ХЭРЭГ: Хүүгээ тэврээд үсэрсэн эмэгтэй ГССҮТ-д хүргэгдтэлээ амьд, өвчин намдаагч гуйж байжээ

Өнгөрөгч тавдугаар сарын 29-ний өдөр Баянгол дүүргийн 14 дүгээр хороо, 18/1 дүгээр байрны зургаадугаар давхраас өлгийтэй хүүхдээ тэвэрсэн эмэгтэй үсэрч, харамсалтайгаар амь насаа алдсан тухай бид өмнө нь мэдээлж байв. Эл хэргийн талаар тухайн үед цагдаагийн байгууллагаас “Талийгаач эмэгтэй У нь 1983 онд төрсөн, гурван сартай Т-гийн хамт өндрөөс унаж газар дээрээ нас барсан. Хэргийг Баянгол дүүргийн цагдаагийн хэлтэст шалгаж байгаа” гэж албан ёсоор мэдэгдсэн.

Түүнчлэн зарим хэвлэл мэдээллийн хэрэгслүүдээр талийгаач эмэгтэйг бэлгийн хүчирхийлэлд өртөж байсан, улмаар өөрийнхөө болон хүүгийнхээ амийг хөнөөх зорилгоор үсэрсэн байж болзошгүй, мөн үсрэхээсээ өмнө согтууруулах ундаа худалдаж авсан нь бичлэгээр нотлогдсон, сэтгэц нь хэвийн бус байсан гэх цочирдом зүйлс мэдээлсэн.

Иймд бид харамсалтайгаар хорвоог орхисон эх, үр хоёрын үхлийн шалтгаан, хэргийн нөхцөл байдал хэрхэн үргэлжилж байгаа талаар уншигчдадаа үнэн бодит мэдээлэл хүргэхийг зорин сурвалжиллаа.

Бидний эх сурвалжийн мэдээллээр эх хүүхэд хоёр өндрөөс унасны дараа ГССҮТ рүү хүргэгдэж, шаардлагатай эмчилгээг авах хүртлээ амьд байжээ.

Тухайн үйл явдал болох мөчид хэргийг газар дээрээс нь харсан гэх гэрчүүдийн мэдээллээр ч мөн бүсгүй, хүүхэд хоёр унасныхаа дараа амьд байж. Улмаар түргэн тусламжийн 103 төвийн эмч нар ирж, тэдэнд яаралтай тусламж үйлчилгээг үзүүлэн, ГССҮТ рүү хүргэхээр авч явсан болохыг хэлэв. Иймд бид эл явдлыг баталгаажуулах үүднээс тухайн харамсалтай үйл явдал гарах үед дуудлагаар очиж, тусламж үйлчилгээ үзүүлсэн эмчээс зарим зүйлийг тодрууллаа.

-ТАЛИЙГААЧ ЭМЭГТЭЙ, ТҮРГЭН ТУСЛАМЖИЙН ЭМЧЭЭС ӨВЧИН НАМДААХ ТАРИА ХИЙЖ ӨГӨХИЙГ ГУЙЖЭЭ-

-Дуудлагын дагуу очиход тухайн үед нөхцөл байдал ямар байсан бэ?

-Дуудлага өгснөөс 5 хүрэхгүй минутын дараа манайхаас очиж ажилласан. Эх, хүүхэд хоёр өндрөөс унасан дуудлага байсан тул хойшлуулшгүйгээр түргэн хугацаанд очсон. Биднийг очиход эх нь өндрөөс унахдаа хөл, гараа хугалсан байдалтай байсан. Тэгээд биднээс өвчин намдаагч тариа хийж өгөхийг өөрөө гуйсан. Бид шаардлагатай арга хэмжээг авсан.

-Эх, хүүхэд өндрөөс унасан даруйдаа нас барсан хэмээх мэдээлэл тухайн үед цацагдаад өнгөрсөн шүү дээ.

-Бид эх болон хүүхдэд тусламж үйлчилгээ үзүүлж, ГССҮТ-рүү хүргэсэн. Яагаад эх, хүүхэд хоёр газар дээрээ нас барсан гэх ташаа мэдээлэл гарсныг ойлгохгүй юм. Худал мэдээлэл л яваад байна даа. Тухайн эмэгтэй, хүүхэд хоёулаа амьд байсан шүү. Тэгээд ГССҮТ-д хүргэгдсэнийхээ дараа эмчилгээ хийлгэх явцад нас барсан. Мэдээж үхлийн шалтгаан, бусад нарийн зүйлсийг шүүх шинжилгээний дүгнэлт гарсны дараа л мэдэгдэх байх.

-ЭМЧТЭЙ ЯРИЛЦАЖ БАЙХДАА ЭРҮҮЛ УХААНТАЙ, ЯМАР НЭГ СОГТСОН ШИНЖГҮЙ БАЙСАН-

-Тухайн эмэгтэйг үсрэх үедээ согтууруулах ундаа хэрэглэсэн байсан мөн СЭМҮТ-ийн хяналтад байсан гэх мэдээлэл гараад буй. Тийм ямар нэгэн өөрчлөлт танд мэдрэгдсэн үү?

