Улаан тайгынхны тэжээж тайгад тавьсан хоёр бамбарууш байгаль хамгаалагчдыг хараад гүйн иржээ
Өнгөрсөн 2023 оны зургаадугаар сард эхээсээ төөрсөн хоёр бамбарууш өслөж, малчин айлд очсон байдаг. Улмаар хоёр бамбаруушийг байгаль хамгаалагчид орон нутгийн иргэдийн хамт өсгөж буй талаар бид өмнө нь мэдээлсэн.
Тодруулбал, Эхээсээ өнчирч өлссөн хоёр баавгайн бамбарууш малчин айлд очиж, малчид тэдэнд сүү өгснөөр хүнээс холдохоо байсан талаарх дуудлага мэдээлэл Зэд Хантайн бүтээлийн нурууны Дархан цаазат газрын хамгаалалтын захиргаанд тус оны дөрөвдүгээр сард иржээ. Тиймд байгаль хамгаалагчид бамбаруушуудыг айлын өвөлжөөнөөс шилжүүлэн авч өөрсдийн захиргаанд тэжээж эхэлсэн. Ингэхдээ ан амьтны байгалийн зэрлэг араншныг нь сэргээж, эрүүл өсгөж бие даах чадвартай болохоор нь байгальд тавихаар ажиллаж байв.
Мөн тэднийг Дондог, Дулам гэж нэрлэсэн билээ.
Улмаар онд орсон Дондог, Дулам хоёрыг Улаан тайгын улсын тусгай хамгаалалттай газрын захиргааны дарга, байгаль хамгаалагч Ж.Төмөрсүх өнгөрсөн 2024 оны гуравдугаар сард өөр дээрээ авч тэжээсэн. Ингэхдээ тэднийг Borya, Pepе хэмээн нэрлэж, тус оны тавдугаар сарын 29-ний өдөр хоёр бамбаруушийг тэжээж байсан байршил нургаас нь 100 гаруй км газар нисдэг тэргээр зөөвөрлөн, хүзүүнд нь сансрын чип суулган Бусын их тайгад тавьсан.
Үүнээс хойш Улаан тайгын хамт олны Бусын их тайгад тавьсан хоёр бамбарууш өнгөрсөн оны есдүгээр сард байгаль хамгаалагчдын тавьсан автомат камерт бичигджээ. Камерт бичигдсэнээс тэд байгальдаа дасан зохицсон байдалтай. Самар жимс олж идээд ичихээр бэлтгэж байгаа нь харагдсан байдаг.
Тэгвэл энэ удаа байгаль хамгаалагчидтай тэдний өсгөсөн хоёр бамбарууш болох Borya, Pepе нар Их Бусын тайгад тааралдсан байна. Ингэхдээ тэд байгаль хамгаалагчид рүү гүйн ирж, ойртоод хэсэг тоглож байгаад буцаад тайгын гүн рүү гүйн оржээ. Тэд нас биед хүрсэн том баавгай болсон байсныг байгаль хамгаалагчид онцолж, том болсноо бидэнд харууллаа хэмээн зургийг нь нийтэлжээ.
Д.ЦЭГЦ
Холбоотой мэдээлэл:
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.