Н.Номтойбаяр гишүүний гэрээс хоёр ширхэг лед телевиз хулгайд алдагджээ

 -ГЭРИЙНХ НЬ ЦОНХЫГ ХАГАЛЖ ОРСОН БАЙЖЭЭ-

Өнгөрөгч долоо хоногт УИХ гишүүн Н.Номтойбаярын Дорнод аймагт байрлах гэрт нь хулгайч нэвтэрч эд зүйлсийг нь хулгайлж, зугтсан хэрэг гарчээ.  

Эх сурвалжийн мэдээлж буйгаар, Н.Номтойбаяр гишүүн аймгийн төвийн зам дагуу байрлах саяхан шинээр ашиглалтад ороод буй есөн давхар орон сууцны нэг давхарт нь гурван өрөө байр худалдан аваад байсан аж. Уг орон сууцанд хүн байдаггүй гэсэн мэдээллийг өгсөн билээ.

Тодруулбал, УИХ-ын гишүүн Н.Номтойбаяр тойрогтоо ажиллах үеэрээ гэртээ очдог бөгөөд байнгын эзгүй байдаг  аж. Саяхан УИХ-ын гишүүн Н.Номтойбаярын гэрийн цонх нь эвдэрсэн байсан тул оршин суугчид цагдаад дуудлага мэдээлэл өгсөн байна.

-Н.НОМТОЙБАЯР ГИШҮҮН ЦАГДААГИЙН БАЙГУУЛЛАГАД ӨРГӨДӨЛ ГАРГАЖЭЭ-

Мэдээллийн дагуу Дорнод аймгийн цагдаагийн бүрэлдэхүүн очиж шалгахад нэг давхрын баруун талын цонхыг нь хөшиж онгойлгож, улмаар хоёр ширхэг лед зурагт авсан байжээ.Цагдаагийн алба хаагчид орон сууцанд үзлэг шалгалт хийж, мөрдөн байцаах ажиллагааг явуулж байна.

Одоогийн байдлаар хулгайч нарыг олж тогтоогоогүй байгаа бөгөөд цагдаагийн нэмэгдсэн бүрэлдэхүүн эрэн хайж байгаа юм байна. Хэрэг гарсны дараа гишүүн өөрөө цагдаагийн байгууллагад алдагдагдсан эд хөрөнгөө бүртгүүлж олж өгөхийг хүссэн өргөдөл гаргажээ.

Албаны эх сурвалжийн мэдээллээр, гишүүний гэрт орсон хулгайч ганцаараа биш байсан байж болзошгүй бөгөөд хулгайд алдагдсан хоёр ширхэг зурагт нь нэг хүн даах хэмжээний биш байсан  аж.

Г.ҮҮЛТ

Энэ мэдээнд өгөх таны үнэлгээ

Хуваалцаарай Жиргээрэй