-Тэрийг бол сайн хэлж мэдэхгүй юм. Хэргийн газраас ГССҮТ хүртэл 20 орчим минут тухайн эмэгтэйтэй яриад явсан. Мэдээж энэ хугацаанд хэн ч өөрийгөө СЭМҮТ-ийн хяналтад байсан, сэтгэцийн өөрчлөлтэй гэж хэлэхгүй шүү дээ. Гаднаас нь харахад бол эрүүл ухаантай, архидан согтуурсан шинж тэмдэггүй, хэвийн харагдсан.

-ТАЛИЙГААЧ ЭМЭГТЭЙН ХОЁР НҮДЭНД ЦОХИУЛСНЫ УЛМААС ҮҮССЭН ХӨХРӨЛТ БАЙСАН-

-Эмэгтэйг унах үед ойр орчимд нь байсан гэрчүүдийн хэлснээр, тухайн эмэгтэйн нүд хөхөрсөн байсан гэсэн. Үнэн үү?

-Харин тийм ээ, үнэн. Тэр хөхрөлт бол унаснаас үүссэн хөхрөлт яавч биш. Үүсээд удсан хөхрөлт байсан. Хэн нэгэнд цохиулсны улмаас л тийм хөхрөлт үүсэх боломжтой.

Өөр эх сурвалжуудын өгсөн мэдээллээр, тухайн эмэгтэй гэр бүлийн хүчирхийлэлд өртөж, сэтгэл зүйн хувьд тогтворгүй, хямралтай байсан тул СЭМҮТ-өөс зөвлөгөө авч байсан гэв. Мөн талийгаач бүсгүй амаржих явцад төрөхийн хүндрэл үүсч, савны асуудал үүссэн бөгөөд сэтгэл санаа нь ч мөн тогтворгүй, хямарсан байжээ.

-ЭМЭГТЭЙН АМЬДАРДАГ БАЙСАН БАЙРНЫ ХААЛГЫГ ХҮЧЭЭР ХӨШИЖ ОНГОЙЛГОСОН МЕХАНИК ЭВДРЭЛ ҮҮСЧЭЭ-

Бид эх сурвалжийн өгсөн мэдээллийг нягтлах үүднээс эл харамсалтай хэрэг гарсан газарт очиж, талийгаачтай хөрш зэргэлдээ амьдардаг айлууд болон, хэрэг гарах үед хөндлөнгөөс харж байсан үйлчилгээний төвийн ажилчдаас зарим зүйлийг тодруулав.

• 

Талийгаач эмэгтэй Баянгол дүүргийн 14 дүгээр хороо, 18/1 дүгээр байрны зургадугаар давхарт амьдардаг байжээ. Тухайн байр нь нэг орцтой бөгөөд цонх нь зам руу харсан байрлалтай. Орцоор ороход коридор сэлүүхэн бөгөөд давхартаа дөрвөн айл амьдардаг болох нь харагдав. Биднийг хаалганд дөхөж очиход, хүчээр хөшиж онгойлгосон гэмээр механик эвдрэл үүссэн байв.

-ТАЛИЙГААЧ ЭМЭГТЭЙ ТУХАЙН БАЙРЫГ ТҮРЭЭСЛЭДЭГ БАЙЖЭЭ-

Ингээд талийгаачийн амьдардаг хаалганы эсрэг талын айлын хижээл насны эрэгтэйгээс эл харамсалтай хэргийн тухай асуухад:

• 

“Их айхтар хэрэг гарсан байсан. Ах нь гэртээ бараг байдаггүй. Өглөө гараад л орой ирдэг. Сүүлд дуулах нь ээ урд айлын охин, хүүхдийн хамт өндрөөс унаж нас барсан гэсэн. Тэр эмэгтэйн талаар сайн мэдэхгүй байна” гэв.

Харин талийгаачийн байрны зүүн талд байрлах гаднаа содон зураг бүхий мөнгөлөг наалттай хаалгыг тогшиж, 20 орчим насны тайрмал, саарал өнгийн үстэй охиноос тодруулахад “Тийм ээ. Түрээсэлдэг байсан. Тэр байр нь дотроо хоёр өрөөтэй юм шиг байна лээ. Нэг охин найз залуутайгаа амьдардаг гээд орж гараад байдаг. Харин тэр нас барсан эмэгтэйг бол харж байгаагүй. Сүүлд сонсох нь ээ жаахан хүүхэдтэй байсан юм билээ” гэв.

• 

-ТАЛИЙГААЧ ЭМЭГТЭЙ ХҮҮГЭЭ НЯМБАЙЛАН ӨЛГИЙДӨЖ, ӨӨРӨӨ Ч МӨН ГАДУУР ХУВЦСАА БҮРЭН ӨМССӨН БАЙЖЭЭ-

Ийнхүү бид доошоо бууж, талийгаачийн унасан газрын урд байрлах Солонгос хоолны газар руу орж, талийгаачийг унах үед дотор хүн байсан эсэх, болсон зүйлийг харсан үгүйг асуухад, дунд эргэм насны эмэгтэй бидний асуултад ийн хариулсан юм.

