Б.Жавхлан гүрийсэн ч, төсөвт тодотгол хийхээр болов

Сангийн сайд Б.Жавхлан "Төсөв тодотгохгүй" гэж эцсээ хүртэл гүрийсэн. Тун саяхныг болтол буюу тавдугаар сарын 23-нд хүртэл "Баталсан төсөвтөө итгэлгүй байгаа бол төсөв батлах хэрэг байна уу, О.Цогтгэрэл гишүүн ээ" хэмээн томорч байв.

Гэтэл шинэ Ерөнхий сайд Г.Занданшатар "Ирэх долоо хоногт төсвийн тодотгол өргөн барихаар төлөвлөж байна. Төсвийн зардлыг 2.3 их наядаар бууруулахгүй бол төсвийн орлого үлэмж хэмжээгээр тасарч байна" гэж шуудхан хэлэв. Тэгэхээр энэ долоо хоногт танхимаа бүрдүүлээд ирэх долоо хоногт төсөв тодотгол руу шуудрах нь тодорхой боллоо.

Шинэ Засгийн газарт өнөөгийн эдийн засгийг дордуулахгүй байх хүндхэн үүрэг оногдоод байна. Үүсээд хүндрэлүүдийг тоочвол,

• 2021 онд 15 их наяд төгрөг байсан улсын төсөв 2025 онд 33 их наядыг давж, хоёр дахин тэлсэн.
• Төсвийн орлого 4.1 их наяд төгрөг буюу өмнөх оны мөн үеэс 22.9 хувиар буурсан.
• Зээлийн дүн 4.6 их наяд буюу өмнөх оны мөн үеийнхээс 22.1 хувиар өссөн.
• Засгийн газрын өр 2025 оны байдлаар 16 хувиар нэмэгдэж, 34.6 их наядад хүрсэн.
• Инфляц он гарснаас хойш 10.6 хувь буюу хоёр оронтой тоо руу орсон. 
• Ам.доллар 3600 шүргэж, төгрөгийн ханш ам.долларын эсрэг 750 орчим төгрөгөөр суларсан. Валютын нөөц багассанаас төгрөгийн ханшийн сулрал явагдсаар байна.
• Нүүрсний дундаж 2025 оны эхэн үед 40 хувиар буурч, тонн тутмын үнэ ойролцоогоор 100 орчим ам.доллар болсон

Эдгээрийг улам дордуулчихгүй байх нь дараагийн Засгийн газрын нэн тэргүүний асуудал болчхоод байна.

У.УЯН

Манай редакцын өмнө нь тоймлон хүргэж байсан нийтлэлийг доорх линкээр уншина уу.

Энэ мэдээнд өгөх таны үнэлгээ

Хуваалцаарай Жиргээрэй