Сурвалжилга: Үндсэн сургуульдаа багтаагүй I ангийн 360 хүүхэд мөөгөнцөртэй цэцэрлэгт суралцаж байна

Сонгинохайрхан дүүрэгт байрлах 154-р сургууль 640 хүүхдийн багтаамжтай ч 3200 хүүхэд суралцаж байна. Тиймээс энэ жил нэгдүгээр ангид элссэн 10 бүлгийн 360 хүүхдийг түрээсийн байранд шилжүүлэн, сургаж байна. "Хүүхдүүдийн суралцаж буй "Тэмүүжин анд" цэцэрлэгийн барилга хүүхэд суралцах стандарт орчин биш, анги танхимаас нь мөөгөнцөр, ариун цэврийн өрөөний үнэр үнэртдэг. Мөн зай талбай багатай тул суралцахад саад учирч байна" хэмээн эцэг эхчүүдийн төлөөлөл манай редакцад хандсан юм. Иймд бид тус сургуулийн бодит нөхцөл байдлыг сурвалжлан хүргэж байна

Нэгдүгээр ангийн 10 бүлэг хичээллэж буй уг барилга хоёр давхар, хичээллэх таван танхимтай. Цэцэрлэгийн зориулалтаар баригдсан тул зай талбай багатай, тааз нь намхан. Нэг анги нь 15-20 мкв зай талбайтай. Хоёроос гурван эгнээ бүхий ширээ самбараас хаалга хүртэл эгнэж, хүүхдүүд дүүртэл суужээ. Мөн анги, танхим бүр ариун цэврийн өрөөтэй байх нь тухтай ч нэхүүн үнэр ханхалж байлаа.

-Эцэг эхчүүдийн төлөөлөл: Мөөгөнцөртэй, нойлын үнэр ханхалсан сургуульд хүүхдүүдээ сургамааргүй байна. Үндсэн сургуульдаа гурван ээлжээр хичээллүүлэх хэрэгтэй-

Миний зээ охин энэ жил Нийслэлийн ерөнхий боловсролын 154-р сургуульд нэгдүгээр ангид элсэн орсон. Гэтэл эцэг эхчүүд бидэнд мэдээлэхгүйгээр үндсэн сургуулиас хоёр буудлын зайтай, актад гарсан цэцэрлэгийн барилгад сургаж байгаад бухимдалтай байна. Үндсэн сургуулийнх нь ачаалал хэтэрсэн тул ийм шийдвэр гаргасан гэж сонссон. Гэхдээ 15 мкв ангид 40 орчим хүүхэд сурна гэдэг хэцүү шүү дээ. Хэт жижиг ангид олон хүүхэд сууснаар хичээл заагч багш дундуур нь явж, хүүхэд бүрд тулж ажиллах боломжгүй. Тэр бүү хэл сурагчдын ширээ самбарт тулчихсан тул багш ширээгүй, сандал дээрээ ч сууж чадахгүй хичээлийн цаг дуустал зогсож харагдсан.

Сургуулийн зүгээс энэ түрээсийн байранд нэгдүгээр ангийн хүүхдүүд л суралцах боломжтой. Тиймээс ирэх жилээс үндсэн сургуульдаа хичээллүүлнэ. Дараа жил шинээр нэгдүгээр ангид орох хүүхдүүдийг энд сургана гэж хэлсэн. Ариун цэврийн өрөөний нэвширсэн үнэр ханхалсан, мөөгөнцөртэй сургуульд дахиад л зургаан настнуудыг сургах гээд ярьж байна шүү дээ. Мөн хүмүүсийн хэлж байгаагаар энэ цэцэрлэгийн барилга өвөлдөө хүйтэн гэж дуулсан. Удахгүй ханиадны улирал ирнэ. Тэр үед хүйтэн сургуульд хүүхэд яаж суралцах вэ. Томуугийн вирус нэг хүүхэд л тусахад хаалгаараа гарах шахам сууж байгаа энэ олон хүүхэд цөм эрсдэлд орно. Тиймээс үндсэн сургуульд нь гурван ээлжээр ч хамаагүй хичээллүүлэх хэрэгтэй гэж үзэж эцэг эхчүүд бид нэгдэж байна.

Хүүхэд бүрд эрүүл аюулгүй орчинд суралцах эрх байдаг биз дээ. Гэтэл яг энд харагдаж байгаа хуучны хоёр давхар цэцэрлэгийн барилга дотор 400 орчим хүүхдийн тэр эрх зөрчигдөж байна. Хэн ч ороод үзэхэд тухгүй, таагүй үнэртэй. Ангийн урд эгнээнд сууж байгаа хүүхэд ариун цэврийн өрөө орохын тулд ангийн бүх хүүхдүүд хөдөлж, зай гаргах шаардлага үүснэ гэсэн үг.

Бас нэг асуудал нь биеийн тамирын заал, талбай байхгүй. Дасгал хөдөлгөөн хийх ч эрхгүй боллоо, тэд. Мөн үдийн цай сургуулийн орчинд хийгдэхгүй байна. Машины ард таглаа ч үгүй төмөр саванд хийж ирж байна лээ. Яг хаанаас зөөж ирж, бидний хүүхдүүдийг хооллоод байгааг эцэг эхчүүд бид ч мэдэхгүй. Олон хүүхдүүдийн гэдэс гүйлгэж, халуурах шинж тэмдэг гарч байна. Биеэр нь тууралт гарч байна.

Угтаа нэгдүгээр ангид орж байгаа хүүхэд хичээлд орлоо гэх хөөр баяр, догдлолтой байдаг атал манай хүүхэд гэртээ ирээд "хичээл дээр суухаар баас үнэртээд байна ээж ээ. Явахгүй байж болохгүй юм уу" гэж хэлсэн. Ийм байхад яаж хүүхдээ энд сургах юм бэ. Оройн цагаар хичээллээд ч хамаагүй үндсэн сургууль руугаа очих хэрэгтэй гэж бодож байна.

Бид мэдээллийг тэнцвэртэй хүргэх үүднээс сургуулийн удирдлагын байр суурийг тодрууллаа.

-Бага ангийн сургалтын менежер Л.Алтантуяа: Хамгийн боломжит анги танхимтай, үндсэн сургуультай ойрхон нь энэ байсан. Засварлах, сайжруулах асуудал дээр эцэг, эхчүүд хамтарч ажиллаасай-

Хичээл сургалтын үйл ажиллагаа эхлэх дөхөж, хамран суралцах хүүхдийн судалгаа дээр түшиглэн түрээсийн байрыг бид хайж эхэлсэн. Хамгийн боломжит анги танхимтай, үндсэн сургуультай ойрхон нь энэ байсан л даа. Цэцэрлэгийн зориулалттай барилга тул зургаан настай хүүхдүүд л суралцахад тохиромжтой гэж үзсэн.

Яг одоогийн байдлаар энэ түрээсийн байрандаа нэгдүгээр ангийн 10 бүлгийн 360 хүүхэд хичээллэж байна. Таван танхимд хоёр ээлжээр хичээллэж буй юм. Анги дүүргэлтийн хувьд 31-36. Бусад сургуулиудтай харьцуулахад анги дүүргэлт багатайд тооцогдоно.

Нэгдүгээр ангид элсэн суралцах хүүхдүүдийн наймдугаар сарын 12-ноос эхэлсэн л дээ. Тухайн өдрөөс эхлэн бүртгүүлсэн хүүхдүүдийн эцэг, эх, асран хамгаалагч нартай уулзалт хийж, сошиал хаягтаа мэдээллүүдээ цаг алдалгүй нийтэлж байсан. Ингэхдээ энэ түрээсийн байранд энэ хичээлийн жилдээ суралцах талаараа ч мөн хэлсэн. Гэтэл тухайн үед мэдээллээ авалгүй хоцорч үлдсэн эцэг эхчүүд гомдол гаргаж, үндсэн сургуульдаа гурван ээлжээр хичээллүүлье гэх байр суурийг илэрхийлж байна. Сургууль гурван ээлжээр хичээллэнэ гэдэг амаргүй. Сүүлийн ээлж оройн 20.00 цагт тарна гэсэн үг шүү дээ. Хэрэв оройн ээлжид хичээл орлоо гэхэд нэн тэргүүнд хүүхдийн аюулгүй байдал алдагдана.

Эцэг эхчүүдийн зүгээс мөөгөнцрийн үнэр, ариун цэврийн өрөөний үнэр, сургалтын орчны зай талбай бага байна хэмээн шүүмжилж байна. Үнэнийг хэлэхэд тийм ч гамшгийн нөхцөл байхгүй. Шаардлагатай урсгал засварыг бид хийж байгаа. Зарим эцэг эхчүүдийн зүгээс сургалтын орчныг тухтай болгох, сайжруулах тал дээр хамтран ажиллахаа илэрхийлээд буй.

-1-5 ангийн багш Х.Пүрэвдорж: Өргөтгөх шаардлагатай хоёр анги байгаа. Сургуулийн удирдлагаас засварлаж өгнө гэсэн-

Энэ хичээлийн жилд нэгдүгээр анги дааж авлаа. Одоогоор 36 хүүхэдтэйгээр хичээл, сургалтын үйл ажиллагаагаа эхлүүллээ. Анги тахимын хүрэлцээ, орчин нөхцөлийн хувьд хэвийн. Бусад анги танхимаа бодвол зай талбай томтой тул хүүхдүүдтэй ажиллахад ямар нэгэн саад бэрхшээл тулгарахгүй л байна. Харин дээд давхарт хоёр ангид засаж сайжруулах шаардлагатай байгаа. Тиймээс сургуулийн удирдлагууд өргөтгөлийн ажлыг хурдан хугацаанд хийж, хүүхдүүдийн суралцах орчныг сайжруулж өгнө гэсэн. Засварын ажил хурдан дуусаж, хүүхдүүд тухтай хичээллэж эхэлнэ гэдэгт итгэж байна.

Энэ хичээлийн жилд 87 сургууль, 40 цэцэрлэг түрээсийн байранд хичээллэхээр болсон. Холбогдох албаныхан хүүхэд суралцахад тохиромжтой эсэхэд анхаарч, эрүүл, аюулгүй байдлыг нь шалгаж, хэрэгцээт засвар үйлчилгээг хийж хичээлийн шинэ жилийг эхлүүлсэн гэгдэж байсан. Гэтэл 154-р сургуулийн Б байр шиг хүүхдийн суралцах орчин нөхцөлийг хангаж чадаагүй барилга, анги танхим хэчнээн байгаа бол. Хяналт шалгалтаа хэр зэрэг хийсэн бол гэх асуулт хариултгүй үлдлээ.

Энэ мэдээнд өгөх таны үнэлгээ

Хуваалцаарай Жиргээрэй