The West Australian: Занаду майнз Монголын Хармагтай ордын үлдсэн 25 хувийг Зижиньд зарах хэлцлээ хүлээж байна

Австралийн The West Austrailian мэдээллийн агентлаг манай улсын Хармагтай ордын өнөөгийн нөхцөл байдлын талаар сонирхолтой нийтлэл бичсэнийг орчуулан хүргэж байна.

Монголын хамгийн том зэс, алтны ордуудын нэгийн эзэмшлийн хувь заяаг өөрчилж мэдэх онцгой үйл явдлын хүрээнд "Занаду майнз" нь Хятадын уул уурхайн томоохон групп болох "Зижинь майнинг"-тай хийсэн онцгой эрхийн гэрээгээ цуцаллаа. Энэ нь талууд хяналтын хэлцэлд хүрч чадаагүйн улмаас болсон юм.

Зижинь группийн талаас Хармагтайн хяналтын багцыг худалдаж авах таатай санал тавьсан бөгөөд Занадугийн зүгээс тус саналыг хамтарсан компанийн анхны гэрээнд заасан 25 хувиа худалдах эрхээс таатай нөхцөлтэй гэж үзсэн учир Зижинь хэлцлийн давуу эрх олгож, хоёр талаас хэлцлээ эхлүүлсэн.

Гэвч хэдэн долоо хоногийн яриа хэлэлцээний дараа Зижинь хэт богино хугацаанд шийдвэр гаргах боломжгүй тул гэрээг албажуулах гарын үсэг зурах хэмжээнд хүрсэнгүй. Гэхдээ Зижинь групп анхны саналаа буцаах санал гаргаагүй нь анхаарал татаж байна.

Хугацаа тулж, хамтарсан түншээсээ тодорхой шийдэл хүлээн аваагүй нөхцөлд Занадугийн хараат бус ТУЗ-ын хороо нөөц төлөвлөгөөгөө идэвхжүүлж, хувьцаа эзэмшигчдийн зөвшөөрлөөр хувьцаагаа зарах эрхээ хэрэгжүүлэхээр боллоо.

2025 оны зургаадугаар сарын 4-нд ээлжит бус хурлыг товлож, хөрөнгө оруулагчид Хармагтай төсөлд үлдсэн 25 хувийг Зижиньд худалдах эсэх талаар санал хураах юм.

Хэрэв хүлээн авбал, Занаду нь уг дэлхийн хэмжээний төслийн цаашдын санхүүжилтийн үүргээс чөлөөлөгдөж, Хармагтайн хувьд урт хугацаанд төвлөрсөн хөрөнгө оруулалт шаардахгүй гэсэн үг.

Харин энэ санал хураалт амжилтгүй болж, илүү ашигтай хэлцэл гарахгүй бол компани Б төлөвлөгөөнд шилжиж, төслийг Зижиньтэй 50:50 хувьтай үргэлжлүүлэхийн тулд өөр санхүүжилтийн эх үүсвэр хайх юм.

"Зижинь групп нь Монгол дахь төсөл дээр илүү туршлагатай ажиллана гэж харж байна. Бид Хармагтай төслийг урагшлуулах шаардлагатай санхүүжилтийн шийдэл олохын тулд түнштэйгээ хамтран ажилласаар байх болно. Мөн төсөлд сонирхлоо илэрхийлсэн гуравдагч талыг хэлэлцээ хийхийг санал болгож байна" хэмээн Занаду майнз компанийн Гүйцэтгэх захирал, ТУЗ-ийн дарга Колин Мурхед хэлсэн юм.

Монголын Хармагтай төсөл дээр Зижинь 50:50 хувийн хамтын эзэмшлээр явдаг бөгөөд дэлхийн хэмжээнд чухал ач холбогдолтой зэс, алтны орд билээ.

Тус орд нь нийт 730 сая тонн нөөцтэй бөгөөд үүнд 1.6 сая тонн зэс, 4 сая унц алт багтана. Гол онцлог нь 100 сая тонн өндөр агууламжтай бүс бөгөөд зэсийн эквивалент агууламж нь 0.8 хувь бөгөөд энэ нь төслийг хурдан үр өгөөжтэй болгож, Занадуд эхний үе шатад мөнгөн урсгал авчрах боломжтой төсөл.

Саяхан, ТЭЗҮ-дээ дурдсанаар, Хармагтай төслийн цэвэр үнэлгээ 930 сая ам.доллар, шаардлагатай хөрөнгө оруулалт 890 сая ам.доллар бөгөөд жилд 293 сая ам.долларын өгөөж үүсгэх боломжтой гэж үзсэн. Үйлдвэрлэл нь жилд 80,000 тонн зэс, 170,000 унц алт үйлдвэрлэхээр төлөвлөгдсөн ба зэсийн өртөг нь нэг фунт тутамд 70 цент байна. Энэ нь дөрвөн жилийн дотор хөрөнгө оруулалтаа нөхөж, 30 жил хүртэл ашиг өгөх төсөл болж байна.

Яг өнөөдрийн байдлаар Занаду нь Зижиньтэй хийсэн онцгой эрхийн гэрээгээ цуцалснаар гуравдагч хөрөнгө оруулагчдад хаалга нээж, Ази тивийн хөгжүүлэлтийн шатандаа хамгийн ирээдүйтэй ордуудын нэгийг эзэмших өрсөлдөөнийг дахин идэвхжүүллээ.

Зургаадугаар сарын 4-ний санал хураалт ойртож байгаа энэ үед Занаду дахин удирдлагын байр суурьдаа эргэн ирж, шинэ саналууд хүлээж, стратегийн бүх хувилбарыг нээлттэй болгож буй нь уг Хармагтай ордыг дэлхийн хэмжээний төсөл болгож байна.

Нэг зүйл тодорхой байгаа нь Зижинь групп Хармагтай орд дээр өндөр сонирхол бий бөгөөд эрэлттэй хөрөнгө оруулалт болохыг ч мэдэж буй. Энэ нь Занадуд өнөдөр өгөөж хүртэх боломжит хувилбараа сонгох нөхцлийг бүрдүүлж өгч байгаа юм.

Эх сурвалж: The West Australian

Ц.ТАМИР

Холбоотой мэдээллийг хавсаргаж байна

Энэ мэдээнд өгөх таны үнэлгээ

Хуваалцаарай Жиргээрэй