С.Одонтуяа: Гурван зэрэглэлд ангилж, байгаль орчинд нөлөөлөх байдлын үнэлгээний шаардлагыг өөрчилнө

УИХ-ын чуулганы нэгдсэн хуралдаан 10.00 цагт эхлэн үргэлжилж байна.

Байгаль орчинд нөлөөлөх байдлын үнэлгээний тухай хуульд нэмэлт өөрчлөлт оруулах тухай хуулийн төслийг хэлэлцэх эсэхийг хэлэлцэж байна.

УИХ-ын гишүүн Б.Бат-Эрдэнэ, “Харамсалтай байна. Орон нутгийн иргэдээс санал аваагүй. Бүрэн судалж, шийдвэрлээгүй орж ирж байгаа. Зэрэглэлүүд гэж оруулсан мөртлөө зэрэглэлийн томъёолол байхгүй. Зэрэглэл нэг гэдэг нь ямар газар нутаг, цар хүрээнд юм гэдэг ойлгомжгүй. Ингэж ангилчихаад менежментийн төлөвлөгөөг мартчихсан. Энэ бол хамгийн чухал нь байдаг. Уул уурхайн, аялал жуулчлалын компаниуд бизнес эрхэлье гэвэл менежментийн төлөвлөгөөгөөр явдаг. Үүнийг орхисон байна. Сөргөлдөөнтэй байдлыг шийдвэрлээгүй, бүх асуудал хэвээрээ. Иймд дэмжих боломжгүй гэж үзэж байгаа” гэж үг хэллээ.

УИХ-ын гишүүн Х.Баасанжаргал “Байгаль орчноос гадна нийгэм болон соёлын нөлөөллийн тал дээр ямар бодлого барьж байгаа вэ. Хоёрт, иргэдийн оролцоог та бүхэн хэрхэн хангаж, яаж харж байгаа юм бэ. Багийн хурлаар оруулах ёстой гэдэг агуулга нэлээд яригдсан юм байна?” гэлээ.

БОУАӨ-ийн сайд С.Одонтуяа “Маш чухал асуудал хөндлөө. Өмнө нь байгальд, амьтанд, ургамалд ямар нөлөөтэй юм гэдгийг судалж л ирсэн. Одоо бол нийгэм соёлын нөлөөг тооцдог жишиг рүү явж байгаа, тодорхой зохицуулалтууд орсон. Жишиг багийн төсөл боловсруулж байгаа. Нийгмийн нөлөөллийн үнэлгээг сайн тусгаж өгвөл олон улсын стандартад нийцнэ, гаднын хөрөнгө оруулалтад ч чухал гэж хийсэн. Төсөл хэрэгжүүлэгч үсчин ч бай барилгын материалын жижиг дэлгүүр ч бай том уул уурхайн компани ч бай ижилхэн шаардлага тавьчихдаг. Тэгээд 152 хоногийн дотор үнэлгээгээ хийх ёстой. Ингээд хүндрэл үүсдэг. Иймд гурван зэрэглэлд хувааж, нэгдүгээр зэрэглэлд нь уул уурхайн төслүүдийг оруулж өгсөн байгаа” гэж хариуллаа.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй