Х.Тэнгэрхүү: Замын-Үүдээр хятад иргэд НУУЦААР орж ирсээр буйг нотлох баримт бий

Манайд бүр эртнээс л хувь, хувьсгалын гэгдэх компаниуд бүтээн байгуулалт хийх нэрийдлээр олон тооны хятад ажилчдыг хил давуулсаар буй. Тэд үүнийгээ тайлбарлахдаа “Монгол залуус ажил голдог, хөдөлгөөн удаан, архины хамааралтай тул ажиллахад хүндрэл их” хэмээх шалтаг, шалтгаануудыг тоочдог.

Яг энэ асуудлаар сүүлийн хоёр өдөр иргэн Х.Тэнгэрхүү сошиал хуудаст лайв хийж, зураг мэдээлэл оруулах болсон. Тэрбээр хэлэхдээ “Бүтээн байгуулалтын ажиллах хүч оруулах нэрээр том оврын зургаан автобус дүүрэн Хятад иргэдийг нууцаар хил давуулж байна. Тэдгээр иргэнийг мөшгихөд цагдаагийн алба хаагчид зохион байгуулалттайгаар хуйвалдаж, бидний  замыг буруулсан” гэсэн юм.

Энэ тухай ЦЕГ-ын Хэвлэл мэдээллийн төвийн дарга, цагдаагийн дэд хурандаа Б.Баатархүүгээс тодруулахад:

“Монгол улсын хилээр нэвтэрч буй эд зүйл, бараа таваараас эхлээд бүхий л зүйлсийг цагдаагийн байгууллага шалгадаг. Тухайн үед хамгаалалтад ажиллаж байсан цагдаагийн алба хаагчид журмынхаа дагуу албан үүргээ гүйцэтгэж байсан. Түүнээс ямар ч хууль бус, зохион байгуулалттай зүйл байхгүй”  хэмээх тайлбарыг өгөв.

Харин Онцгой байдлын газрын дарга, хурандаа Ж.Дамдинсүрэн уг мэдээлэлд ямар нэг тайлбар өгөөгүй бөгөөд “Би сайн мэдэхгүй. Монгол Улсын шадар сайд Я.Содбаатараас асуу” гэх зүйлийг хэлсэн юм. 

Харин Монгол Улсын Шадар сайд Я.Содбаатар хэвлэлд өгсөн тодруулгадаа:

“Монгол Улсын Засгийн газраас аль болох гадаад ажиллах хүчийг бус дотоод ажиллах хүчиндээ түшиглэж ажиллахыг зорьдог.  Тиймээс сүүлийн дөрвөн жилийн хугацаанд гаднаас авах ажиллах хүчний тоог 40 орчим хувиар бууруулсан. Энэ жилийн хувьд ковид-19 цар тахалтай холбоотойгоор гадаадаас ажиллах ажилчдын тоо эрс багассан.

Гэвч томоохон төсөл хөтөлбөрүүдийг хэрэгжүүлэх, цаашлаад БНХАУ-ын буцалтгүй болон зээлээр хэрэгжүүлэх  төсөл, Дархан, Налайхын зам, Цэвэрлэх байгууламж, Хан-Уул дүүрэгт баригдах ЭНЭМҮТ 2 зэрэг төслүүдэд гаднаас ажилчид авчирч, ажиллуулах шаардлагатай байна.

Ингэхдээ БНХАУ-аас зөвхөн удирдах болон инженер техникийн ажилчдыг оруулж байгаа. Нэг ёсондоо Монгол хүний хийж чадахгүй, тохироо хийх ажилчдыг авчирч байгаа гэсэн үг юм. Өнөөдрөөс эхлэн БНХАУ-аас ажиллах зорилготой иргэдийг оруулж ирэхийг он дуустал хориглосон. Одоогийн байдлаар Монголд 1000 гаруй ажилчид орж ирсэн гэх тооцоололтой байгаа. 

Аж ахуй нэгжүүдээс 37 орны 3000 гаруй ажилчин оруулж ирэх санал тавиад байгаа. Гэвч бид улирал болон ковидын нөхцөл байдлаас шалтгаалж, энэ саналыг хүчингүй болгосон. Зөвхөн төр гэлтгүй аж ахуй нэгжүүд ч мөн үүрэг, оролцоотой ажиллах ёстой. Тиймээс ирэх жилээс БНХАУ-аас ажиллах хүчин оруулж ирж байгаа аж ахуй нэгжүүдийг нээлттэй зарлана гэж бодож байгаа” хэмээх тайлбарыг өгсөн юм.

Бид БНХАУ-ын иргэдтэй холбоотой мэдээллийг интернэт орчинд анхлан түгээсэн Х.Тэнгэрхүүтэй холбогдож ярилцлаа.

-Юуны өмнө та манай уншигчдад өөрийгөө танилцуулаач?

