“Нүүдэлчин” зуух тараах тендерийг зургаан хүн угаартаж амиа алдсаны дараа цуцлажээ

Энэ оны нэгдүгээр сарын 23-24-ний шөнө шилжих шөнө Баянгол дүүргийн 22 дугаар хороонд гэр бүлийн зургаан хүн угаартаж нас барсан харамсалтай осол гарсан.

Осол гарсан айлд туршилтаар тараагдсан утааг бууруулж, 100 хувь угаарын хийгээс сэргийлдэг гэж “Нүүдэлчин” зуухыг Нийслэлээс тодотгож ийн 32 мянган зуух тараахаас туршилтаар 2200 айлд тараасан билээ.

Угаартаж амиа алдсан айлд мөн энэхүү “Нүүдэлчин” зуухыг тарааж өгсөн байсан бөгөөд цаг хугацааны хувьд зургаан иргэн угаартаж амиа алдсаны дараа буюу нэгдүгээр сарын 30-ны өдөр 32 мянган зуух тараах тендерийг цуцлах шийдвэрийг гаргажээ. Анх “Нүүдэлчин” зуухны талаар Байгаль орчин, уур амсьгалын өөрчлөлтийн сайд С.Одонтуяа "2010 оноос хойш тараасан зуухнууд эвдэрч хуучирч, тал талаас нь утаа гардаг болсон. Тиймээс шинэчлэл хийхгүй бол хүмүүс угаартаж нас барж байна. Монгол инженерийн загвараар давхар шаталттай зуухыг айлууддаа орон нутгийн сангийн хөгжлийн мөнгөөр өгсөн юм билээ. Огт утаа гаргадаггүй зуух байсан” хэмээн хэлж байсан билээ.

Харин Нийслэлийн Засаг даргын орлогч А.Амартүвшин “Айлуудыг зайлшгүй угааржилтаас сэргийлэх зорилгоор зуух тараах хэрэгтэй байна. Зорилтот бүлгийн иргэдэд 28.3 тэрбум төгрөгөөр 32 мянган зуух олгохоор төлөвлөж байна” хэмээн хэвлэлд ярьж байсан билээ.

“Нүүдэлчин” зуухтай холбогдуулан “Экоресурс” компанийн гүйцэтгэх захирал Б.Дэлгэрдалайгаас дараах тодруулгыг авлаа.

-Танай компанийн “Нүүдэлчин” зуухны тендерийг яг хэзээ цуцласан юм бэ?

-Яг хэдний өдөр гэдгийг нь санахгүй байна. 10-аад хонож байгаа байхаа.

-Танай зуух угаарын хий гаргадаг уу?

-Манай зуух нь 100 хувь угаарын хий гаргадаггүй зуух бөгөөд байшинд ашиглах боломжгүй, зөвхөн монгол гэрт галлах заавартай.

-“Нүүдэлчин” зуухтай холбоотойгоор хүн угаартсан, амиа алдсан гэдэг асуудал гарсан уу?

-Тийм нэг ч тохиолдол манай зуух дээр гараагүй" хэмээн хариулсан юм.

Харин угаартаж нас барсан гэр бүлийн харьяалагддаг Баянгол дүүргийн 22 дугаар хорооны зүгээс "Тус айл нь нүүдэлчин зуухаа галлаагүй. Хэрэглэж чадалгүй гаргаад тавьсан байх" хэмээн хариуллаа.

Т.БАТСҮРЭН

Холбоотой мэдээллийг ЭНД-ээс уншина уу.

Энэ мэдээнд өгөх таны үнэлгээ

Хуваалцаарай Жиргээрэй