-Байлгүй яахав. Үсэрснийх дараа хүмүүс шуугих үед би гарч харсан. Тэр өдөр гадаа их салхитай, цахилгааны утас салхинд хийсээд, бүр савалж байсан. Цонхоор үсэрсэн эмэгтэй зам дээр нэлээд хэцүү хэвтэж байсан. Хөл, гар нь хугарсан аятай байсан. Хүүхэд нь яг хажууд нь хэвтэж байсан. Өлгий нь нилээн шороо болчихсон. Ингээд цагдаа нар ирээд хүүхдийг түрүүлээд тэвэрч авсан. Удалгүй түргэн тусламжийн машин ирж, дотроос нь хоёр эрэгтэй, нэг эмэгтэй гарч ирээд хүүхдийг авч, өлгийг нь задлах гэж нэлээд ноцолдсон. Учир нь хүүхдийг нилээн чамбай, бүр хоёр давхар зузаан өлгийгөөр өлгийдсөн харагдсан. Гадна өлгий нь бүр олон товчтой. Харин ээж нь доогуураа пүүзтэй, дээгүүрээ куртик өмсчихсөн, гарахад бэлэн хувцасласан байсан. Ямар ч байсан хүүхдийн өлгийг задлаад цээжийг нь чагнаж байгаа харагдсан. Гаднаасаа ямар нэг гэмтэл харагдаагүй. Хөөрхий бодвол их өндрөөс унасан болохоор дотуур бэртэл л авсан байх. Ямар ч байсан ээж, хүү хоёр хоёулаа амьд, түргэний машинд суугаад явсан.

-Талийгаачийг согтууруулах ундаа хэрэглэсэн байж болзошгүй гэх мэдээлэл гараад буй. Таныг харахад бүсгүй ямар харагдсан бэ?

-Гаднаас нь харахад лав уудаг гэхээргүй цэвэрхэн хувцасласан жирийн л эмэгтэй байсан. Би нэлээд ойртож очсон. Тэгэхэд лав архи үнэртээгүй. Түргэний эмчтэйгээ яриад, ухаан санаа нь ч хэвийн харагдсан.

-Тухайн эмэгтэйг хэрэг болохоос өмнө та харж байсан уу?

-Үгүй. Харж байгаагүй юм байна. Хэрэг гарч хүмүүс шуугиад байхад нь л мэдсэн.

-ТАЛИЙГААЧИЙН ГЭРЭЭСЛЭЛД НЭР ДУРДАГДСАН ХҮМҮҮСИЙГ ТАТАН ШАЛГАЖ БАЙНА-

Тухайн хэрэг гарсны дараа албаны эх сурвалж бидэнд, бүсгүйн нөхөр цагдаагийн газарт байцаагдаж байх хооронд эл харамсалтай хэрэг гарсан хэмээх мэдээллийг өгсөн юм. Мөн эл хэрэг гарах болсон шалтгаан нь гэр бүлийн хүчирхийлэлтэй холбоотой байж болзошгүйг ч дуулгасан. Харин талийгаачийн үлдээсэн хоёр нүүр бүхий гэрээслэлд ах дүү нартаа гомдсон учир ийм үйлдэл хийлээ хэмээх агуулга бүхий зүйлсийг бичсэн байсан гэгдэж буй.

Иймд цагдаагийн байгууллагаас талийгаач бүсгүйг амиа хорлоход хүргэсэн байж болзошгүй хэмээх шалтгаанаар уг гэрээслэлд нэр дурдагдсан гэх хүмүүсийг эл хэрэгт татан шалгаж буй аж. Энэ тухай цагдаагийн байгууллагаас тодруулахад “Шалгалтын ажиллагаа үргэлжилж байгаа тул мэдээлэл өгөх боломжгүй” гэхээс өөр зүйл хэлээгүй юм.

Ямартай ч бидний олж авсан мэдээллээр, талийгаач эмэгтэй хүүхдийнхээ хамт газар дээрээ нас бараагүй, ГССҮТ-д эмчилгээ хийлгэх явцад өөд болжээ. Мөн дуудлагаар очсон эмчийн хэлснээр бүсгүйн хоёр нүдэнд цохилтоос үүссэн байж болзошгүй хөхрөлт үүссэнийг онцлов. Тэгэхээр тухайн эмэгтэй амиа хорлосон шалгааны нэг нь мөнөөх л гэр бүлийн хүчирхийлэлтэй холбоотой байхыг үгүйсгэхгүй. Түүнчлэн бүсгүй төрөхийн хүндрэл болон, төрсний дараах сэтгэл гутралтайгаа тэмцэж байсан. Тиймээс СЭМҮТ-ийн эмчээс зөвлөгөө авдаг байсан гэв.

Бүсгүйг үсэрсний дараа тусламж үйлчилгээ үзүүлсэн эмч болон хөндлөнгийн гэрчүүдийн хэлж буйгаар талийгаач эмэгтэй архидан согтуурсан шинжгүй, хэвийн харагдаж байсан гэх зүйлсийг хэлж байв.

Бид эл харамсалтай хэргийн талаар үргэлжлүүлэн мэдээлнэ.