-Би ямар нэг намд харьяалалгүй, цэвэр иргэн хүнийхээ хувьд үзэл бодлоо илэрхийлж, түүнийхээ төлөө дуу хоолойгоо өргөж байгаа гэдгийг хэлэх нь зүйтэй. Жирийн нэгэн Монгол Улсын иргэн хүн байна.

-Таны оруулсан лайв мэдээллийг үзсэн л дээ. Та БНХАУ-аас олон тооны иргэд орж ирэх гэж байгаа гэх мэдээллийг хаанаас авсан бэ?

-Замын-Үүдэд байдаг эх сурвалж маань "БНХАУ-аас зургаан автобус дүүрэн ажилчин хилээр гарах гэж байна” гэх мэдээллийг надад өгсөн юм. Анх сонсоод мэдээж маш их гайхсан. Иймд өөрийн биеэр шалгахаар мэдээллийнхээ мөрөөр явсан. Тэгэхэд зургаа биш гурван автобустай таарсан. Гэвч зургаа байсан байж магадгүй гэж бодоод байгаа. Учир нь Замын-Үүдээр дахин БНХАУ-ын иргэд орж ирсэн гэх мэдээлэл ирсэн.

Тэд уг нь Налайхын замаар орж ирэх байсан ч, цагдаа нар нь миний лайвыг үзээд нөгөө хүмүүсээ дагуулан Төв аймгийн замаар явсан байсан. Ингээд Эмээлтээс Хүй долоон худаг хүртэл хойноос нь хөөгөөд автобусаа алдсан. Учир нь автомашинтай цагдаагийн алба хаагчид замд хөндөлсөж, хаасны улмаас тэднийг алдсан.

-Цагдаагийн алба хаагчид тухайн үед ямар тайлбар, мэдээллийг өгсөн бэ?

-Машинаасаа ч бууж ирээгүй. Үнэхээр бид буруу бодож байсан бол Монгол хүний ёсоор машинаасаа бууж ирээд, бидний буруу ойлголтыг залруулж болно шүү дээ. Тэгэхгүйгээр замаа буруулж, хэргээр автобус явсан замыг хааж зогссон нь өөрөө сэжигтэй юм.

Зүгээр ч зогсохгүй цаасаар нүүрээ нууж хаагаад байгаа нь ойлгомжтой шүү дээ. Дээрээс нь би эх сурвалжтайгаа байнга холбоотой байж, мэдээлэл авч байсан болохоор итгэлтэй байсан.

-Танд мэдээлэл өгдөг хүн хэр баталгаатай эх сурвалж вэ?

-Баталгаатай. Надад байнга мэдээлэл өгдөг юм. Мэдээж хүн баттай зүйлээ л хүнтэй хуваалцана. Тухайн мэдээлэл нь ч мөн үргэлж зөв байдаг.

-Таны ийн мэдээлэл хийж уйгагүй яваа зорилго юу вэ?

-Зорилго гээд байх зүйлгүй. Дотооддоо хорио цээрийн дэглэмд шилжиж, улсынхаа хилийг хаасан хэр нь БНХАУ-аас автобус автобусаар нь иргэдийг оруулж ирэх нь хэр оновчтой вэ. Үүнд л их гайхаад байна. Өнгөрөгч долдугаар сараас хойш ийнхүү БНХАУ-ын ажилчдыг оруулж ирж байгаа гэх мэдээллийг эх сурвалж маань надад өгсөн.

Хүсвэл би удахгүй бүх баримт, нотолгоотой нь дэлгэнэ. Эдгээр иргэд нь үнэхээр бүтээн байгуулалтын зорилгоор уу, эсвэл цэргүүд байхыг үгүйсгэхгүй шүү дээ. Тэгэхэд тэд өөрсдийнхөө нэрийг бодож биднийг ард түмнийг турхирсан. Худал мэдээлэл тараасан гэдэг. Үнэндээ үгүй байхгүй юу.

-Тэгэхээр ирж байгаа иргэдийн тухай мэдээллийг эх сурвалжаасаа аваагүй байх нь?

-Тийм. Засгийн газраас бол ихэнхдээ бүтээн байгуулалтын зорилгоор авчирсан гэдэг. Гэвч бүтээн байгуулалт зогссон энэ үед тэр олон ажилчдаар яах вэ дээ.

-Таны дараагийн зорилго, авах арга хэмжээ юу вэ?

-Одоогоор хэчнээн тооны хятад иргэд ямар зорилгоор орж ирсэн, цаашид хэд орж ирэх ёстой вэ. Өвөл болж, дэлхий дахинаа онц байдал зарлаад байгаа энэ үед яагаад Хятад иргэдийг шөнө оройн цагаар, ард иргэдээ унтаж байх хойгуур автобус автобусаар зөөгөөд байгаа учраа нээлттэй хэлэхийг хүсэж байна.

-Мэдээлэл өгсөнд баярлалаа.

Энэ мэдээнд өгөх таны үнэлгээ

Хуваалцаарай Жиргээрэй