.

Шахмал түлшний барьцалдуулагч авахад 2021 онд 28.8 тэрбум төгрөг зарцуулсанаас энэхүү гурван компани хүртсэн байна.

-НЭГТ, Д.Оюунхоролын нөхрийн хамаарал бүхий компани монопол эрхтэйгээр барьцалдуулагч нийлүүлдэг-

“Гарааны баргил тех” ХХК барьцалдуулагч нийлүүлдэг монопол компаниудын нэг. Эко барьцалдуулагчийн үйлдвэрээ 2020 онд ашиглалтад оруулсан байна. Шахмал түлшний “Эко барьцалдуулагч” гэх бүтээгдэхүүн гаргаж, оюуны өмчийн патент ч авч.

Сүүлийн хоёр жилд “Тавантолгой түлш” ХХК-д доломитын орцтой барьцалдуулагч бүтээгдэхүүнийг тус компани үйлдвэрлэн нийлүүлсэн аж.

• 2023 онд: 36.825.000.000 төгрөг
• 2024 онд: 18.455.600.000 төгрөг нийт 55.2 тэрбум төгрөг авчээ.

УИХ-ын гишүүн асан Д.Оюунхоролын нөхөр Г.Жаргалсайхан Батаагийн Энхбаяр, Бүрэнгийн Очир нартай хамтран эзэмшдэг. Эцсийн өмчлөгчөөр нь Г.Жаргалсайхан өөрөө бүртгэлтэй байна. Гүйцэтгэх захирлаар Б.Очир ажилладаг.

-ХОЁРТ, Уурхайгаа дээрэмдүүлж байсан “Андын илч” ХХК-тай холбоотой “Каолин ланд бридж” ХХК барьцалдуулагч нийлүүлжээ-

“Каолин ланд бридж” ХХК Зүүн бүсийн 1-р үйлдвэрт ашиглагдах сайжруулсан шахмал түлшний барьцалдуулагч эд худалдан авах тендерт шалгарсан.

Тус компанийн хувь эзэмшигчээр Гадаадын хөрөнгө оруулалттай "Инскрепшнсорос" ХХК 2023.08.03-нд бүртгүүлжээ. Гүйцэтгэх захирлаар Цоггэрэлийн Дорж байдаг. Эцсийн өмчлөгчөөр Xxx Wu Xia гэх хятад иргэн бүртгэлтэй байна.

Сонирхолтой нь, “Каолин ланд бридж” ХХК-ийн эцсийн өмчлөгч Xxx Wu Xia гэх хятад иргэн "Андын илч" компанийн удирдах албан тушаалтнаар бүртгэлтэй байж байгаад улсын бүртгэлийн мэдээллээс 2021.09.03-нд хасагджээ. Тус компани Сүхбаатар аймгийн Эрдэнэцагаан сумын нутаг дахь Баянцогтын нүүрсний уурхайн ордыг ашигладаг. Хөхтий нуруу-2-нд MV-020996 дугаартай ашиглалтын тусгай зөвшөөрөлтэй.

-ГУРАВТ, УИХ-ын гишүүн асан Г.Ганболдтой нэр холбогдож байсан "Баялаг эрдэм цом" ХХК барьцалдуулагч нийлүүлжээ-

"Баялаг Эрдэм Цом" ХХК Баруун бүсийн 1-р үйлдвэрт ашиглагдах сайжруулсан шахмал түлшний барьцалдуулагч эд худалдан авах 1,999,900,000 төгрөгийн тендерт шалгарчээ.

Тус компанийн цорын ганц хувь эзэмшигч, удирдах албан тушаалтнаар Лирагийн Ганзориг бүртгэлтэй байгаа юм.

Өвөрхангай аймгийн утааг багасгах, агаарын бохирдлыг бууруулах чиглэлээр Баянтээгийн уурхайг түшиглэж, сайжруулсан түлшний үйлдвэр нээгдээд удаж буй. Тус үйлдвэрийг “Баялаг эрдэм цом” компани нээлттэй сонгон шалгаруулалтад орж, гүйцэтгэсэн. О.Сумъяасүрэн гэх иргэний барьсан компаниас УИХ-ын гишүүн асан Г.Ганболдыг хувь хүртдэг гэх мэдээлэл цацагдаж байсан юм.

Дотоодын гурван компанийн зохиож, гарган авсан 11 төрлийн барьцалдуулагчийг харьцуулан судалж байжээ. Үүнд:

• Чийгийн агууламжийг MNS ISO 5068 : 2004. Хүрэн нүүрс ба лигнит. Чийгийн агууламжийг тодорхойлох. Шууд бус жингийн аргаар [5],
• Үнсний агууламжийг MNS GB/T T212: 2015 Нүүрсний техникийн шинжилгээний аргаар [6],
• Дэгдэмхий бодисын агууламжийг MNS GB/T T212: 2015 Нүүрсний техникийн шинжилгээний аргаар [7],
• Цардуулын агууламжийг MNS 2134:2007 Нөхцөлт цардуулын агуулгыг тодорхойлох аргаар [8],
• Эрдэс, элeментийн агууламжийг Хими, хими технологийн хүрээлэн, Гаалийн төв лаборатори, АМГТЛ зэрэг итгэмжлэгдсэн лабораторит Рентген флюресценцийн спектрометр (XRF) болон Рентген диффрактометр (XRD) багажаар,
• Түлшний шаталтаас агаарт ялгарах хаягдал хийн хэмжилтийг Нийслэлийн Агаар орчны бохирдолтой тэмцэх газрын лабораторид MNS 6216: 2016 стандартын аргаар [9],
• Шахмал түлшний техникийн үзүүлэлтүүд-(чийг, дэгдэмхий, үнс, бат бэх)-ийг MNS 5679:2022 Сайжруулсан шахмал түлшний стандартад [10] заасан арга зүйгээр тус тус тодорхойлсон байна.

2023 оны судалгаанд: Импортоор авдаг барьцалдуулагчид уусдаг цардуулын агууламж 35-60% хүртэл, 20-30% эрдэс шавар, бентонит зэрэг нэмэлт 20-30%, дэгдэмхий органик нэгдэл 20%, чийг 8-9,5% байжээ. Харин дотоодын барьцалдуулагчийн найрлагад 7-31.2%-ийн цардуултай, үлдсэн агууламж нь эрдэс шавар, шохой болохыг тогтоожээ.

“Тавантолгой түлш" компанийн Баянгол дүүрэг дэх агуулахад барьцалдуулагч бодисыг гурилтай хольсныг М.Ганбаатарын хүлээн зөвшөөрсөн байдаг. Шахмал түлшийг барьцалдуулахын тулд өндөр химийн найрлага бүхий цавуулаг, шохойн чулуу ашигласан удаатай. Барилгын замаскны түүхий эдээр барьцалдуулагч хийсэн гэдгээ 2023 онд Ц.Даваацэрэн хүлээж байсан билээ.

Өмнө нь хүргэсэн М.Ганбаатар, Ц.Даваацэрэн нарын удирдсан утаатай түлшинд барьцалдуулагч, шуудай шахаж хөлжигчид нийтлэлийг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй