Монгол Улсад үндэсний мөнгөн тэмдэгт- төгрөгийг гүйлгээнд гаргасны 100 жилийн ойг тохиолдуулан Монголбанкнаас гүйлгээнд хүчин төгөлдөр бус дурсгалын 100,000 төгрөгийн дэвсгэртийг мөнгө цуглуулагчид болон сонирхогчдод зориулан худалдаанд гаргалаа.
Дурсгалын 100,000 төгрөгийн дэвсгэртийн нүүрэн талыг Их Монгол улсыг байгуулсан эзэн Чингис хааны бэлгэдэлд зориулсан бол ар талыг өнөөдрийн тусгаар тогтносон Монгол улс байгуулагдах суурийг тавьж, эрх чөлөөгөө авчирсан Ардын хувьсгалын бэлгэдэлд зориулж, түүнийг удирдсан удирдагчид болон өнөөгийн Монгол орны газрын зургийг зохиомжлон орууллаа. Мөн дэвсгэртийн хоёр талд морьтон баатар болон морины эскиз зургийг зохиомжлон дүрсэлсэн бөгөөд үүгээр Их Монгол Улс ба тусгаар тогтносон Монгол Улс байгуулагдсан хоёр үйл явдлын аль алинд нь морь онцгой үүрэг гүйцэтгэж ирснийг илэрхийлэв.
Дурсгалын 100,000 төгрөгийн хамгаалалтын элементийн хувьд:
Нүүрэн талд:
- Баруун дунд буланд Чингис хааны хөрөг, МБ гэсэн дүрс усан хээгээр тодорч харагдана.
- Мөнгөн дэвсгэртийн хамгаалалтын утсыг дээш, доош налуу хөдөлгөхөд галын дөл нь алтлагаас ногоон болон шар өнгөөр ээлжлэн солигдож мөн тасалдаж харагдах туузыг гэрлийн эсрэг барихад МБ ба 100000 гэсэн бичиг харагдана.
- Дэвсгэрт дээрх галын тулга бүхий өнгө хувиргагч элемент нь дээш, доош налуу хөдөлгөхөд алтлаг өнгөнөөс ногоон болон шар өнгөөр солигдож харагдана.
- Дэвсгэртийн нүүрэн талын голд байрлах уулын зурагны дотор MONGOLBANK, Чингис Хааны хөрөг зургийн дээлийн захын гадуур CHINGGISKHAAN гэсэн жижиг бичилттэй.
- Чингис хааны хөрөг зураг, дэвсгэртийн гол хэсэгт байрлах соёмбо мөн дэвсгэртийн баруун буланд байрлах 100000 гэсэн тоо, зүүн буланд байрлах монгол бичгээр 100000 гэж бичсэн хэсгүүдийг гарт мэдрэгдэх товгор хэвлэлтийн технологиор хэвлэсэн.
- Дэвсгэртийн баруун, зүүн ирмэг дэх 10 ширхэг ташуу товгор зураас нь 100000-тийн дэвсгэртийг илэрхийлэх харааны бэрхшээлтэй иргэдэд зориулсан элемент бөгөөд хурууны үзүүрт тэмтрэгдэнэ.
Ар талд:
- “Ардын хувьсгалын анхны долоо” нэрээр түүхэнд мөнхөрсөн Дамдины Сүхбаатар, Догсомын Бодоо, Солийн Данзан, Дансранбилэгийн Догсом, Дарьзавын Лосол, Дамбын Чагдаржав, Хорлоогийн Чойбалсан нарын зургийг мөн Монгол Улсын нутаг дэвсгэртийг 100000, хээ, морь, соёмбоор жижиг модуляцад сийлбэр хэвлэлтийн технологиор хэвлэж оруулав.
- Дэвсгэртийн арын талын голд байрлах Монгол Улсын нутаг дэвсгэртийн зургийг тойрон АРДЫН ХУВЬСГАЛЫН 100 ЖИЛИЙН ОЙ гэсэн жижиг бичилттэй.
- Дэвсгэртийн ард талд Ардын хувьсгалын 100 жилийн логог алтан шаргал өнгөөр болон соёмбыг цэнхэр өнгөөр гялгар судлалаар хэвлэсэн.
- Мөн Дэвсгэртэд хэт ягаан туяаны гэрэлд тодорч харагдах МB гэсэн үсэгтэй морьтон баатрыг нүүрэн талд нэмж оруулсан бол ар талын зүүн доод хэсэгт Ардын хувьсгалын 100 жилийн лого болон соёмбыг тус тус байрлуулав.
Монголбанк нь сүүлийн жилүүдэд хуурамчаар мөнгөн дэвсгэрт үйлдэхээс сэргийлж шинээр хэвлэж байгаа мөнгөн тэмдэгтүүдийн хамгаалалтын таних тэмдгүүдийг тууштай сайжруулсаар ирсэн бөгөөд шинээр гаргаж байгаа дурсгалын дэвсгэрт дээр хамгийн сүүлийн үеийн дэвшилтэд технологи бүхий хамгаалалтын элементүүд оруулж өгсөн нь цаашид хэвлэгдэх мөнгөн дэвсгэртүүдийн жишиг болох юм.
Гүйлгээнд хүчин төгөлдөр бус энэхүү дурсгалын мөнгөн тэмдэгтийг та www.mongolbank.mn цахим сайтаар дамжуулан худалдан авах боломжтой.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.