Энэтхэгийн гангийн томоохон компани Монголоос нүүрс импортлоход тээвэрлэлтийн хүндрэл үүсэж, зогссон гэв

Энэтхэгийн гангийн салбарын томоохон компани болох “JSW Steel” нь Монголоос коксжих нүүрс импортлох төлөвлөгөө нь тээврийн хүндрэлээс шалтгаалан зогссон талаар Press Trust of India агентлагийн эх сурвалж мэдээлсэн байна.

Уг компани нүүрсний нийлүүлэлтийн эх үүсвэрээ төрөлжүүлэх зорилгоор Монголыг боломжит хувилбар болгон судалж байсан ч далайд гарцгүй Төв Азийн улсаас Энэтхэг рүү нүүрс тээвэрлэх нь логистикийн бэрхшээл хэтэрхий их, эдийн засгийн хувьд ч үр ашиггүй хэмээн дүгнэсэн талаар “JSW Steel” компанийн гүйцэтгэх захирал Жаянт Ачаря мэдэгджээ.

Коксжих нүүрс нь гангийн үйлдвэрлэлд зайлшгүй шаардлагатай түүхий эд бөгөөд Энэтхэг улс дэлхийн гангийн үйлдвэрлэлээр хоёрдугаарт бичигддэг ч энэ чухал эх үүсвэрийн хувьд импортоос өндөр хамааралтай хэвээр байна.

Энэтхэгийн нийт коксжих нүүрсний 80-90 хувийг цөөн хэдэн орноос, тэр дундаа Австралиас их хэмжээгээр авдаг. Ийм алслагдсан эх үүсвэрээс импортлох нь тээврийн зардлыг үлэмж нэмэгдүүлж, Энэтхэгийн ган үйлдвэрлэгчдийн ашигт ажиллагаанд хүндрэл үүсгэдэг.

2025 оны 1-р сард Энэтхэгийн Засгийн газрын өндөр түвшний төлөөлөгч Монголын нүүрс тээвэрлэх чиглэлийг судалж байгаа талаараа дурдсан. Одоогоор тус компани үйл ажиллагааны хэрэгцээг хангахын тулд одоо ашиглаж буй нийлүүлэлтийн эх үүсвэрүүддээ түшиглэхээр болов.

Үүнтэй зэрэгцэн Энэтхэгийн Засгийн газар ган үйлдвэрлэгчдийг дотоодын коксжих нүүрсний нөөцийг ашиглах, нүүрснээс бага нүүрстөрөгч ялгаруулдаг өөр төрлийн үйлдвэрлэлийн технологийг нэвтрүүлэхийг уриалаад байна.

Т.БАТСҮРЭН

Эх сурвалж: SXCoal

Энэ мэдээнд өгөх таны үнэлгээ

Хуваалцаарай Жиргээрэй