“Бурхан багш”-ийн дүрийг бүтээсэн Химаншу Сони гэж хэн бэ

Үдэш бүр МҮОНРТ-ээр Энэтхэгийн “Бурхан багш” олон ангит уран сайхны кино үзэгчдэд хүрч байгаа билээ. Монголчуудын Бурхан багш гэж нэрлэж заншсан Гаутама Буддагийн гэгээрэл, эргэл мөргөлийн түүхийг харуулсан эл кино сонгуулийн синдромтой цаг үед хүмүүсийн сэтгэл зүйг түр зуур ч болов “өөр газар” аваачиж чадаж байна.

Хинди хэлээр хийгдсэн тус кино хамгийн анх 2013 онд цацагдаж байжээ. Ингээд 2014 онд Шри Ланкад, 2015 онд Өмнөд Солонгос, Тайланд, Перуд, 2016 онд Камбож, Германд, 2017 онд Америк, Канад, Англид албан ёсны эрхтэйгээр гарчээ.

Кино хамгийн анх үзэгчдийн хүртээл болоход түүх шашны эх сурвалжийн хувьд зөрүүтэй зүйлс цөөнгүй хийгдсэн гэх шалтгаанаар Непалчууд эх орондоо гаргахыг хориглож байв. Тухайлбал Гаутама Буддаг Энэтхэгт төрсөн гэж харуулж буй нь алдаатай гэж Непалчууд үзжээ.

Харин манай улсад ийн 2020 онд, ид сонгуулийн үетэй давхцан гарч таарч байна. Энэ цуврал нийт 55 ангитай. Яг одоо Сиддарт нэгэнт гэгээрэлд хүрч, Гаутама Буддагийн дүрийг олсон тул шашны хувьд цөөн чухад өгүүлэмж бүхий анги гараад удахгүй дуусах юм.

Тэгвэл нөгөө талд Сиддартын буюу Буддагийн дүрийг бүтээсэн жүжигчин монгол үзэгчдийн анхаарлыг ихээхэн татаж байна. Ер монгол гэлтгүй дэлхий нийтийн хараанаас ер гардаггүй Химаншу Сонигийн тухай сонирхолтой баримтуудыг энд дурдъя.

• Жинхэнэ нэр: Химаншу Сони
• Дууддаг нэр: Сони
• Мэргэжил: Жүжигчин
• Өндөр: 175 см
• Жин: 75 кг
• Нүдний өнгө: Бор
• Үсний өнгө: Хар
• Төрсөн огноо: 1989 оны хоёрдугаар сарын 1
• Нас: 31
• Төрсөн газар: Энэтхэгийн Ражастан дүүрэг
• Орд: Хумх
• Үндэс угсаа: Энэтхэг
• Сургууль: Жайпурын “Тагоре” олон улсын сургууль
• Их сургууль: Жайпурын худалдаа, үйлдвэрлэлийн их сургууль
• Анхны тоглосон кино: “Дваркадээш” телевизийн ОАУСК, 2011 он
• Шашин, шүтлэг: Хиндуизм
• Хобби: Жолоо барих, аялах, дуулах
• Дуртай хоол: Шарсан тахиа, пицца
• Дуртай жүжигчин: Ранбээр Капор
• Дуртай өнгө: Хар, улаан, хөх
• Дуртай брэнд: Tommy Hilfiger

Тэр 2015 онд кино продьюсер Шийтал Сингтэй гэрлэлтээ батлуулж байсан ч удалгүй хоёр тийш болжээ. Одоогоор тэр ганц бие, хүүхэдгүй нэгэн.

Цахим орчноос олдох мэдээллүүдэд Сониг согтууруулах зүйлийн ундааг нэлээд дуртай хэрэглэдэг гэж бичжээ. Түүнчлэн олон нийтэд хамгийн ихээр танигдсан дүр нь Будда биш, “Нээли Чаатри Ваалэ” сериалын Шийва бурхны дүр аж.

Химаншу Сони одоог хүртэл дандаа Хиндуизмын бурхад, шашны холбогдолтой дүрүүдэд тоглож ирсэн. Эдгээрээс хамгийн нэр хүндтэйг бас хамгийн чадмаг бүтээж чадсан нь Гаутама Будда гэж кино шүүмжлэгчид бичдэг байна.

Сони нэгэн ярилцлагадаа, “Будда бол миний бүх л карьерийн түүхэнд тохиолдсон хамгийн хүнд дүр байсан. Түүний дүрийг бүтээхийн тулд би юу байдаг бүхнээ шавхсан” хэмээн ярьж байжээ.

Тэр одоо ямар ч уран бүтээлийн саналыг хүлээж авахгүй байгаа. Шашны ном сургаалиудыг унших, өөрийгөө боловсруулахад ихэнх цагаа зарцуулж буй гэж ойр дотныхон нь хэвлэлд ярьдаг. Ямартай ч гадаадын улс орнуудаас кинонд тоглох хэд хэдэн саналыг түүнд ирүүлсэн байна.

Х.ЭРХЭС

Энэ мэдээнд өгөх таны үнэлгээ

Хуваалцаарай Жиргээрэй