“Шинжан шинфан”-ны гомдлоор Б.Пунсалмаагийн нөхөр, Э.Бат-Амгалангийн дүү нь шалгагдаж эхэллээ

УИХ-ын гишүүн Б.Пунсалмаа, Монгол Улсын Засгийн газрын гишүүн, Хот байгуулалт, барилга, орон сууцжуулалтын сайд Э.Бат-Амгалан нарын хамаарал бүхий хүмүүсийг хамтатган гадны компанийн мөнгийг завшсан асуудлаар хуулийн байгууллага шалгаж эхэллээ.

Саяхан УИХ-ын гишүүн Б.Пунсалмаа БНХАУ-ын хөрөнгө оруулалттай "Шинжиан Шинфа" компанийн хөрөнгийг завшсан асуудлыг "НУУЦ МАТЕРИАЛУУД" нэвтрүүлэг ил болгосон. Үүнтэй холбоотойгоор Б.Пунсалмаа "Манай компанийн оролцоотойгоор Монгол Улсад 840 км зам тавигдсан нь үнэн. Олон арван компани, хэдэн мянган хүний хүч хөдөлмөр шингэж сайн замтай болсон ч саар мууг нь зөвхөн надад хаяглаж байгаа нь зохисгүй юм. Холбогдох талууд тайлбар хийнэ гэдэгт итгэж байна. Монгол Улсад хөгжил авчрах аливаа ажлын төлөө тууштай зүтгэсээр байх болно" гэж цахим хаягтаа байр сууриа илэрхийлээд амжив.

“Шинжан шинфан”компанийн мөнгийг УИХ-ын гишүүн Б.Пунсалмаа, УИХ-ын гишүүн, Хот байгуулалт Барилга орон сууцжуулалтын сайд Э.Бат-Амгалан нар сонгуулийнхаа сурталчилгаанд ашигласан уу?

Нэр бүхий этгээд цагдаагийн байгууллагад "“Хос Мөнгөн Зам” ХХК-ийг хууль ёсоор төлөөлөх эрхгүй этгээд нь бусад хувьцаа эзэмшигчийн болон гүйцэтгэх захирлын эрх мэдэл халдаж, холбогдох хууль тогтоомжийг зөрчин, хуурамч бичиг баримт бүрдүүлж, хууль бусаар хуулийн этгээдийн нэр дээр төгрөгийн болон долларын данс нээлгэж, уг дансаар үлэмж хэмжээний мөнгийг татан төвлөрүүлж, улмаар дур мэдэн зарцуулж, компанид их хэмжээний хохирол учруулсан. Уг хууль бус мөнгөн гүйлгээгээр нэр бүхий этгээдүүдийн сонгуулийн үйл ажиллагааг санхүүжүүлсэн байж болзошгүй” гэх гэмт хэргийн талаарх гомдол гарсан ч удаа дараалан хэргийг мөрдөгчид хааж иржээ.

Эх сурвалжуудын мэдээллээр энэ гомдолд дурдагдсан хүмүүс Б.Пунсалмаагийн нөхөр Р.Батбаяр, Э.Бат-Амгалангийн төрсөн дүү Э.Батбаяр нар аж.

Тэд хамтарч бизнес хийдэг ба тэднийг хамтатган цагдаагийн байгууллагаас хуурамч данс нээж төсвөөс их хэмжээний мөнгө авсан гэх гомдлын дагуу шалгаж эхэлсэн байна. Нэг үгээр хэлбэл цагдаагийн мөрдөнгөөс хэрэгсэхгүй болсоор ирсэн хэрэг дахин шалгагдах болсон байна. Тодруулбал, Эрүүгийн цагдаагийн албаны Эдийн засгийн гэмт хэрэгтэй тэмцэх газрын Мөрдөн шалгах хэлтэст шалгаж байгаа аж.

Яагаад энэ хэрэг прокурорт шилдэггүй байсан учир зангилаа нь Цагдаагийн ерөнхий газрын тэргүүн дэд дарга Ц.Ням-Очир Э.Бат-Амгалан нар хамаатан. Энэ хамаарлаараа хэргийг нь хаасаар ирсэн гэнэ.

Ирэх хаврын чуулганаар хэд хэдэн УИХ-ын гишүүнийг бүрэн эрхээс нь түдгэлзүүлж шалгах тухай мэдээлэл эртнээс хөвөрсөн. Тус нэрсэд УИХ-ын гишүүн Б.Пунсалмаа, Э.Бат-Амгалан нар багтаж, хамаарал бүхий этгээдүүдийнх нь үйлдлээр залилангийн асуудлаар бүрэн эрхээс нь түдгэлзүүлж шалгах уу гэдэг нь асуулт хэвээр үлдлээ.

О.ОНОН

Сэтгэгдлээ илэрхийл

Share Tweet